Ululahu Samuel 17 - Buka Blahi Ka Cheke Holo

Mae Golia ne cheke faparini armi gna Israel

¹ Kaisei fata, armi gna Filistia tarabana mala mei magra ka naiknodi Israel, mare haghe ne loku fodu Soko, kaisei namono ka nohi Juda. Mare mei ne au fari hoteidi phei namono Soko ghe Aseka ka vido te kiloni mare Efes-Damin.

² Nu king Sol balugna nogna armi na jaola ne mei au ka glogu Ila, tarabana mala magra ka armi gna Filistia.

³ Armi gna Filistia igne kegra ka kaisei thogele ke kasa glogu. Eghuteuna armi gna Israel na jaola ne kegra ke kasa ka keha thogele na.

⁴ Aonu mae Golia, kaisei mae nhetagna Gat au ka armi gna Filistia igne. Mana jifla mei ka vido te au mare na ne mei kegra pari ka glogu na. Mae nheta igne thogra thilo mita brahugna na.

⁵ Eghuteuna nogna phoko na neke horo ka bras. Tahugna phoko igne thogra namno salei kilo. Eghuteuna nogna khepi na neke horo ka bras.

⁶ Eghuteuna phei gahegnare pipiha ka bras. Eghuteuna mana sara haghe kaisei naflahi biꞌo mala magra teke horola ka bras.

⁷ Eghuteuna nogna goru na thono biꞌo fara, kheꞌigna goru igne thono fnonu fara neke horo ka aean, eghuteuna tahugna goru igne thogra thokeni fitu kilo. Mana au kaisei nogna mae soldia te mala pala nogna greoreo na. Eghuteuna mae igne tei ke ulugna mana.

⁸ Aonu, mae Golia kegra haghe ne eha eghu tei ka armi gna Israel na, “Ei, ghotilo nogna naikno sneka king Sol. Ghotilo mei unha agne? Ghotilo tarabana mala mei magra ka iara? Iara kaisei mae nhetagna Filistia! Ghotilo vahini kaisei nomi mae nheta mala mei magra ka iara.

⁹ Jame te lehe iara ka mana na, ghehati ginauna mala nomi naikno sneka ghotilo. Nu jame te lehe mana ka iara na, ghotilo ginauna mala nomi naikno sneka ghehati.

¹⁰ Ghotilo te gnafa na theome nabagu iara! Ghotilo fariu riu vahini kaisei mae mala magra ghepa gognarogne.”

¹¹ Kate nomhidi king Sol baludi nogna mae soldiare cheke te edi mana igre, mare te gnafa na kafe mhaghu nodi fara.

Mae Devet ne tei sighodi mae thabusignare

¹² Mae Devet gne maegna Betlehem, thugna mae Jesi. Eghuteuna mae Jesi gne au nhana thugna nalhaꞌu. Mana neke karha mei ka vikegna mae Efrata ka kokhologna mae Juda. Ka narane te king mae Sol igne, mae Jesi la khuekuꞌehi.

¹³ Thilo mae teke kulu karha ka mana re, mare tei ka magra balugna king. Mae teke kulu karha na, mae Eliab, fapea na mae Abinadab, eghuteuna fatilo na, mae Sama.

¹⁴ Mae Devet karha leghu lahu. Thilo mae thabusigna igre au fabrahu balugna king ka magra,

¹⁵ nu mae Devet tangomana te mei ka vido igne, eghuteuna ke pulo Betlehem mala ke tei reireghidi nogna sipu mae kmadi na.

¹⁶ Aonu leuleghu narane, hamerane grafi na, mae Golia eha faparini koba armi gna Israel. Mana eni fabrahu igne nabagna phiatutu narane.

^17-19 Kaisei narane, mae Jesi ne cheke eghu ka mae Devet, “Thilo mae thabusimu ra au balugna king ka glogu Ila. Mare magra ka armi gna Filistia. Iagho faghose atha tei kaisei kharaꞌo wit muita nei nabotho bret eghu ka thilo mare. Eghuteuna iagho jaola atha tei ghedi nabotho vido gano thilomare teke edi ka milk igre mala tusu lao ka nodi komanda mare na. Eghuteuna iagho fariu tei sighodi thilo mare, te keli teu kolho ba unha. Kate pulo mei iagho na, iagho atha mei kaisei glepo mala laseni iara te keli teu kolho thilo mare na.”

²⁰ Aonu hamerane boibongi ka keha narane na, mae Devet ne kuruni kaisei mae mala tei reireghi sipu. Aonu mana leghuni unha te chekeni mae kmagna na igne ne atha gano igre jifla ne tei. Mana ne tei posa ka vido aheva te tarabana mala magra teu te eha fabiꞌo teu mae soldiare.

²¹ Armigna Filistia igne mei ne kegra ka nodi vido na, eghuteuna armigna Israel na jaola ne mei kegra ka nodi vido na, mare kafe tarabana mala magra.

²² Mae Devet lisei soru ganore ka mae te reireghidi nodi gobigna lepo mae armi igre ne chari ne tei ka vido te tarabana mala magra teu mare na. Mana tei ne filodi thilo mae thabusignare ne ghusnadi thilo mare te keli teu ba unha.

