Ululahu Samuel 11 - Buka Blahi Ka Cheke Holo

King Sol magra ne uluni king gna Amon

¹ Ka narane tuana, King Nahas gna kantri Amon ne haghe balu nogna soldia ka nohi Gilead, aonu mare mei ne kegra faligohoni namono Jabes tarabana mala magra. Nu naiknogna namono igne ne cheke eghu ka King Nahas, “Ghehati magnahaghei ghita tahati te eni kaisei nhaꞌa cheke gognarogne, jame te theome mei ghotilo te magra balumi ghehati na, ghehati ginauna snakre ghami ghotilo mala funei fruni ghami ghehati.”

² Nu King Nahas ne cheke eghu, “Keli fara! Iara tangomana te nhaꞌa cheke balumi ghotilo na. Nu kaisei glepo kolho, iara na bilo koko hui tathami ghotilo are mala kafe mamaja nomi ghotilo naiknomi Israel are.”

³ Aonu mae te mala baubatu ka namono igne ne cheke eghu, “Ginau ofoghu nabagna fitu narane, eghuteuna iagho na snakre ghami ghehati mala kuru teidi ghehati keha mae mala tei toutonu tafri mare nonomho igne heva heva agne Israel. Jame te theo kaisei mae te mala togho ghami ghehati na, ghehati ginauna leghuni nou cheke iagho na.”

⁴ Aonu mare tei ne toutonu nonomho igne Gibea, ka namono aheva te au teu mae Sol. Kate nomhini igne, naiknore ne diꞌanagnafadi fara ne tanhi fabiꞌo.

⁵ Ka narane igne, mae Sol neke pulo mei funugna ka nogna nagare na baludi nogna buluka re, kate nomhidi te tanhi naiknore, mana ne ghusna eghu, “Naugna unha site tanhi ghotilo gnea?” Aonu mare ne toutonu ka mana eigna nonomho teke mei toutonu maedi Jabes igre.

⁶ Eghuteuna kate nomhini mana igne, Tharunga gna God na ne mei faheta fara ka mana ne diꞌatagna fara.

⁷ Aonu mana ne hata phei buluka ne vaevahe faꞌikodi. Gnafa teuna, mana ne tusu lao ka nogna mae glokure ne hata ne tei tufa ka vido te gnafa ka kantri igne, ne cheke eghu, “Mae ihei te theome tei ka magra baludi King Sol ghe Profet Samuel ka armigna Amon na, nogna buluka mana re ginauna nghuja jateula igne eghu.” Kate nomhini naiknore igne, mare ne mhaghu nodi fara, glahu paradi Lord ginauna. Aonu mare te gnafa na ne kafe mei loku fodu.

⁸ Aonu mae Sol ne chekedi naiknore mala kafe tei Besek. Ka narane igne mana hata thilo gobi thogha soldia Israel, eghuteuna tolufulu thogha soldia Juda.

⁹ Aonu mare ne cheke eghu ka maedi Jabes teke hata teke mei nonomho igne, “Ghotilo tei cheke ka nomi naikno ra, nathuꞌu na ghehati ginauna fakarhi ghami ghotilo ame farihotei aublatha nga eghu.” Kate nomhini igne, naiknodi Jabes igre ne thofno kelitadi fara.

¹⁰ Aonu mare ne cheke eghu ka King Nahas balugna nogna armi na, “Ghehati ginauna ari ka ghotilo nathuꞌu, eghuteuna ghotilo tangomana te eni ka ghehati unha te magnahagheni ghotilo na.”

¹¹ Hamerane boibongi ka keha narane na, King Sol ne tufa nogna soldia re ka thilo tothoghei. Aonu mare kegra haghe hamerane boibongi chari ne tei ka nodi suga tapuale armigna Amon na ne aknu falehe ne gnafa soldia di Amon igre funu hamerane ne ghilei fari hotei aublatha. Jau phei ba thiloi kolho te rikha na.

¹² Aonu naiknore ne cheke eghu ka mae Samuel, “Ahevau mae teke cheke eghu ra, ‘Theome doglo mae Sol te kegra king ka tahati na teku ra?’ Hata mei agne mala aknu falehedi tahati!”

¹³ Nu mae Sol ne cheke eghu, “Theo. Tahati theome tangomana te aknu faleheni kaisei mae ka theda na, naugna Lord neke fakarhidi naiknodi Israel gre ka narane igne.”

¹⁴ Aonu mae Samuel ne cheke eghu ka mare, “Tahati na kafe tei Gilgal, mala chekeni te mae Sol ngala noda king tahati na.”

¹⁵ Aonu mare ne kafe tei Gilgal, eghuteuna mare tei ne kegra ke ulugna Lord ka vido blahi na ne chekeni mae Sol ngala te nodi king mare na. Eghuteuna mare ne eni kaisei fafara ne ghamu fodu, fagaglanagna te au fakeli mare balugna Lord. Eghuteuna ka narane igne, King Sol nei naikno te gnafa Israel igre eghu ne eni kaisei gaghamu biꞌo, mare ghamu ne glealeꞌa fara.