Ululahu Samuel 2 - Buka Blahi Ka Cheke Holo

Hana ne cheke fakeliniLord

¹ Aonu Hana ne tarai eghu: “Lord na pala haghe ghau iara! Iara thofno glealeꞌa fara ka glepo te eni iagho igne! Gognarona iara tangomana te maꞌe kolho ka nogu naoka re, naugna iagho ne togho ghau iara.

² “Theo kaisei te blahi jateula iagho teuna Lord, eghuteuna theo kaisei god jateula iagho teuna. Iagho kaisei nomi vido keli mala poru ghehati, eghuteuna ghehati theo kaisei naikno te mala togho ghami jateula iagho teuna.

³ “Ghotilo iheire te cheke fahaehaghe ra, ghotilo koko puhi tuare, ghotilo mala au kmu. Lord na kaisei God mae ihei te lasedi gobigna lepo fateote'o, eghuteuna mana fatedi puhidi naiknore.

⁴ “Nodi phaloho mae te nheta ra la soru pari la diꞌa, nu mae te theome nheta ra mare la nheta fabrahu.

⁵ Mae teke kulu ghamu fakeli ra, gognarona mare mala loku ranghidi keha maei, mala tangomana mare te au gano na. Nu mae teke kulu rofo teku ra, gognarona, mare theome rofo. Gaꞌase teke theo thugna ia, gognarona, kela au fitu thugna, nu gaꞌase teke au kmana thugna ia, gognarona, naꞌa kela diꞌanagnafa nei tanhi eghu.

⁶ “Lord tangomana te faleheni naikno na, eghuteuna mana tangomana teke fakarha fapuloni mana na. Mana tangomana te kuruni mana te mala tei ka namonodi mae te lehe ra, eghuteuna mana tangomana teke hata fapuloni naikno na ka namono tuana.

⁷ Mana tangomana te fakumani mae te dedei na, eghuteuna mana tangomana te toghoni mae te kuma na mala ke dedei. Mana tangomana te nhaꞌa faparini mae te fahaehaghe na, eghuteuna mana tangomana te nhaꞌa haghedi naikno te nhaꞌa faparidi thedi re.

⁸ Mana tangomana te pala haghe nakarhadi mae te kuma re. Uve, mana tangomana te kuru teidi iheire te au ka nakarha te diꞌa. Mana tangomana te toghodi mare mala kheradi mae funei, eghuteuna mana tangomana te fafnaknodi mare, mala gnokro mare baludi goro mae biꞌo. “Mana tangomana te edi glepo igre naugna famamhaku gna nauthoglu igne au ka khamegna mana kolho, mana neke fakegra hagheni nauthoglu igne ka thina te maku igne.

⁹ Mana reireghi fakelidi iheire te ghatho tahuni mana re, nu mae te diꞌa re, mala snivi fabrahu kate romno. “Theo kaisei naikno tangomana te uluni Lord ka nogna nolaghi thegna na.

¹⁰ Lord ginauna fatedi naikno te au ka namono te gnafa ka nauthoglu igne. Mana ginauna goigonidi nogna naoka re. Mana ginauna au kligna, mala fapoha mei fila ka mare. “Eghuteuna mana ginauna tusu lao nolaghi ka king teke vavahi mana na. Uve, mana ginauna pala hagheni nei toghoni eghu mana mala ulu fabrahu.”

¹¹ Aonu mae Elikana ghe Hana neke figri Rama, nu mae sua Samuel au neu Saelo mala toghoni pris Eli ka nogna gloku Lord.

Puhidi phei thugna mae pris Eli

¹² Phei thugna mae Pris Eli igre theome mae pris keli, eghuteuna phiamare theome ghatho tahuni Lord.

