Ululahu Samuel 12 - Buka Blahi Ka Cheke Holo

Mae Profet Samuel ne chekeni nogna cheke leghu lahu na

¹ Aonu Profet Samuel ne cheke eghu ka naiknore, “Gognarona, iara la fablahi nihi nomi king ghotilo ia leghuni unha teke toreni ghotilo ka iara ia.

² Eghuteuna gognarona, mana au balumi ghotilo mala batu ghami ghotilo. Nu ghotilo laseni! Iara la kuekuꞌehi. Khaklagu re la nufahi, eghuteuna phei mae thugu re la mae biꞌohi. Iara batu ghami ghotilo funu mae majaghanigu la ghilei mei posa ka narane gognarogne.

³ Iara kegra haghe balumi ghotilo gognarona, eghume jame teke eni iara kaisei glepo te theome doglo ka gaoghathomi ghotilo na, ghotilo cheke mei ka iara ke ulugna Lord, nei ke ulugna king mae ihei teke vahini mana. Jame teke blau iara kaisei nogna buluka ihei na, ba kaisei nogna dongki ihei na, ba chaghini ihei mala blau keha nogna glepo mana re teku na, ba goigonini ihei, ba hata seleni ka ihei mala poruni nogna najafra mana re teku na, te keli na ghotilo cheke fajifladi mala fadoglidi iara. Jame teke eni iara kaisei glepo jateula igre teku na, iara ginauna nake tusu fapulo glepo teke hata iara re.”

⁴ Aonu naiknore ne cheke eghu, “Theo, iagho neke theome chaghi ghami, neke theome goigoni ghami, nei neke theome hata kaisei glepo ka ghehati neku.”

⁵ Aonu, mae Samuel ne cheke eghu, “Lord balugna king teke vavahi mana igne, phiamare la nomhidihi nomi cheke ghotilo re gognarogne, eigna ghotilo chekeni teke theome eni iara kaisei najafra na.” Eghuteuna mare ne cheke eghu, “Uve, Lord ngala te laseni na.”

⁶ Mae Samuel ne cheke eghu, “Eigna Lord ngala teke vahidi mae Moses ghe mae Eron teke batu fajifladi kuꞌeda tahati Ijep tifa ra.”

⁷ Gognarona, tahati kegra ke ulugna mana, eghuteuna iara magnahaghei ghita tahati te mala ghatho fakelidi gloku biꞌo teke fakarhi ghita, funu ka narane di kuꞌeda tifa ra te ghilei mei posa ka narane gognarogne.

⁸ “Tifa na, kuꞌeda Jekop balu tharaknagna neke tei au Ijep. Ke leghu na, naikno di Ijep re neke fakokhoana di kuꞌeda teke karha mei ka tharaknagna mana ra. Aonu mare neke tanhi lao ka Lord mala toghodi, eghuteuna mana neke kurudi mae Moses ghe mae Eron mala tei hata fajifladi Ijep. Phiamare batudi mare neke ghilei mei au ka namono igne.

⁹ “Nu neuba ngau, mare neke theome ghathoni nodi Lord God na. Aonu mana neke snakreni king gna Moab balu nogna armi na mala magra nei uludi eghu mare. Ke leghu na, mana neke snakreni Sisera balu armi gna Haso na mala mei magra ka mare. Eghuteuna ke leghu na, mana neke snakreni armi gna Filistia na mala uludi mare.

¹⁰ Ka narane tuare kuꞌeda tahati tura neke tanhi ka Lord mala toghodi, mare neke tarai eghu, ‘Lord, ghehati la theome leghu nigho nei la tei koko nigho eghu! Eghuteuna ghehati tarai ka mumujudi phei god, Baal ghe Astarot. Lord, fakarhi ghami nei hata fajifla ghami eghu ka nodi nolaghi nomi naoka gre, mala ke tufru soru nigho ghehati.’

¹¹ Aonu Lord neke kurudi mae Gidion ghe mae Bedan, eghuteuna leghu lahu na mana neke kuru ghau iara. Tuana teke eni mana teke hata fajifla ghami ghotilo ka nodi nolaghi noda naoka ra, naugna igne te au fakelini tahati agne na.

