Ululahu Samuel 18 - Buka Blahi Ka Cheke Holo

^1-2 King ghe mae Devet ne toutonudi unha teke edi mae Devet re. Funu ka narane igne, mae king ne theome snakreni mae Devet teke figri ka namono gna na, naugna mana magnahagheni mae Devet te loku ranghini. Ka vido tuana mae Jonatan thugna mae Sol igne fofodu fara balugna mae Devet jateula kaisei thabusigna eghu.

³ Mae Jonatan ne eni kaisei nhaꞌa cheke balugna mae Devet mala theome gnafa phiamare nodi namha na.

⁴ Fagaglanagna nhaꞌa cheke igne, mae Jonatan ne atha nogna pohe brahu na ne tusu lao ka mae Devet. Mana jaola ne tusu lao ka mana nogna phoko mala fanogra jata, naflahi, phaloho nei nhugha teu igre ka mae Devet.

⁵ Mae Devet tangomana te uludi vido te gnafa aheva mala tei magra mana teu king te kuru teini mana na. Aonu king ne vahini mana mala kaisei nogna mae komanda. Hatimare mae soldia baludi keha mae komanda ka armi igre mare ne keli tadi fara ka puhi igne.

King Sol ne goghotuni mae Devet

⁶ Kaisei fata ke leghugna te aknu falehe mana mae nhetagna Filistia igne, armi igne neke figri neke pulo ka namono. Goro gaꞌase te gnafa Israel igre jifla mei ne thafoni king Sol. Rehati gleale'a fara ne lalahu ka tamborin balu gita ne koje balu ragi.

^7-9 Kate ragi na, rehati koje ne cheke eghu, “King Sol neke aknu falehe kaisei thogha, nu mae Devet neke aknu falehe nabotho thogha.” Kate nomhini khoje igne, King Sol ne thono diꞌatagna fara. Mana ne cheke eghu ka gaoghathogna na, “Rehati kojeni iara aknu falehe kaisei thogha, nu mae Devet aknu falehe nabotho thogha ke salaꞌugu iarai. Jau mare ginauna na theome raugha vahini mana mala king!” Mae King Sol ne figri tagruni mae Devet neu gaoghathogna na ne thono goghotuni fara mae Devet.

^10-11 Kaisei narane ke leghugna igne, naitu teke kuru mei God ka mae Sol igne ne mei faheta fara ne jateula mae te nolinira neu mana. Aonu mae Devet ne jateula te sughu edi thegna leghu naranera neu ne atha nogna ghita na ne lalahu ka mana. Nu mae Sol ne atha kaisei jata ne cheke eghu ka gaoghathogna na, “Iara ginauna fadi jatani mae igne mala chakhi mana ka gringni ana.” Mana phia fata fariu riu fadi faleheni mae Devet, nu jata igre ne jafra kolho ka mae Devet.

¹² Lord ne au balugna mae Devet, nu mana theome au balugna mae Sol. Eghume gognarona mae Sol mhaghuni fara mae Devet.

¹³ Aonu mana ne vahini mae Devet mala nodi komanda kaisei thogha mae soldia. Leuleghu fata na mana theome magnahaghei te filoni mae Devet, aonu mana kuruni mae Devet mala tei ka magra. Mae Devet ne batudi kaisei thogha soldia ne tei ka magra.

¹⁴ Leuleghu fata na mae Devet uludi koba magra igre, naugna Lord na au balugna mana.

¹⁵ Kate filoni mae Sol te uludi koba mana magra igre, mae Sol ne mhaghuni mae Devet.

¹⁶ Nu naiknodi Juda nei Israel teu igre ne magnahagheni fara mae Devet, naugna mana kaisei mae lida te uludi koba nogna naokare.

