Ululahu Samuel 13 - Buka Blahi Ka Cheke Holo

Sol neke magra ka maedi Filistia

¹ Ka narane te king gna Israel mae Sol igre, mana la mae biꞌohi. Eghuteuna mana neke king Israel nabagna phei finogha,

² eghuteuna mana neke vavahi thilo thogha mae ka nogna armi na, eghuteuna mana neke kuru fapulodi kehare ka namono. Mana neke vavahi phei thogha soldia kolho te mala au balugna ka namono Mikmas, nei ka thogele Betel, eghuteuna kuru tei kaisei thogha soldia balugna mae Jonatan, mae thugna na Gibea ka nohi Benjamin.

³ Ke leghugna igne, mae Jonatan hata soldia balugna ne tei aknu falehe soldia di Filistia teke au ka namono Gibea. Aonu nonomho eigna igne ne tei posa ka naikno di Filistia. Aonu King Sol ne kurudi hatimare mae soldia mala tei kufli ka vido te gnafa Israel, mala kilo meidi mae te gnafa te au ka vido igre tarabana mala magra.

⁴ Aonu mae soldia igre ne toutonu eigna mae Sol balugna nogna armi na teke aknu falehe armi gna Filistia teke au teku ka namono Gibea. Eghuteuna mare jaola neke toutonu eidi naiknodi Filistia te theome magnahaghedi naiknodi Israel gre. Eghuteuna mare chekeni te maedi Filistia gre mala leghuni nogna cheke King Sol na mala mei loku fodu ka namono Gilgal.

⁵ Aonu mae soldia di Filistia igre ne kafe mei mala magra ka naiknodi Israel. Mare au thilo thogha chariot mala magra, eghuteuna namno thogha soldia mala chari ka hose, eghuteuna keha mae soldia langau eghu, mare kmana fara jateula nusu ka gratha ra eghu. Mare tei ne au ka namono Mikmas ke maghati Bet-Aven.

⁶ Aonu mare ne magra ka armi gna Israel. Eghuteuna kate haimini armigna Israel gne nate faꞌiho fara na, mare ne kafe rikha. Mare tei ne poru ke lamna gluma, nei ke lamna soro, ka thina biꞌo, ke lamna khora nei ke lamna khora seu.

⁷ Kehare rikha ne tei kasa ka Khoꞌu biꞌo Jordan mala tei ka nohi Gad, ghe Gilead. King Sol au neu ka namono Gilgal, eghuteuna mae soldia te au teu balugna mana igre ne mhaghu nodi ne fififri fara.

Mae Samuel neke cheke faheta ka King Sol naugna mana ne theome leghuniLord

⁸ Mana ofoni mae Profet Samuel nabagna fitu narane, mala eni unha teke nhaꞌa chekeni mana na, nu mana ne theome mei. Aonu mae soldia re ne funu rikhani mana.

⁹ Eghuteuna mae Sol ne cheke eghu ka mare, “Ghotilo hata mei sipu te thofno knoro ra mala fafara, fagaglana gna te au fakeli tahati balugna Lord.” Aonu mae Sol ne gahu fafara igne ne ghilei krono fara,

¹⁰ eghuteuna theome raugha ke leghugna igne, mae Samuel ne posa mei. Aonu mae Sol tei ne kubae ka mana,

¹¹ nu mae Samuel ne cheke eghu ka mae Sol, “Naugna unha sagho te eni glepo ignea?” Mae Sol ne cheke eghu ka mana, “Iara la filodi mae soldia gre la funu rikha ghau iara, eghuteuna iagho theome mei ka narane teke nhaꞌa chekeni iagho ia. Eghuteuna mae soldia di Filistia gre la haghe auhi ka namono Mikmas.

¹² Eghuteuna te ghathoni iara na, mare na theome raugha mei magra ka iara agne. Eghuteuna naugna iara na theome eni kaisei glepo te mala keli tagna Lord ka iara na, iara na tusu lao fafara te thono knoro fara igne.”

¹³ Nu mae Samuel ne cheke eghu ka King Sol, “Ne faꞌunha site fagoigoli iagho gnea? Lord na nou God iagho, nu iagho ne theome leghuni nogna cheke mana na neu. Jame leghuni iagho nogna cheke mana na meuna, mana ginauna tangomana te fablahini tharaknamu iagho na mala king fabrahu.

¹⁴ Nu naugna te theome leghuni iagho nogna cheke Lord na, mae ka tharaknamu iagho re ginauna na theome tangomana te king ke leghumu iagho na. Eghuteuna Lord ginauna hironi mae ihei te kaisei gaoghatho balugna mana na.”

¹⁵ Aonu, mae Samuel ne jifla Gilgal. Ke leghu, mae Sol neke figri Geba ka nohi Benjamin. Eghuteuna mae soldia gna namono Gilgal igre ne kafe tei balugna mana. Eghuteuna kate filo mana ka nogna soldia gre na, mana laseni te namno gobi soldia kolho te au na.

Armigna Israel theome au naba glepo mala magra

¹⁶ King Sol ghe Jonatan, nei nodi soldia re eghu au neu Geba. Nu soldia di Filistia gre mare au Mikmas theome khaba kolho Geba.

¹⁷ Aonu mae soldia di Filistia igre ne tufa ka thilo tothoghei. Thilo tothoghei igre ne tei tongana ka vido te gnafa ne goigoni nodi gobigna lepo naiknodi Israel. Kaisei tothoghei ne tei leghuni nabrou te tei thoke Ofra ka nohi ke raru Sual.

¹⁸ Eghuteuna keha tothoghei na ne leghuni ne tei nabrou ke mosu Bet-Horon. Eghuteuna fatilo tothoghei na ne tei ka thogele aheva mare tangomana te filo soru ka glogu Seboim ke maghati namono nagou.

¹⁹ Ka narane tuare, maedi Filistia gre theome snakreni kaisei maegna Israel te lase horo gobigna lepo ka aean. Mare eni igne glahu horo naflahi ba jata eghu mala magra mare.

²⁰ Naugna leuleghu fata na naiknodi Israel gre soru koba Filistia mala fafnonu thua nafnata glepo ka aean, glepo te jateula aean plao, glepo te korho buluka te mala dokha glose, nei hou, nei nhirama, nei nodi naflahi thagho.

²¹ Maedi Filistia gre tugha haghe fara kligna praes di gloku te mala fafnonu nhirama, ba fakelidi aean te mala charidi buluka, ba te mala fafnonu naflahi biꞌo, ba te mala fafnonu hou.

²² Naugna ka puhi igre te theo nodi naflahi nei jata eghu te mala magra mae Israel gre. Mae Sol ghe mae Jonatan kolho te au nodi glepo mala magra na.

Jonatan ne uludi nogna naoka re

²³ Aonu kaisei nodi tothoghei soldia mae Filistia gre ne tugha tei ka vido aheva nabrou te tei farihotei thogele di Mikmas.