Ululahu Samuel 14 - Buka Blahi Ka Cheke Holo

^1-3 Ka narane tuana, King Sol tei ne horo haghe nogna suga tapuale na rhegna pesi gaju jare Migron, theome khaba kolho Gibea. Eghuteuna namno gobi soldia au balugna mana ka narane igne. Eghuteuna kaisei mae pris te au balugna mana na, nanghagna na mae Ahaeja, thugna mae Ahitub, thabusigna mae Ikabod. Kmadi mae Ahitub ghe mae Ikabod gre na, mae Finehas, thugna mae Eli, nogna pris Lord, mana neke au Saelo tifa. Pris Ahaeja ne hata balugna efod blahi na mala lasedi nogna cheke tughu Lord re. Kaisei narane, mae Jonatan ne cheke eghu ka mae soldia te mala pala nogna glepo mala magra mana re, mana ne cheke eghu, “Tapa ginauna tei filodi soldia di Filistia te fanagra ka nabrou te mala tei Mikmas ia.” Nu mae Jonatan neke theome facheke ka mae kmagna na, eghuteuna mae soldia re jaola theome laseni te tei mana na.

⁴ Mae Jonatan ne tei filoni vido aheva te au teu maedi Filistia igre. Te mala tei Mikmas na, mare leghuni nabrou ikoi aheva te tei salaꞌu farihoteidi thogele ro. Ka vido igne au phei thogele thina te ninhigrana fara te mala tei thoke tadi re, keha na ka keha phile na, eghuteuna keha na ka keha phile. Nanghadi phei thogele thina igre, Boses ghe Sene.

⁵ Kaisei au ke raru Mikmas, eghuteuna keha na au ke mata Geba.

⁶ Aonu, mae Jonatan ne cheke eghu ka mae soldia majaghani te au balugna na, “Tapa ginauna tei salaꞌu ka keha phile gno mala ari posa ka mae bongihehe te theome vahe are. Glahu togho ghita Lord. Eghuteuna jame te togho ghita mana na, neubane tapa kolho, ba tahati kmana, theo kaisei glepo nate fanograni Lord te mala uluni tapa magra igne.”

⁷ Aonu mae majaghani igne ne cheke eghu, “Keliu kolho. Gobigna lepo te magnahaghei eni iagho na, iara na leghuni kolho gaoghathomu iagho na.”

⁸ Eghuteuna mae Jonatan ne cheke eghu, “Tapa na tei salaꞌu ka keha phile gno mala filo ghita mare.

⁹ Jame te cheke mare mala ofou tapa mala soru mei mare filo ghita teuna, tapa ginauna ofou.

¹⁰ Nu jame te cheke mare mala haghe tapa ka mare teuna, tapa ginauna tei, naugna tuana kaisei fagaglana te eni Lord ka tapa te mala uludi mare na.”

¹¹ Aonu, phiamare kegra haghe ne tei. Eghuteuna kate filodi phiamare na, mare ne cheke eghu, “Ei, filo si ghotilo! Mae Hibru la jifla mei ka gluma aheva teke poru mare tagna na.”

¹² Aonu mare ne eha eghu tei ka phiamare, “Ei! Mei si ghopa! Ghehati magnahaghei ghami ghopa te lasedi keha glepo agne!” Mae Jonatan ne cheke eghu ka mae soldia majaghani igne, “Keli fara, mei sagho ke leghugu iara. Lord na lisa meidihi ka khameda tahati maeda Israel.”

¹³ Eghuteuna mae Jonatan ne apla ne haghe ka khamegna nei ghahegna teure kolho, eghuteuna mae soldia majaghani igne ne ke leghugna mana. Mae Jonatan ne tei aknu falehe maedi Filistia te au ke ulugna re, eghuteuna mae soldia majaghani igne ne aknu falehe mae te mei ke leghu re.

¹⁴ Ka magra ululahu igne, phiamare ne aknu falehe varadaki soldia ke lamnagna vido nohi ikoi kolho.

¹⁵ Eghuteuna soasopai tothoghei ka nodi armi maedi Filistia igre ne mhaghu nodi fara, neuba mare ne tei magra ba au ka suga tapuale, mare ne rhana nodi fara. Eghuteuna God ne famhaghudi maedi Filistia gre ne faꞌihodi tafri.

Hatimare maedi Filistia ne gofru ka magra igne

¹⁶ Ka narane tuana, kate filodi soldia di Filistia gre, mae te mala reireghini mae Sol Gibea igre mare ne rikha tafri, naugna mare ne mhaghu nodi fara.

¹⁷ Aonu mae Sol ne cheke eghu ka nogna soldia re, “Ghotilo tei kaha noda soldia ra, mala laseni ihei te theome au agne na.” Eghuteuna kate kaha mare na, mare laseni mae Jonatan balugna nogna mae soldia majaghani te mala pala nogna glepo mala magra re theome au jare.