^13-14 Eghume phiamare theome leghuni puhi te doglo na ka nodi fafara naiknore. Leuleghu fata kate mei Saelo naiknodi Israel te fafara na, mare gahu vido nafnahi mala fafara ka suspen te biꞌo. Eghuteuna phiamare kuruni nodi mae gloku na mala hata foke biꞌo mala churu soru ka suspen igne. Eghuteuna kate pala haghe mana foke igne, nafnahi te chakhi ka foke igne te hata phiamare na. Phiamare eni koba nafnata puhi igne kate mei fafara naiknore.

¹⁵ Nu unha te diꞌa parilahu na, kate funu fafara mana nu theome hata fajifla nga meu garofagna nafnahi mala gahu teuna, phiamare na kuruni nodi mae gloku na mala cheke eghu ka mana, “Iagho famei keha ghegna nafnahi mae pris mala gogoꞌo mana! Mana tirogna ghamudi nafnahi te gahu iagho ka suspen are! Iagho famei nafnahi te theome gahu nga teu are!”

¹⁶ Nu jame te cheke eghu mae te fafara igne, “Ofo ghu sagho. Tahati ginauna eni ka puhi te doglo mala kulu gahu garofa gna nafnahi igne, aonu ke leghu iagho tangomana te hata unha te magnahagheni iagho na eghu.” Nu neuba, mae gloku igne cheke eghu, “Ei! Famei sagho gognarola! Jame te theome leghuni iagho unha te chekeni iara igne na, iara ginauna huhuru mala hata ka iagho!”

¹⁷ Igne nakhibodi phei thugna mae Eli te thono diꞌa fara ka tathagna Lord na igre, naugna phiamae igre theome ghatho tahuni nogna fafara mana na.

Mae Samuel ne au Saelo

¹⁸ Nu ka narane tuana, mae sua Samuel ne au faleghu neu Saelo mala loku ranghini Lord. Mana fahaghe kaisei phoko blahi te kiloi “efod”.

¹⁹ Leuleghu finogha na, idogna mae Samuel na susuki pohe brahu majaghani malagna mana. Eghuteuna leuleghu finogha kate tei fafara na, idogna kmagna mana igre hata tei koba pohe brahu igne ka mana.

²⁰ Eghuteuna leuleghu fata kate tei repa na, mae Eli fablahidi koba mae Elkana ghe Hana, ne cheke eghu, “Iara toreni Lord mala ke tusu ari keha sua ka ghopa tughugna mae sua teke tusu fapulo ghopa ka mana igne.” Gnafa teuna repa neke figri ka nodi namono na.

²¹ Aonu Lord ne fablahini Hana, eghuteuna Hana ne karha thilo thugna nalhaꞌu nei phei gaꞌase. Nu mae Samuel ne biꞌo haghe ka nogna Sugablahi Lord na.

Mae Eli ne cheke ka phei mae thugna re

²² Ka narane igre, mae Eli gne la kuekuꞌe fara, eghuteuna leuleghu fata na mana nomhidi thoutonu eidi unha te edi phei mae thugna re ka naiknore, nei puhi te thuru fodu phiamare baludi goro gaꞌase te loku ka grengathagna nogna Sugablahi Lord na.

²³ Aonu mana ne cheke eghu ka phiamare, “Phiamae! Naugna unha site edi ghopa glepo te diꞌa igrea? Naikno gre mei chekedi koba ka iara puhi te diꞌa te edi ghopa igre.

²⁴ Ghopa koko puhi te diꞌa tuare! Puhi te edi ghopa tuare, nogna naikno Lord igre toutonudi re thono diꞌa fara!

²⁵ Jame mae ihei te eni puhi te diꞌa na ranghini keha mae na, Lord ginauna tangomana te toghoni mana mala fadoglini nakhibogna mana na. Nu jame mae ihei te eni puhi te diꞌa ranghini Lord na, ihei gne nate tangomana te toghoni mana na?” Neuba, phiamare theome fanomho ka nogna cheke mae kmadi na, naugna Lord la kulu ghathonihi te mala falehedi phiamare na.

²⁶ Nu mae Samuel ne biꞌo haghe, eghuteuna Lord ne keli tagna ka mana, eghuteuna naiknore jaola ne keli tadi ka mana.

