Ululahu Samuel 1 - Buka Blahi Ka Cheke Holo

Karha gna Samuel

¹ Kaisei mae nanghagna na Elikana, mana au ka namono biꞌo Rama ka thogele Efrem. Kmagna na mae Jeroham gragna mae Elihu. Mare karha mei ke leghugna gna mae Tohu, ka vike gna mae Sufu jare Efrata.

² Mae Elikana gne au phei khetogna, Hana ghe Penina. Penina gne au thugna, nu Hana gne theo thugna.

³ Leuleghu finogha na, mae Elikana gne tei koba Saelo mala fafara nei tarai eghu ka Lord mae ihei te au nolaghi fateote'o. Ka namono biꞌo igne te au phei thugna mae pris Eli re, mae Hofni ghe mae Finehas, phei mae igre nogna pris Lord.

⁴ Leuleghu fata mae Elikana eni fafara, eghuteuna mana tufa koba vido nafnahi ka Penina goro thugna.

⁵ Nu mana namhani fara Hana ne tufa kaisei vido nafnahi biꞌo ka naꞌa, naugna Lord neke theome snakreni naꞌa te mala au thugna na.

⁶ Eghuteuna naugna Lord te theome snakreni Hana te mala au thugna na, leuleghu fata na Penina fadiꞌa nagnafani Hana fabrahu.

⁷ Puhi te diꞌa igne ne eghu fabrahu leuleghu finogha kate tei tarai reꞌe ka nogna Sugablahi Lord na. Leuleghu fata na Penina fadiꞌa nagnafani Hana, naugna igne naꞌa tanhi koba ne theome ghamu.

⁸ Kate laseni mae Elikana puhi igne, mana ne ghusna eghu ka naꞌa, “Hana, ne faꞌunha sagho te diꞌanagnafa, tanhi nei tirou ghamu teu gnea? Iara gne khetomu iagho, iara thofno keli fara ka iagho salaꞌuni te au iagho nabotho sua na!”

Hana ne tarai mala au thugna

^9-10 Kaisei narane, kate ghafa mare gaghamu fafara ka nogna Sugablahi Lord Saelo na. Hana kegra haghe ne tarai balu tanhi ka Lord, naugna naꞌa ne thofno diꞌa nagnafagna fara. Ka narane tuana, mae pris Eli gnokro neu rhegna grengatha gna Sugablahi na.

¹¹ Hana ne eni kaisei naꞌa cheke ne cheke eghu, “Lord iagho mae ihei te au nolaghi fateote'o. Kokhoni ghau iara. Filo meini puhi biꞌo te au ka iara igne. Ghatho mei ghau, those ghatho koko ghau! Jame te tusu mei iagho kaisei sua ka iara na, iara nhaꞌa cheke, iara ginauna nake tusu fapulo ka lagho, mala nou mae gloku iagho ka nakarha gna fateo na. Eghuteuna mala laseni naiknore mae igne mala nou mae gloku iagho, eghuteuna mare ginauna theome kuchi khaklagna na.”

¹² Hana tharai heta fabrahu ka Lord, eghuteuna mae Eli ne filo tutu ka phepeo gna naꞌa na.

¹³ Naꞌa ne tarai kmu ne theome tarai fabiꞌo, eghuteuna mae Eli ne dranga Hana eghu,

¹⁴ aonu mae Eli ne cheke eghu, “Ei! Those dranga agne mala fahaehaghe nigho themu! Iara theome magnahaghei nigho iagho te koꞌu te dranga na, kegra haghe!”

¹⁵ Nu naꞌa ne cheke eghu, “Mae biꞌo, iara theome dranga. Iara theome ko'u waen ba beer. Iara diꞌa nagnafagu fara, eghume iara tarai ka Lord. Iara cheke fajifladi unha te fadiꞌa nagnafa ghau gne.

¹⁶ Those ghathoni iagho ne kaisei naikno diꞌa iara teuna. Iara tarai naugna iara gne thofno diꞌa nagnafagu fara.”

¹⁷ Aonu mae Eli ne cheke eghu ka Hana, “Iara toreni noda God tahati maeda Israel mala tusu ranghi nigho unha te toreni iagho na.”

¹⁸ Naꞌa ne cheke eghu, “Iagho thofno keli fara ranghi ghau iara.” Eghuteuna naꞌa glealeꞌa fara jifla ne tei ghamu.

¹⁹ Hamerane boibongi ka keha narane na, mae Elikana nei tharakna gna kegra haghe ne tufru soruni Lord. Gnafa teuna reꞌe neke figri Rama. Eghuteuna mae Elikana ne thuru balugna Hana, eghuteuna Lord ne cheke tughuni nogna tharai Hana na.

²⁰ Eghuteuna Hana ne bukla, eghuteuna naꞌa ne au kaisei thugna nalhaꞌu ne kiloni Samuel, gaoghathogna na “Lord ne nomhini ghau iara.” Naugna naꞌa neke tore ka Lord mala tusu ranghini sua.

Hana neke tusu fapulo thugna na kaLord

²¹ Mae Elikana haghe balu tharakna gna Saelo ne fafara ka Lord jateula te sughu edi koba mare leuleghu finogha ra neu, mala thofno doglo nogna nhaꞌa cheke na.

²² Nu Hana ne theome tei baludi ne cheke eghu ka khetogna na, “Kate biꞌo sua na iara ginauna hata tei mala au fabrahu mana ka Suga gna Lord na.”

²³ Mae Elikana ne cheke eghu, “Keliu kolho, leghuni unha te doglo ka gaoghathomu iagho na, au agne ghilei biꞌo sua na. Lord ginauna loku famaku ka nogna nhaꞌa cheke na mala horoghoto ka iagho.” Aonu Hana au neu Rama ne tajini neu thugna na.

²⁴ Kate biꞌohi sua na, Hana hata ne tei thugna na Saelo ka sugagna Lord, naꞌa hata kaisei sua buluka nalhaꞌugna te thilo finogha gna, katha kilo flaoa, nei kaisei botol waen.

²⁵ Kate fafara te gnafa mare buluka nalhaꞌu igne, mare hata ne tei mae sua igne ka mae Eli.

²⁶ Hana ne cheke eghu ka mana, “Mae biꞌo, iagho filo glani ghau ngau iara ba theo? Iara ngala gaꞌase teke filoni iagho teke kegra teke tarai ka Lord Saelo ia.

²⁷ Iara neke toreni ka Lord sua igne, eghuteuna mana neke tusu mei unha teke toreni iara na.

²⁸ Eghume, iara ginauna lisa lao sua igne ka khame gna Lord. Ka nakarhagna fateote'o na, mana ginauna mala nogna Lord fabrahu.” Eghuteuna mare ne pogho soru ne kilo fnaknoni Lord Saelo.