¹⁸ Ka narane igne, armigna Israel na ne pala nogna Bokis Blahi Lord na baludi ne tei ka magra. Mae Sol ne cheke eghu ka Pris Ahaeja, “Hata mei Bokis Blahi ia.”

¹⁹ Kate cheke teu mana ka Pris Ahaeja igne, mare ne nomhi teini naoglagna armi gna Filistia, aonu mae Sol ne cheke eghu, “Theo, iagho lilisei au Bokis Blahi na! Tahati theome snagla!”

²⁰ Aonu mana ne tei baludi nogna soldia re ne magra ka armigna Filistia. Nu armi gna Filistia igne ne faꞌiho tafri ne magra fari thedi.

²¹ Eghuteuna keha mae Hibru teke folidi armigna Filistia teke tei magra baludi mare igre neke tughu gaoghatho. Aonu mare ne loku fodu baludi King Sol ghe mae Jonatan.

²² Eghuteuna keha nodi soldia mae Israel teke poru tafri teku ka thogele Efrem igre ne nomhini te rikha armigna Filistia igne. Aonu mare ne jaola ne loku fodu ka armigna Israel ne ngolhidi mare

²³ ne aknu falehedi, magra igne ne ghilei tei salaꞌu ka namono Bet-Aven. Ka narane tuana, Lord ne thofno toghoni armigna Israel ne uluni magra igne.

King Sol ne tabuni te ghamu na

²⁴ Aonu, soldia di Israel igre ne glaꞌe soru naugna mare ne thono rofo fara. Mare theome ghamu, naugna mae Sol neke cheke farheta eghu ka mare, “Blahi kaisei mae te ghamu na ghilei blulu naprai na. Ulu lahu na tahati mala kulu aknu falehe ghu noda naoka igre mala ke tughu fapulo puhi biꞌo teke edi mare ra. Jame ihei te huhughuni unha te blahi na, mana mala lehe!” Naugna igne, theo kaisei mae ka mare te ghamu na narane igne.

²⁵ Aonu keha mae ka armi igne mei ka kaisei vido mata ne filodi kmana jurukuli ka vido igne.

²⁶ Gaju re fodu ka jurukuli, nu theo kaisei mae ka mare te ghamu na, naugna mare ne mhaghuni teke tabu King Sol igne.

²⁷ Nu mae Jonatan neke theome nomhini tabu teke eni mae kmagna na igne, aonu mana ne jajaꞌi jurukuli igre ka khodo teke louloku teku na ne hata keha ne ghamu, eghuteuna mana neke haimini teke roi keli kakatha na.

²⁸ Aonu kaisei mae ka mae soldia igre ne cheke eghu ka mana, “Grofo igne la faglaꞌe soru ghami ghehati, nu mae kmamu iagho gne lhoti ghami ghehati te ghamu na. Mana neke eni kaisei tabu, neke cheke eghu, ‘Jame ihei te ghamu gognarogne, mana mala lehe!’ ”

²⁹ Aonu mae Jonatan ne cheke eghu, “Kaisei glepo theome keli te eni mae mama igne! Filo si ghotilo! Iara kela rheta fapulo, naugna iara neke ghamu jurukuli!

³⁰ Gognarona tahati uluni armigna Filistia. Nu te keli na tahati jame kafe ghamu unha lepo te dedi tahati ka vido igre, mala tangomana tahati te aknu falehe kmana soldia ka mare na.”

³¹ Ka narane igne, mare ne goigoni ni armigna Filistia funu Mikmas tei posa Aejalon. Nu mare ne thofno babaꞌo fara, naugna mare rofo ne salaꞌui.

³² Aonu mare chari ne tei hata unha teke uludi mare ka magra na. Mare ne falehe sipu nei buluka balu suadi aheva te kadi mare mala ghamu. Nu mare ne theome ofoni u nafnahi te dadara teuna ne ghamu.

³³ Eghuteuna keha naiknore tei ne cheke eghu ka king, “Filo sagho! Mare khibo ranghini Lord, naugna mare ne ghamu nafnahi te au teu dadara tagna na.” Aonu King Sol ne cheke eghu, “Tore! Ghotilo khibo ranghini Lord. Gognarona, ghotilo pili mei kaisei thina biꞌo.”

³⁴ Aonu mana ne cheke eghu ka mare, “Ghotilo tei chekedi mare gnafa mala hata mei agne nodi buluka nei sipu teure. Eghuteuna ghotilo ginauna mala falelehe buluka nei sipu teu are ka thina igne, eghuteuna ghotilo mala jaola ghamu nafnahidi re agne. Theome keli tahati te ghamu nafnahi te au teu dadara tagna na, naugna ka puhi igne, tahati khibo ranghini Lord!” Aonu ka bongi tuana, mare hata ne mei buluka re ne aknu falehe ka vido tuana.

³⁵ Ka puhi igne King Sol ne eni kaisei nogna olta Lord ka vido tuana.