Kaisei mae profet ne chekeni phei thugna mae Eli igre ginauna au papara

²⁷ Kaisei mae profet mei ka mae Eli ne cheke eghu, “Igne unha te chekeni Lord na: Kani teke sneka kuꞌemu iagho Ijep tifa ra, iara neke falase ghau thegu ka kuꞌemu iagho mae Eron.

²⁸ Ka vikedi mae Israel ra, iara neke vahi ghami ghotilo ka tharaknagna mae Eron mala nogu pris iara. Iara neke vahi ghami ghotilo mala loku ka olta, mala gahu insens, nei mala fahaghe phoko blahi efod. Eghuteuna iara tusu ari nolaghi ka tharaknagna mae Eron mala hata vido ka fafara blahi te gahu naiknodi Israel ke kligna olta.

²⁹ Naugna unha si ghotilo te theome ghatho tahudi fafara te edi naiknore ka iara igrea? Naugna unha sagho te ghatho tahudi phei mae thumu igre ke tulaogu iarai gnea? Tuana unha te eni iagho kate snakredi phei mae thumu gre tela blokha fara are, naugna phiamare ne hata fajifla vido nafnahi te keli re ka nodi fafara naiknore.

³⁰ “Naugna igne iara Lord nodi God mae Israel, igne unha te chekeni iara na: Tifa na iara neke nhaꞌa cheke ka kuꞌemu iagho Eron ba iheire te gnafa ka tharaknagna mana na igre, mare ginauna mala mae pris mala edi fabrahu nogu gloku iara re. Nu gognarona, iara na cheke fadoglo ari ka iagho, u nhaꞌa cheke igne la gnafahi ka mae thumu iagho ra! Gognarona, mae ihei te ghatho tahu ghau iara na, iara ginauna ghatho tahuni mana. Nu mae ihei te tirogna ghau iara na, iara ginauna na jaola tiroguni mana.

³¹ Ghema Eli, iagho laseni, na theome raugha, iara ginauna na falehe nigho iagho baludi iheire te gnafa ka tharaknamu iagho igre. Theo kaisei naikno ka mare nate karha teu te ghilei kuekuꞌe na.

³² Keha tharakna agne Israel ginauna hatini fablahi na, nu ghotilo ginauna diꞌa nagnafami fabrahu, eghuteuna theo kaisei naikno ka tharakna ghotilo igne nate kuekuꞌe na.

³³ Iara ginauna tathaji kaisei mae kolho ka iheire nate karha mei ka ghotilo thoghei ro, mala nogu pris iara. Nu mana ginauna na au diꞌanagnafa nei tanhi eghu ghilei kabru tathagna re. Eghuteuna keha sua ka tharaknamu iagho igne ginauna lehe.

³⁴ “Unha nate filoni iagho ka phei mae thumu iagho, mae Hofni ghe mae Finihas igre, phiamare ginauna kafe lehe ka kaisei narane kolho, igne kaisei fagaglana te mala laseni iagho unha teke chekedi iara ka iagho ra thofno tutuani fara.

³⁵ Iara ginauna na vavahi kaisei mae pris, mae ihei nate ghatho tahu ghau iara na, eghuteuna mana ginauna na tangomana nate edi unha te magnahaghedi iara re. Iara ginauna fablahini mana mala au kmana thugna. Eghuteuna mae ka tharaknagna mana igre ginauna mala pris fabrahu, eghuteuna mala toghoni mae ihei nate vahini iara te mala mae king na.

³⁶ Eghuteuna jame ihei ka tharaknamu iagho igne te karha teu ka narane tuana, mana ginauna tei filoni nogu mae pris iara igne mala tore sileni nei gano eghu. Uve, mana ginauna tore eghu, ‘Iagho vahi ghau iara mala eni iara nogna gloku mae pris na mala tangomana iara te au gano te mala ghamu na.’ ”