Mae Devet ne tolaghi ka thugna gaꞌase mae Sol

¹⁷ King Sol ne cheke eghu ka mae Devet, “Iara magnahaghei nigho iagho te tolaghi ka thugu gaꞌase biꞌo lahu iara Merab. Nu praes gna thugu iara igne, iagho mala nogu mae soldia nheta iara, eghuteuna iagho mala loku rheta fabrahu gaoghathomu na ka iara. Iagho mala tei koba ka magra leghuni unha te chekeni Lord ka iagho na.” Mae Sol magnahagheni mae Devet te tei lehe ka magra, eigna mana theome tangomana te faleheni mana na. Eghume, te ghathoni mana na, armi gna Filistia kolho te tangomana te faleheni mana na.

¹⁸ Nu mae Devet ne cheke eghu ka mae Sol, “Iara theome nabagu te tolaghi ka thumu iagho na, naugna vikegu iara na theome fnakno ka tahati agne Israel, eghuteuna iara jaola theome mae biꞌo.”

¹⁹ Kate thoke mei narane te mala snakre laoni Merab ka mae Devet na, king neke tughu gaoghathogna, aonu mana neke snakre laoni Merab igne ka mae Adriel kaisei maegna Mehola.

²⁰ Neuba, Mikal fapea thugna mae king igne ne magnahagheni mae Devet. Kate nomhini king igne, mana ne keli tagna fara.

²¹ Mana ne cheke eghu ka nagnafagna na, “Keli fara te snakreni iara Mikal gne ka mae Devet, gaꞌase igne kaisei nabrou te mala lehe mana ka maedi Filistia igre.” Aonu mana ne cheke eghu ka mae Devet, “Igne fapea nhaꞌa cheke iara ka iagho te mala tolaghi ka thugu gaꞌase na.”

²² Mae Sol ne cheke ka nogna mae glokure mala tei cheke famaemahe eghu ka mae Devet, “King thofno keli tagna fara ka iagho, eghuteuna nogna mae gloku te gnafa manare jaola magnahaghei nigho iagho. Thofno keli fara te tolaghi iagho ka thugna mana na.”

²³ Aonu mare tei ne toutonu ka mae Devet cheke igre, nu mana ne cheke eghu, “Ghotilo jame ne kaisei glepo ikoi kolho puhi igne eghu ka gaoghathomi na te mala tolaghi iara ka thugna king na teu igne. Theo, eigna iara kaisei mae kuma, nei theome fnakno nanghagu na eghu kolho. Glepo igne kaisei glepo biꞌo fara ka gaoghathogu iara na.”

²⁴ Mae gloku igre figri neke toutonu nogna cheke mana igre ka mae king.

²⁵ Aonu mae Sol ne cheke ka mare mala ke tei cheke eghu ka mae Devet, “Fofoligna gaꞌase igne, king magnahaghei kaisei gobi vido guli ka thinidi hatimare mae soldiadi Filistia gre mala laseni mana te lehe mare ka magra na. Igne mala ke tughu fapulo glepo te diꞌa teke edi mae naokara.” Te ghathoni mae Sol na, ka puhi igne jame te lehe mae Devet ka mae Filistia gre.

²⁶ Nu kate tei toutonu mare ka mae Devet na, mana ne keli tagna fara te mala nanghogna mae king na. Eghuteuna kate theome thoke mei nga teu narane te mala tolaghi repa na,

²⁷ mae Devet ne tei baludi nogna soldiare ne aknu falehe phei gobi maedi Filistia. Mare vahe katha vido guli ka thinidi mae te lehe igre ne atha ne mei ke ulugna King Sol, foligna thugna gaꞌase mana na. Aonu mae Sol ne snakreni thugna gaꞌase na ka mae Devet mala tolaghi repa.

²⁸ Mae Sol ne filo glani Lord te au balugna mae Devet na, eghuteuna thugna mana Mikal igne ne thofno namhani fara mae Devet.

²⁹ Mae Sol ne mhaghuni fara mae Devet ne ghilei nogna naoka fabrahu mana ka nakarhagna na.

³⁰ Kmana fata, mae komanda ka armi gna Filistia igne mei magra koba ka mae Israel. Nu mae Devet uludi koba mare. Mana ne aknu falehe kmana mae soldia fara, salaꞌudi keha nogna mae komanda mae king Sol. Naugna igne, naikno te gnafare ghatho tahuni fara mana.