³⁶ Eghuteuna mana ne cheke eghu ka nogna soldia re, “Bongi na tahati ginauna soru magra ka armigna Filistia ghilei hamerane. Tahati ginauna aknu falehedi, nei mala hata fahui nodi gobigna lepo mare are.” Eghuteuna mare ne cheke eghu, “Keliu kolho. Tahati ginauna eni unha te doglo ka gaoghathomu iagho na.” Nu Pris Ahaeja ne cheke eghu, “Ginau, tahati na kulu hironighu ka God.”

³⁷ Aonu king ne toreni mae pris mala ghusna eghu ka God, “Ba, keliu ngala te tei ghehati te magra ka armi gna Filistia na? Jame te tei ghehati na, iagho ginauna tangomana te togho ghami ghehati te mala uluni magra igne na?” Nu God ne theome cheke tughu ka mana ka vido tuana.

³⁸ Aonu king ne cheke eghu ka hatimare mae komanda, “Mei agne ghotilo, mala hironi unha teke eni fadiꞌa tahati ginei na.

³⁹ Iara cheke tutuani ka nanghagna Lord, mae ihei te karha nei togho ghita mala uluni tahati magra na, iara nhaꞌa cheke ke ulumi ghotilo, mae ihei te eni glepo te diꞌa igne, mana mala lehe. Neubane thugu iara mae Jonatan, ba mae ihei, mana mala lehe!” Nu mare te gnafa na ne theome ghagri kaisei cheke.

⁴⁰ Aonu mana ne cheke eghu ka mae soldia di Israel re, “Ghotilo kafe tei kegra delei, eghuteuna ghepa mae Jonatan ginauna kegrau agne.” Mare ne cheke eghu, “Keliu kolho.”

⁴¹ Eghuteuna mae Sol tarai ne cheke eghu, “Iagho nodi Lord God mae Israel, iagho cheke tughu fadoglo mei ka iara.” Eghuteuna cheke tughu te mei na, king ghe mae Jonatan te eni na glepo igne, nu mae soldia gre mare doglou kolho.

⁴² Eghuteuna mae Sol ne cheke eghu ka mae pris, “Iagho hironi mae ihei ka ghepa te eni glepo te diꞌa igne.” Eghuteuna Lord ne falaseni mae Jonatan.

⁴³ Aonu king ne ghusna eghu ka mae Jonatan, “Unha teke eni iagho na?” Eghuteuna mana ne cheke eghu, “Iara neke jaꞌi lao khodo na neke ghamu katha jurukuli kolho. Iara na au agne mala lehe.”

⁴⁴ Aonu king ne cheke eghu ka mana, “Tuani Jonatan, iagho mala lehe! Jame te theome lehe iagho na, iara toreni Lord mala falehe ghau iara!”

⁴⁵ Nu mae soldia gre ne cheke faheta eghu ka mae Sol, “Sei! Mae Jonatan gne neke togho ghita neke uluni tahati magra ginei ia! Faꞌunha lehe si mana gnea? Ghehati thofno cheke kate tutuani ka nanghagna Lord mae ihei te karha te tifa, eigna theome tangomana kaisei naikno nate faleheni mana na. Neuba kaisei khakla ikoi ka phaꞌu gna mana na, theome tangomana kaisei naikno nate rathu koko na. Glepo teke eni mana ginei ia, God neke toghoni mana.” Ka cheke igre, mae soldia gre ne fakarhini mae Jonatan.

⁴⁶ Ke leghugna igne, King Sol neke theome ngolhidi mae soldia di Filistia. Nu mare neke pulo ka namonodi thedire.

King Sol balu tharaknagna

⁴⁷ Keha narane ke leghugna te kegra king gna Israel mae Sol igre, leuleghu fata na mae Sol tei magra koba ka nogna naoka te au ka vido te gnafa faligohoni Israel. Ka maedi Moab, maedi Amon, maedi Idom, ka mae king di Soba, nei ka maedi Filistia. Eghuteuna leuleghu fata na mana tei magra ka mare neke thofno goigonidi fara mare.

⁴⁸ Leuleghu fata na mana tei magra heta fara neke theome tangomana te mhaghu na. Mana neke tei magra ka maedi Amalek neke uludi mare. Aonu mana neke fanogradi mae naoka re mala theome mei magra ka naiknodi Israel.

⁴⁹ Thugna mae Sol re igre, mae Jonatan, mae Isvi nei mae Malkisua. Eghuteuna phei thugna gaꞌase mana re neke, Merab, ghe Mikal.

⁵⁰ Khetogna mae Sol na, Ahinoam, thugna mae Ahimas. Eghuteuna mae komanda ka nogna armi mana na, mae Abna, thugna mae Na. Mae Na gne nebugna mae Sol.

⁵¹ Kmagna mae King Sol na, mae Kis. Eghuteuna kmadi mae Kis ghe mae Na igre, neke mae Abiel.

⁵² Leuleghu fata ka nakarhagna King Sol na, mana lase magra heta fara ka naiknodi Filistia. Eghume kate filoni mana kaisei mae te nheta nei theome mhaghu teuna, mana hata mei mala loku fodu ka nogna soldia re.