¹² “Nu kate filoni ghotilo King Nahas gna Amon te namo mei magra baluda tahati na, ghotilo neke theome magnahagheni Lord te mala noda king tahati na, aonu ghotilo neke cheke eghu ka iara, ‘Ghehati magnahaghei kaisei king mala funei fruni ghami.’

¹³ Eghume, igne mae king teke magnahagheni ghotilo na. Ghotilo neke tanhi nomi king, eghuteuna Lord na la vahinihi mana te mala nomi king ghotilo na.

¹⁴ Eghuteuna gobigna lepo igre ginauna keliu kolho eghu jame te edi ghotilo glepo re: ghotilo ghatho tahuni noda Lord God, eghuteuna ghotilo edi nogna gloku mana re, eghuteuna ghotilo mala fanomho ka mana, eghuteuna ghotilo mala thosei thodoni nogna cheke mana na, eghuteuna nomi king ghotilo igne mala jaola leghuni fabrahu mana.

¹⁵ Nu jame te theome leghuni ghotilo Lord te figri tagruni nogna cheke mana na, mana ginauna figri tagru ghami ghotilo jateula teke figri tagrudi mana kuꞌemi ghotilo tifa ra eghu.

¹⁶ “Ghotilo ginauna filodi glepo biꞌo nate edi mana ka ghotilo re.

¹⁷ Ghotilo laseni, narane mala ukli wit ka nagare na, eghuteuna jame te nakhete na, ginauna na goigonidi gano re. Neubane eghu ngau, iara ginauna tarai ka Lord mala kuru mei fila nei nakhete eghu mana. Eghuteuna kate thoke mei phei glepo igre na, ghotilo ginauna filo glani teke eni ghotilo kaisei glepo te diꞌa ka tathagna Lord na kani teke toreni ghotilo kaisei king ia.”

¹⁸ Aonu mana ne tarai ka Lord, eghuteuna ka narane tuanala, Lord ne kuru mei fila balu nakhete, eghuteuna naiknore ne mhaghu nodi fara ka Lord ghe mae Samuel.

¹⁹ Mare ne cheke eghu ka mana, “Iagho tarai ka Lord nou God mala theome lehe ghehati. Gognarona ghehati laseni teke edi ghehati kmana glepo te diꞌa ra nu te diꞌa fara na teke toreni ghehati kaisei king ia.”

²⁰ Aonu mae Samuel ne cheke eghu ka mare, “Ghotilo thosei mhaghu! Tutuaniu teke eni ghotilo glepo te diꞌa igne na. Nu gognarona, ghotilo mala thosei tei kokoni Lord, eghuteuna ghotilo mala leghuni mana ka gaoghathomi fateote'o.

²¹ Ghotilo thosei tufru soru ka mumujudi god te chaichaghi are. Naugna god tuare theo nafudi kolho! Eghuteuna reꞌe theome tangomana te togho ghami nei fakarhi ghami teu ghotilo na!

²² Lord na magnahagheidi naiknore te ghatho tahuni nanghagna mana na, naugna igne te theome tei koko ghami mana na, eghuteuna mana neke vahi ghami ghotilo mala nogna naikno mana.

²³ Eghuteuna te iara na, iara ginauna tarai fabrahu ghami ghotilo. Jame te theome eni iara igne na, iara khibo ranghini Lord. Leuleghu fata na, iara ginauna farirhiu ghami ghotilo ka puhi te keli nei doglo eghu.

²⁴ Ghotilo mala ghaoghatho heta fabrahu mala faꞌuveni, nei leghuni eghu Lord ka gaoghathomi fateote'o. Eghuteuna leuleghu fata na, ghotilo mala ghatho tahudi u gloku biꞌo teke edihi mana ka ghotilo ra.

²⁵ Nu jame te edi fabrahu ghotilo glepo te diꞌa re, mana ginauna goigoni ghami ghotilo fara balugna nomi king gne.”