Ululahu Samuel 10 - Buka Blahi Ka Cheke Holo

¹ Aonu mana ne hata kaisei botol oliv oel ikoi ne tofa ka phaꞌugna mae Sol, gnafa teuna mae Samuel ne gnanghoni mae Sol ne cheke eghu ka mana, “Lord neke vahi nigho iagho mala king nei mala batudi naiknodi Israel.

² Kate jifla iagho agne gognarogne, iagho ginauna tei ka nohi Benjamin, eghuteuna iagho ginauna thafodi phei mae Selsa rhegna bekugna Resel tifa ia. Phiamare ginauna cheke eghu ka iagho, ‘Dongki ra kela filodihi mare. Nu mae kmamu iagho na nanga nogna fara ka ghopa, eghuteuna thono ghathoni fara eigna te mala teke thafo ghami ghopa na.’

³ “Eghuteuna kate jifla iagho ka vido igne te tei thoke Tekoa ka gaju blahi na, iagho na filoni kaisei fagaglana. Eghuteuna iagho ginauna thafodi thilo mae te tei fafara God Betel. Kaisei mae na korho thilo sua nanigot, keha mae na hata thilo bret blahi balugna, eghuteuna fatilo mae na pala kaisei duku guli nanigot te fodu ka waen.

⁴ Thilo mae igre ginauna cheke fakeli nigho iagho, eghuteuna kaisei mae ka thilo mae igre ginauna tufa phei bret blahi ka iagho. Eghuteuna iagho na hata bret igre.

⁵ “Eghuteuna ke leghugna igne, iagho ginauna tei posa Gibea rhegna vido blahi aheva te au teu tagna mae soldia di Filistia. Kate tei namo ka namono tuana, iagho ginauna thafoni kaisei tothoghei profet te mei funudi ka vido blahi holo ka thogele ro. Keha mae lalahu ka thua nafnata gita, nei lalahu ka belo ikodi, nei ifu ka phoposa, mae igre ginauna tei ke uludi hatimare mae profet. Eghuteuna Tharunga gna God na ginauna mei mala batudi mae profet igre, eghuteuna mare ginauna ragi nei koje eghu mala kilo fnaknoni God.

⁶ Eghuteuna Tharunga gna Lord na ginauna mei sagheleghu nigho iagho, eghuteuna iagho ginauna jaola tei baludi mare mala ragi nei koje eghu mala kilo fnaknoni God.

⁷ Kate thoke nigho iagho glepo igre, iagho ginauna tangomana te edi unha teke ghathodi iagho re naugna Lord na au balumu iagho.

⁸ “Eghuteuna iagho ginauna mala tei ofo ghau iara Gilgal. Iagho mala ofo fitu narane ghilei mei iara jare. Aonu iara ngala nate tusu ranghini Lord u fafara te thofno krono fara na, fafara igne mala laseni te au tahati kau pharikeli balugna Lord. Eghuteuna ka narane igne, iara ginauna cheke ranghi nigho iagho gobigna lepo nate edi iagho ginau re.”

Sol neke figri ka namono

⁹ Kate jifla mae Sol te tei kokoni mae Samuel na, God ne tughu puhigna mae Sol na mala nhogri mana. Eghuteuna gobigna lepo te chekedi mae Samuel ka mae Sol igre, mana ne filodi ka narane igne.

¹⁰ Kate posa Gibea mae Sol ghe nogna mae gloku na, kaisei tothoghei profet ne mei thafoni mae Sol. Aonu Tharunga gna God na ne mei ka mae Sol, eghuteuna mae Sol ne tei baludi mae profet igre, mare ne ragi balu koje mala kilo fnaknoni God.

¹¹ Nu kate filoni mae iheire te laseni mae Sol unha te edi mana igre, mare ne cheke eghu, “Ei! Thugna mae Kis ia si ignea? Ba? Mae Sol gne kaisei mae profet langau signea?”

¹² Aonu kaisei mae ka namono igne ne cheke eghu, “Iheire si kmadi re mae profet igrea?” Naugna kate filodi unha te edi mae Sol igre, cheke igne ne cheke eghu, “Ba? Mae Sol gne kaisei mae profet langau signea?”

