Ululahu Samuel 19 - Buka Blahi Ka Cheke Holo

King Sol magnahaghei te faleheni mae Devet

¹ Aonu mana ne cheke balugna mae Jonatan nei nogna mae biꞌore mala hironi kaisei puhi mala faleheni mae Devet. Nu mae Jonatan namhani fara mae Devet,

² ne tei cheke eghu ka mana, “Mae kmagu iara na magnahaghei te falehe nigho iagho, eghume, iagho fiofilo nighoi eghu! Hamerane nathuꞌu na iagho tei hironi kaisei vido te keli mala tei poru.

³ Ghepa mama ginauna mei kegra rhegna vido te poru teu iagho na. Ghepa ginauna mei cheke eimu iagho jare, iara ginauna toutonu ka iagho unha nate chekedi manare.”

⁴ Aonu ka keha narane na, mae Jonatan ne toutonu ka mae kmagna na gobigna lepo te keli teke edi mae Devet re. Mana ne cheke eghu, “Theome keli iagho king te eni kaisei glepo te diꞌa ranghini nou mae gloku Devet. Eigna mana theome eni kaisei glepo te diꞌa ranghi nigho iagho. Unha te edi manare togho nigho iagho fara.

⁵ Mana neke lisei faleghu nakarhagna na neke faleheni mae Golia. Ka narane igne Lord neke toghoni Israel neke uluni magra na. Kate filoni igne, iagho neke gleale'a fara. Mana theome eni kaisei glepo te diꞌa. Naugna unha sagho te magnahaghei faleheni mana gnea? Iagho theo kaisei nou gaoghatho te keli te mala faleheni mana na!”

⁶ Mae Sol fanomho ka mae Jonatan neke figri gaoghathogna na. Aonu mana ne eni kaisei nhaꞌa cheke te rheta fara ne cheke eghu, “Ka nanghagna Lord, iara nhaꞌa cheke, iara ginauna na theome faleheni mana.”

⁷ Aonu mae Jonatan ne kiloni mae Devet ne toutonu ka mana unha teke chekedi phia mare mae kmagnare. Mana neke atha fapuloni mae Devet ka mae Sol, jateula teke au mana balugna king ulu lahura neu.

King ne fariu riu faleheni mae Devet

⁸ Kate mei armi gna Filistia na, mae Devet ne tei baludi nogna soldiare ne magra ka mare. Mae Devet balugna nogna soldiare magra heta ne rikha armi gna Filistia.

⁹ Kaisei narane, naitu teke kuru mei Lord igne neke mei faheta ka mae Sol. Mana louloku goru na gnokro neu lamna suga. Mae Devet filoni teke pulo mei ka mana naitu igne ne atha nogna ghita na ne lalahu, jateula te edi koba thegnara neu.

¹⁰ Aonu mae Sol ne fariu riu fadini mae Devet, nu mae Devet tugha fadelei, aonu goru igne jafra ka mana ne tei jokra ka gringni na. Mae Devet ghosei jifla ne rikha.

¹¹ Ka bongi igne, king ne kurudi keha mae mala tei ka sugagna mae Devet na mala tei faleheni mana hamerane ka keha narane na. Nu Mikal, khetogna mae Devet igne ne cheke eghu ka mana, “Jame te theome jifla iagho agne ginau bongi na, iagho ginauna lehe ka mare hamerane na.”

¹² Aonu naꞌa toghoni mae Devet ne jifla ka wida na ne rikha ka bongi tuana.

¹³ Mikal atha kaisei mumuju ne lilisei ka sape na. Naꞌa atha keha khakla nanigot ne lilisei ka phaꞌugna mumuju na ne totoku tafru ka pohe.

¹⁴ Kate mei mare te mala lokini mae Devet na, Mikal ne cheke eghu ka mare, “Mana na fogra.”

¹⁵ Mare figri neke pulo cheke ka mae Sol, nu mana neke kuru fapulodi mare ne cheke faheta eghu, “Tei pala balu sape mei agne mala aknu falehe iara.”

¹⁶ Nu kate tei mare na, mare ne filoni kolho mumuju igne balu khakla nanigot thuru teu ka sape na.

¹⁷ King nomhini igne ne cheke eghu ka Mikal, “Naugna unha sagho te chaghi ghau iara gnea? Iagho snakreni nogu naoka iara na ne rikha.” Nu Mikal ne cheke eghu, “Jame te theome toghoni iara te rikha na, mana ginauna falehe ghau iara.”

Mae Devet rikha ne tei ka profet Samuel

¹⁸ Mae Devet rikha ne tei Rama ka mae Samuel. Aonu mana ne toutonu ka mae Samuel unha te eni king Sol ka mana na. Aonu phiamare jifla Rama ne tei Naeot.

¹⁹ Aonu keha naikno tei ne toutonu ka mae king te tei au teu mae Devet jare na.

²⁰ Aonu mana ne kurudi keha mae mala tei lokini mae Devet. Kate tei posa mare ka namono na, mare ne filoni kaisei tothoghei profet. Mae Samuel batudi mae profet igre ne ragi nei koje neu mala kilo fnaknoni God, naugna Tharunga gna God na ne mei ka mare. Tharunga igne jaola ne mei ka mae teke kuru tei mae Sol igre, mare jaola ne ragi nei koje neu mala kilo fnaknoni God.

²¹ Kate nomhini mae Sol igne, mana neke kuru tei keha maei. Nu kate posa mare ka namono na, mare jaola ne loku fodu baludi mare ne ragi nei koje neu mala kilo fnaknoni God. Aonu mana ne fatilo fata kuru tei keha mae, nu glepo igne jaola ne thokedi mare.

²² Aonu mae Sol thegna ne tei hirodi mare ka namono igne. Kate mei posa mana ka seu biꞌo Seku na, mana ne ghusna eghu ka naiknore, “Mae profet Samuel ghe mae Devet gre au aheva?” Naiknore ne cheke eghu ka mana, “Phiamare au Naeot rhegna namono Rama.”

²³ Nu kate tei mana ka nabrou na, Tharunga gna God na jaola ne mei ka mana, mana ragi nei koje neu fabrahu ne ghilei tei posa Naeot.

²⁴ Kate tei mana rhegna mae Samuel na, mana atha koko nogna pohe na ne ragi nei koje neu mala kilo fnaknoni God. Mana uka pari ne thuru soesole ne ghilei romno, eghuteuna mana thuru fabrahu ka vido tuana ne ghilei rane. Naugna igne, naiknore ne ghusna eghu, “Mae Sol gne jaola kaisei mae Profet signea?”