²³ Ka vido te cheke teu mana ka thilo mare igne, mae Golia mae nhetagna Filistia igne ne jifla mei. Mana ne eha fabiꞌo balu cheke fadiꞌadi mae Israel, nafnata puhi te eni koba mana ka mare igne. Aonu mae Devet ne nomhidi nogna cheke mana igre.

²⁴ Kate nomhidi nogna cheke mae Golia igre, armigna Israel igne ne thono mhaghu nodi fara ne suaraghi fapulo ne kafe rikha.

²⁵ Mare ne kafe cheke eghu, “Ghotilo filoni mae ana, mana cheke fadiꞌa ghita tahati koba maeda Israel. King neke nhaꞌa chekehi te mala tusu lao kaisei taba biꞌo ka mae ihei te faleheni mae soldia gna Filistia tuana. Eghuteuna mana ginauna na jaola snakre lao thugna gaꞌase na mala tolaghi ka mana. Eghuteuna kmagna, thabusigna teu mana re ginauna theome mala foli takis.”

Mae Devet magnahaghei te magra balugna mae Golia

²⁶ Aonu, mae Devet ne ghusna eghu ka mae soldia te kegra teu rhegna mana igre, “Jame kaisei mae te faleheni mae soldia gna Filistia igne te mala atha fadelei mamaja igne ka mae Israel igre na, unha nate atha mana na? Tahati nogna armi God mae ihei te karha. Mae soldia tuana kaisei mae bongihehe kolho, mana theome laseni God, mana theome nabagna te cheke fadiꞌa ghita tahati na.”

²⁷ Aonu mare ne cheke fadoglo ka mana eidi gobigna lepo nate atha mae ihei nate faleheni mae soldia igne.

²⁸ Aonu mae Eliab, mae ke biꞌogna mae Devet igne nomhini te cheke teu mana baludi mare igne ne diꞌatagna fara ne cheke eghu, “Ei, unha te mei eni iagho agne na? Mae ihei nate reireghidi nou phei thilo sipu te au teu ka namono nagoura? Iara lase nigho iagho kaisei mae diꞌa! Iagho mei agne mala filo nou magra kolho!”

²⁹ Nu mae Devet ne cheke eghu, “Iara theome eniu kaisei glepo te najafra na. Ba, iara theo nogu nolaghi te mala ghusna na?”

³⁰ Aonu mana figri neke tei ghusna ka keha mae soldiare nafnata ghusna igne. Nodi cheke tughu mare na kaisei nanaba kolho.

³¹ Keha mae soldia te nomhidi nogna cheke mana igre, mare tei ne toutonu ka mae Sol. Aonu king ne kiloni mae Devet mala tei filoni mana.

³² Mae Devet tei ne filoni king ne cheke eghu, “King, theome tangomana tahati te mhaghuni mae soldia gna Filistia tuana! Iara nou mae gloku iagho gne ginauna tei magra ka maegna Filistia tuana.”

³³ King ne cheke eghu, “Theo, iagho theome nabamu! Mae igne mae soldia funu tifa mei, nu iagho kaisei mae majaghani kolho.”

³⁴ Nu mae Devet ne cheke eghu, “King, iara mae mala reireghidi nogna sipu mae kmagu. Eghuteuna kate mei kaisei lion ba bea te pala te tei kaisei sua sipu na,

³⁵ iara leghuni lion ba bea tuana tei puri falehe mala fakarhini sua sipu igne. Eghuteuna jame kaisei lion ba bea te ghasa te mei ka iara na, iara ginauna loku ka graragna na bicho falehe.

³⁶ Iara neke falehedihi lion nei bea teu tuare. Eghume, iara ginauna na jateula tuana eghu faleheni mae bongihehe tuana, naugna mana ne cheke faparini nogna armi God mae ihei te karha na.

³⁷ Lord mae teke fakarhi ghau iara ka foflodi lion nei bea teu igne ginauna jaola fakarhi ghau iara ka mae soldia gna Filistia tuana.” Aonu mae Sol ne cheke eghu ka mana, “Uve, tei sagho. Iara ginauna torei Lord mala au balumu.”

Mae Devet ne faleheni mae Golia

³⁸ Aonu king Sol ne atha nogna glepo mala magra thegnare ne tusu lao ka mae Devet. Mana atha khepi mala magra teke horo ka bras na ne lisei lao ka phaꞌugna mae Devet na. Eghuteuna mana atha phoko te mala barani mana ka jata na ne nhaꞌa lao ka mana.

³⁹ Mae Devet ne famamhaku nhugha te mala makugna nogna naflahi mala magra king na ke klignadi phoko mala magra igre. Nu kate fariu riu nonolo mana na, mana ne theome tangomana te tei na, naugna mana neke theome fahaghedi glepo igre tifa na. Aonu mana ne cheke eghu ka king, “Jame te fahaghe iara glepo igre na, iara ginauna na theome tangomana te magra na.” Aonu mana ne atha koko glepo igre.

