Ululahu Samuel 16 - Buka Blahi Ka Cheke Holo

¹ Aonu Lord ne cheke eghu ka mae Samuel, “Iagho diꞌanagnafani fabrahu mae Sol, nu iara theome magnahagheni mana te king gna Israel gognarona. Iagho hata oliv oel mala tei hironi mae Jesi ka namono Betlehem. Iara vavahi kaisei mae ka thugna mana ra, eghuteuna iagho tofa oel ka pha'ugna mana na mala king gna Israel.”

² Nu mae Samuel ne cheke eghu, “Jame te nomhini mae Sol eigna igne na, mana ginauna diꞌatagna falehe ghau iara.” Aonu Lord ne cheke eghu, “Theo. Iagho ginauna hata tei balumu kaisei sua buluka gaꞌasegna. Kate posa iagho ka namono na, iagho ginauna cheke eghu ka naiknore, ‘Iara gne mei mala fafara ka Lord.’

³ Eghuteuna iagho ginauna kiloni mae Jesi mala mei ka fafara igne. Iara ginauna falalase ka iagho mae ihei ka thugna mana igre nate fablahi iagho te mala king na.”

⁴ Aonu mae Samuel ne leghuni unha te chekeni Lord ka mana igne. Kate posa mana ka namono na, hatimare mae biꞌogna namono na filoni mae Samuel ne mhaghu nodi fara. Mare mei ne ghusna eghu ka mana, “Iagho mei ka pharikeli?”

⁵ Mana ne cheke eghu ka mare, “Uve, iara mei ka pharikeli mala fafara ka Lord. Ghotilo fagae ghami themi ke ulugna Lord, eghuteuna ghotilo mei mala fafara balugu iara.” Mae Jesi baludi thugna re mare mala klino ke ulugna Lord. Aonu mana kilodi mare ne mei ka fafara igne.

⁶ Kate mei mare na, mae profet ne filoni mae Eliab. Mana ne ghaoghatho eghu ka nagnafagna na, “Jame mae te mei kegra ke ulugna Lord igne ngala jame teke vavahi mana na.”

⁷ Nu Lord ne cheke eghu ka mae Samuel, “Iagho thosei ghathoni mae igne, neuba mana ne mae brahu nei famane mae neu, iara theome magnahagheni mae igne. Naugna puhigu iara te mala filo ka naikno na theome jateula puhigna naikno eghu. Naikno na filo fei thini kolho, nu iara Lord filo lamna ka nagnafagna naikno na.”

⁸ Aonu mae Jesi ne kiloni mae Abinadab mala mei ka mae Samuel. Nu mae Samuel ne cheke eghu, “Lord jaola ne theome vahini mae igne.”

⁹ Aonu mae Jesi ne atha meini mae Sama. Nu mae profet ne cheke eghu, “Theo, Lord na jaola theome vahini mae igne.”

¹⁰ Ka puhi igne mae Jesi kafe atha ne mei fitu mae thugnare ka mae Samuel. Nu mae Samuel ne cheke eghu ka mana, “Lord na theome vahini kaisei ka mae igre.”

¹¹ Aonu mae Samuel ne ghusna eghu ka mae Jesi, “Mae igre kolho thumu iaghore?” Mae Jesi ne cheke eghu, “Uve, nu mae leghu lahu ka mae igre na, mana reireghi sipu.” Aonu mae Samuel ne cheke eghu, “Iagho kuruni kaisei mae mala tei atha meini mana agne. Tahati na theome fufunu fafara na ghilei mei posa mana.”

¹² Aonu mae Jesi ne leghuni chekegna mae profet igne ne kuruni kaisei mae ne tei atha meini mana. Mana kaisei mae famane nalhaꞌu, mae nheta nei keli fara filogna na eghu. Aonu Lord ne cheke eghu ka mae Samuel, “Uve, igne mae ihei te magnahagheni iara na, iagho fablahini mana mala king.”

¹³ Aonu mae Samuel atha oliv oel ne tofa ka phaꞌugna mae Devet na ke uludi mae thabusigna manare. Funu ka narane igne, Tharunga gna Lord na ne mei au fabrahu balugna mana. Ke leghugna igne, mae Samuel neke pulo Rama.

Mae Devet ne loku ranghini King Sol

¹⁴ Aonu Tharunga gna Lord na ne theome au balugna king Sol. Eghuteuna Lord ne kuru tei kaisei naitu mala mhaghu mana.

¹⁵ Keha nogna mae gloku mae king igre ne cheke eghu ka mana, “God kuru mei kaisei naitu ka iagho.

¹⁶ Jame magnahaghei iagho na, ghehati ginauna tei hironi kaisei mae te lase lalahu gita. Glahula ke pulo mei naitu igne ka iagho, mana ginauna lalahu gita mala ke keli fapulo iagho gaoghathomu na.”

¹⁷ Aonu king Sol ne cheke eghu ka mare, “Keli fara, ghotilo tei hironi kaisei mae te lase lalahu gita mala atha mei ka iara.”

¹⁸ Kaisei mae ka mae igre ne cheke eghu ka mana, “Kaisei maegna Betlehem, thugna mae Jesi, mana lase lalahu gita fara. Mana kaisei mae soldia keli nei theome mhaghu eghu. Mae igne thofno keli fara filogna na, eghuteuna mana kaisei mae lase cheke fara, eghuteuna Lord na au balugna mana.”

¹⁹ Aonu mae Sol ne kurudi keha mae ne tei ka mae Jesi. Mare tei ne cheke eghu ka mana nogna cheke mae king igre, “Iagho kuru meini mae thumu Devet, mae greireghi sipu ia mala mei ka iara.”

²⁰ Aonu mae Jesi nomhini igne ne atha keha nanigot majaghani, keha bret nei kaisei duku guli nanigot te fodu ka waen ne luja ka dongki na ne tei balugna mae Devet ka king.

²¹ Mae Devet tei ne au balugna king Sol, ne loku ranghini mana. Mae Sol filoni mae Devet ne keli tagna fara, mana vahini mae Devet mala pala nogna glepo mala magrare.

²² Aonu mae Sol ne fatei cheke igre ka mae Jesi, “Iara thofno magnahagheni fara mae thumu iagho igne. Snakreni mana mala loku ranghi ghau iara.”

²³ Funu ka narane igne, keha fata kate pulo mei naitu na teke thokeni king na, mae Devet atha nogna ghita na ne lalahu. Kate lalahu mana igne, naitu na neke tei kokoni mae Sol. Aonu mana neke snagla gaoghathogna na neke gleale'a fapulo.