Ululahu Pita 4 - Buka Blahi Ka Cheke Holo

Tahati mala leghuni God

¹ Kani au teku ka nauthoglu igne, mae Kraes neke au papara ka thinigna thegna. Ghotilo jame jaola au nafnata gaoghatho te au ka mana igne mala kegra heta. Naugna ihei te au papara na, mana ginauna theome tangomana te leghuni puhigna nakhibo na.

² Eghume kani au teu ghotilo ka nauthoglu igne, ghotilo thosei leghudi glepo te diꞌa te magnahagheni fara thini na. Blahi. Ghotilo leghuni kolho unha te magnahagheni God na.

³ Tifa na ghotilo neke raꞌe salaꞌui fara kate leghuni puhidi naikno te theome fatutuani ni God re, eigna ghotilo neke magnahagheni fara te jafra ka ihei na, ghotilo magnahagheni fara te eni puhi te diꞌa na, ghotilo magnahagheni fara te koꞌu waen na, ghotilo neke eꞌei gaghamu biꞌo mala ghamu nei koꞌu nei edi glepo te thono diꞌa fara re, nei ghotilo edi glepo te jafra fara kate tufru sorudi ghotilo mumujure.

⁴ Nu gognaro na ghotilo theome tangomana te edi nafnata puhi te diꞌa baludi iheire te theome fatutuani ni God ra. Eghuteuna mare jaglo nodi fara ka igne, eghume gognaro na mare chekedi kmana nafnata glepo te diꞌa eimi ghotilo.

⁵ Nu mare ginauna na toutonudi nakarhadi thedire ke ulugna God, mae ihei tarabana teu te mala fatedi naikno te karha nga teu gognaro gre, nei iheire tela lehehira.

⁶ Naugna igne u Nonomho te Keli gne jaola neke toutonu tifa ranghidi naikno tela lehehira. Tutuani fara, kani au teku ka nauthoglu igne, mare neke theome tangomana te fafraini glehe na. Eigna naikno te gnafare mala lehe. Neuba ngau u Nonomho te Keli na neke toutonu ka mare mala tangomana mare te hogri nagnafa na mala karha fabrahu balugna God ginauna.

Fari totoghoi fari themi

⁷ Nu tahati la mei namohi ka narane gobigna lepo ka nauthoglu igne ginauna hui. Eghume te keli na ghotilo ghaoghatho fakeli, nei filo fakeli eghu mala tangomana ghotilo te tarai na.

⁸ Kaisei glepo te mala eni ghotilo te ulu fara ka gobigna lepore na igne, thofno fari namhai. Naugna puhi te fari namhai igne tangomana ghotilo te hata koko fari themi nakhibo te kmanare.

⁹ Snakredi sugamire ka kherami te fatutuani ni Kraes are balu gleale'a.

¹⁰ God neke tusu ari ka ghotilo soasopai khokofakasai te mala edi nogna glokure. Eghume ghotilo loku fakeli ka khokofakasai igre mala fari totoghoi ka kmana nafnata puhi.

¹¹ Ihei ka ghotilo te toutonuni chekegna God na, mana mala toutonuni cheke teke tusu mei God ka mana kolho. Eghuteuna ihei ka ghotilo te toghodi naiknore, mana eni igne ka nanheta teke tusu ranghini God na. Ka nafnata gloku te keli igre, naiknore ginauna kilo fnaknoni God ka nanghagna mae Jisas Kraes. Nafnakno nei nolaghi biꞌo te au balugna God tifa tifa. Amen.

Tahati mala au papara malagna Kraes

¹² Uve kheraguro, thosei nanga nomi ka glepo te para ghami gognaro igre. Glepo igre fariuriudi kolho nomi fatutuani ghotilo re. Uve, glepo te mei ka ghotilo igre theome glepo majaghani.

¹³ Nu ghotilo gleale'a nomi kolho kate au papara ka puhi igne, naugna mae Kraes na jaola neke au papara. Eghuteuna ghotilo ginauna jaola na gleale'a fara kate filoni mae Kraes te thakle mei balu nolaghi nei nafnakno.

¹⁴ Kate cheke fadiꞌa ghami naiknore naugna te leghuni ghotilo mae Kraes na, ghotilo keli tami kolho. Naugna mae Tharunga te Blahi na auhi balumi ghotilo. Mana neke mei funu ka God nei mana au nolaghi biꞌo.

¹⁵ Theome keli kaisei naikno ka ghotilo te au papara eigna falehe naikno, blau, huhughu vetula, ba fadiꞌani nogna gloku ihei.

¹⁶ Nu jame kaisei naikno ka ghotilo au papara naugna mana kaisei mae khiloau, thosei mamaja. Ghotilo kilo fnaknoni God naugna naiknore kilo ghami ghotilo “Nogna naikno Kraes”.

¹⁷ Naugna narane God nate mala fatedi naiknore la fufunuhi. Mana ginauna na kulu fufunu ka nogna naikno thegna re. Te fufunu mana ka tahati na, ginauna thofno ninhigrana ranghidi iheire te theome fatutuani ni u Nonomho te Keli teke mei funu ka God thegna igne.

¹⁸ U grioriso te blahi na cheke eghu, “Naikno te doglore kulu thafodi narane te ninhigrana tulao re ame tangomana nga God te fakarhidire eghu. Eghume naikno te theome leghuni God nei sneka ka nakhibo teure ginauna lehe tutuani fara.”

¹⁹ Naugna igne, naikno te magnahaghedi God te mala au papara tulao eigna nodi gloku te keli ranghidi keha naiknore, snakre lao nakarhadire ka khamegna God. Naugna God neke vuavuhadi, mana theome tangomana te ghatho ihoni nogna nhaꞌa cheke te mala reireghidire.