¹³ Eghuteuna kate gnafa ragi nei koje teuna, mae Sol ne tei ka vido blahi ka thogele na.

¹⁴ Ke leghugna igne, nebugna mae Sol na ne filoni mana balugna nogna mae gloku na, eghuteuna mana ne ghusna eghu ka phiamare, “Ghopa neke mei funu aheva sia?” Eghuteuna mae Sol ne cheke eghu, “Ghepa neke tei hirodi dongki teke dofidi ra, nu kate dofi nomidi re, ghepa neke tei filoni mae Samuel.”

¹⁵ Aonu nebugna mae Sol igne ne cheke eghu, “Unha te ckekeni mae Samuel ka ghopa na?”

¹⁶ Eghuteuna mae Sol ne cheke eghu, “Te chekeni mana ka ghepa na, mare kela filodihi dongki re.” Nu mae Sol neke theome chekeni ka mae nebugna na unha teke chekeni mae Profet Samuel nate king mana ginauna.

Mae Sol ne king

¹⁷ Ke leghugna igne, mae Samuel ne kilodi naiknodi Israel re mala haghe Mispa mala nomhini mare chekegna Lord na.

¹⁸ Mae Samuel ne cheke eghu ka mare, “Lord noda God tahati maeda Israel, mana ne cheke eghu: kani au teku kuꞌemi ghotilo Ijep tifa ra, iara neke fakarhidi mare. Iara neke atha fajifladi mare ka nodi nolaghi naiknodi Ijep, nei ka nodi nolaghi keha naikno teke jaola teke gonidi mare ra.

¹⁹ Iara nomi God ghotilo eigna iara neke fakarhi ghami ka puhi biꞌo nei ka narane te ninhigrana. Nu gognarona, ghotilo theome magnahaghei ghau iara, eghuteuna ghotilo magnahagheni fara kaisei king. Eghume, ghotilo mala fofota vikemi nei tharaknami teu gre mala mei ka iara, mala vahini iara nomi king ghotilo na.”

²⁰ Mae Samuel ne cheke ka nabotho phei vike igre mala mei namo. Aonu Lord ne vahini vikegna mae Benjamin.

²¹ Eghuteuna mana ne chekedi tharakna ka vike igne mala mei. Eghuteuna Lord ne vahini tharaknagna mae Matri. Eghuteuna mae te gnafa ka tharakna igne ne kafe mei. Aonu Lord ne vahini mae Sol, thugna mae Kis. Nu kate hironi mana teu mare na, mare ne theome tangomana te filoni mana na.

²² Aonu mare ne tarai eghu ka Lord, “Lord, au aheva si mana gnea?” Eghuteuna Lord ne falalase ne cheke eghu, “Mae Sol na tei poru delei, ka nomi glepo ghotilo ra.”

²³ Aonu mare chari ne tei mala hata meini mana. Eghuteuna mare ne fakegrani mana ke uludi mare. Eghuteuna mae Sol gne kaisei mae brahu fara, eghuteuna phaꞌugna na haghe salaꞌudi phaꞌudi keha mae re.

²⁴ Eghuteuna mae Samuel ne cheke eghu, “Igne mae ihei teke vavahi Lord na! Theo kaisei mae ka tahati te jateula mana teuna.” Eghuteuna naiknore ne thagru eghu fabiꞌo, “Iagho king fabrahu tifa tifa!”

²⁵ Aonu mae Samuel ne chekedi ka naiknore nogna gloku ba unha te au nogna nolaghi mana te mala edi kate king mana na. Eghuteuna mana ne rioriso soru ka buka glepo igre. Gnafa teuna mana ne lilisei fakeli buka igne ka nogna Sugablahi Lord na. Eghuteuna mana neke kuru fapulodi naiknore ka namonodi re.

²⁶ Eghuteuna King Sol neke figri Gibea, eghuteuna keha mae nheta mala magra langau eghu ne tei balugna mana, naugna God magnahaghedi naiknore te ghatho tahuni King Sol.

²⁷ Nu keha mae te diꞌa ne cheke eghu, “Tore! Na tangomanani ngau si mae igne nate fakarhi ghita tahati naia?” Eghuteuna mare ne tirodi tusu lao namha ka mana, naugna mare ne theome magnahagheni mana. Nu King Sol ne au kmu kolho.