⁴⁰ Mae Devet atha nogna khodo na ne soru ka khoꞌu ikoi na ne vavahi glima thina te famane khoukhoru ne hono lao ka nogna gloi na. Aonu mana atha nogna phirikuava na ne tei magra ka mae Golia.

⁴¹ Ka vido igne, mae Golia balugna nogna mae soldia te pala nogna greoreo biꞌo mala magra na nolo ne mei namo ka mae Devet.

⁴² Kate filoni mae Devet na, mae Golia ne filo faparini mana, naugna mana kaisei mae majaghani kolho. Eghuteuna mana kaisei mae famane nalhaꞌu, mae nheta nei keli fara filogna na eghu.

⁴³ Eghuteuna mana ne cheke eghu ka mae Devet, “Ghema, ne kaisei khuma iara eghu mei balu khodo sagho ia?” Aonu mana ne ehadi nogna god re mala tibrini mae Devet.

⁴⁴ Mae Golia ne eha eghu tei ka mae Devet, “Mei sagho! Iara ginauna snakre lao nafnahimu iagho na ka nanghaji nei ka glepo te tautagu are eghu mala ghamu reꞌe.”

⁴⁵ Nu mae Devet ne eha eghu tei ka mana, “Uve, iagho mei balu jata nei naflahi eghu mala falehe ghau iara. Nu iara na ari magra ka iagho ka nanghagna Lord mae ihei te au nolaghi fateote'o. Armi gna Israel igne nogna God mae ihei te cheke faparini iagho igne.

⁴⁶ Gognarogne, Lord ginauna snakre mei nigho iagho ka khamegu iara. Iara ginauna falehe nigho iagho, eghuteuna iara ginauna kusu phaꞌumu iagho na. Eghuteuna iara ginauna snakre lao thinimi ghotilo mae Filistia are ka nanghaji nei ka glepo te tautagu are eghu mala ghamu reꞌe. Aonu naikno te gnafare ginauna laseni te God na reireghini Israel.

⁴⁷ Eghuteuna mae te gnafa te filo teu igre ginauna laseni Lord na theome rouronu ka naflahi ba jata te mala reireghidi nogna naiknore. Nu mana au nogna nolaghi te mala toghodi nogna naiknore te mala uluni magra na. Eghuteuna mana ginauna na kafe lisa mei ghami ghotilo hui ka khamemi ghehati maemi Israel.”

⁴⁸ Mae Golia tugha ne mei ne namo ka mae Devet, aonu mae Devet ghosei chari ne tei.

⁴⁹ Mana hughe ka nogna gloi na ne atha fajifla kaisei thina ne nhaꞌa lao ka phirikuava na. Aonu mana ne viuviru phirikuava na ne fateini thina igne ne churu ne tei lamna ka greregna mae Golia na ne phosa nhubra phaꞌu na. Aonu mana khoko jukma ne soru pari ka glose na.

⁵⁰ Neuba mae Devet ne theo nogna naflahi mala magra, mana magra ne faleheni mae Golia ka phirikuava nei thina eghu kolho.

⁵¹ Aonu mana chari ne tei korho fajifla nogna naflahi mala magra thegna mae Golia na ne kusu phaꞌugna mana na. Kate filoni te lehe nodi mae nheta na, mae soldia di Filistia igre ne kafe rikha.

⁵² Ka narane igne, hatimare mae soldia di Juda nei Israel teu igre ne thagru fabiꞌo ne ngolhi leghudi ne tei posa ka namono Gat, nei ke kosi namono Ekron. Mare ne aknu falehe kmana mae soldia di Filistia ne chara tongana ka nabrou te soru funu Saraem te tei posa Gat nei Ekron.

⁵³ Ke leghugna igne, mare figri neke pulo ka vido aheva te au armi gna Filistia igne, mare ne vavaro fahui nodi gobigna lepo mare re.

⁵⁴ Keha narane ke leghudi igre, mae Devet pala ne tei Betlehem phaꞌugna mae Golia na. Nu mana ne lilisei nogna gobigna lepo mala magra mae Golia igre ka nogna suga tapuale thegna na.

Mae Abna athani mae Devet ne tei ka mae King Sol

⁵⁵ Kate filoni mae Sol te tei magra mae Devet te faleheni mae Golia igne, mana ne ghusna ka mae Abna, mae komanda gna nogna armi na, “Abna, thugna mae ihei si mae majaghani ignea?” Mae Abna ne cheke eghu, “Iara cheke kate tutuani fara, iara theome laseni.”

⁵⁶ Aonu mae king ne cheke eghu ka mana, “Iagho tei ghusnani, thugna mae ihei.”

⁵⁷ Kate pulo mei mae Devet ke leghugna te faleheni mana maegna Filistia igne, mae Abna athani mana ne tei ka mae Sol. Mae Devet pala neu phaꞌugna mae Golia na.

⁵⁸ Mae king Sol ne ghusna eghu ka mana, “Mae majaghani, mae ihei mae kmamu iagho na?” Mae Devet ne cheke eghu ka mana, “Kmagu iara na mae Jesi, maegna ka namono Betlehem, mae kmagu iara igne mana ghatho tahu nigho iagho fara.”