Ululahu Pita 3 - Buka Blahi Ka Cheke Holo

Puhi eigna tholaghi

¹ Jaola gaꞌase tholaghi ra, mala leghudi khetomire. Tutuani keha mae re theome fatutuaniu ngala chekegna God na. Te keli na puhimi ghotilo re jame te mala korho meidi mala fatutuani mare. Jame te eni ghotilo igne na, ghotilo theome naba te chekeni kaisei glepo ka mare na.

² Nu mare ginauna tangomana te fatutuani ni mae Kraes kate filodi puhimi ghotilo te keli fara re, naugna ghotilo thofno ghatho tahuni God.

³ Eghuteuna theome raꞌe keli te fakekheli kolho thinimi ke kosire te mala kekheliana fifilomi na, jateula ghotilo te flehi khakla ba lilisei keha nafnata glepo teke hohoro ka gol, ba pipichi pohe te keli fara.

⁴ Nu unha te au ke lamna nagnafami ghotilo na tangomana te mala kekheliana fifilogna na. Eghuteuna te kekheliana fifilomi ghotilo na igne theome tangomana teke mala tughu na, naugna mei ka nakarha te au faleghu nei famane muana. Puhi igre thofno kekheliana fifilodire ka tathagna God nei mana ghatho tahudi fara.

⁵ Eigna tifa na, gaꞌase blahi igre neke fatutuani ni God kolho. Eghuteuna rehati neke thofno leghudi khetodire. Ka nafnata puhi igne rehati keli fara kekheliana fifilodire.

⁶ Sera jateula tuana neku neke leghuni mae Ebraham neke kiloni mana mae funei. Jame edi koba ghotilo glepo te keli igre, nei theome mhaghuni kaisei glepo te eni ranghi ghami khetomire teuna, ghotilo ginauna jaola goro thugna Sera.

⁷ Eimi ghotilo mae te tolaghi ra, ghatho tahudi khetomire, naugna rehati theome heta jateula ghotilo eghu. Ghotilo ghatho tahudi reꞌe, naugna God neke tusu ranghidi la reꞌe nogna nhaꞌa cheke na, eigna ka nogna namha biꞌo mana na ginauna tusu ari u thofno nakarha te theo ka huigna ka ghotilo hui. Eghume te keli na ghotilo eni igne mala theome tangomana kaisei glepo te faroredi nomi tharai ghotilo re.

Tahati papara eigna unha te keli

⁸ Leghu lahu na, ghotilo te gnafa na mala kaisei nomi gaoghatho ngala, nei kokhonidi gnafa naiknore. Fari namhai jateula te thabusigna tutuani eghu ngala, nei keli ranghini ihei nei au faleghu ghami themi.

⁹ Jame kaisei mae ei puhi diꞌa ka ghotilo, thosei foli fapulo puhi te diꞌa tuana ka mana. Eghuteuna jame kaisei mae cheke diꞌa ka ghotilo, thosei cheke diꞌa fapulo ka mana. Blahi fara. Nu te keli na, ghotilo tarai ka God mala fablahini mana. Naugna tifa na God neke kilo ghami ghotilo, mana neke nhaꞌa cheke mala fablahi ghami ghotilo.

¹⁰ Eigna te chekeni ka grioriso te blahi na, cheke eghu, “Ihei te magnahagheni nakarha te keli nei magnahaghei gleale'a leghu narane teuna, mana thosei cheke diꞌa nei thosei chekeni kaisei chaichaghi eghu.

¹¹ Mana figri lao tagrugna na ka nakhibo nei mala eni unha te keli. Mana fariuriu mala au ka pharikeli baludi keha naiknore.

¹² Naugna Lord na reireghi fakelidi naikno te doglore. Eghuteuna mana tangomana te fanomho ka nodi tharaire, nu mana figri lao thagrugna na ka naikno te edi puhi te diꞌare.”

¹³ Mae ihei gne naba te fadiꞌa ghami ghotilo jame te magnahaghei eni fabrahu ghotilo glepo te keli na? Theo kaisei naikno.

¹⁴ Nu jame keha naiknore para ghami ghotilo eigna te eni ghotilo unha te doglo na, keli fara, ghotilo keli tami kolho. Eghume ghotilo thosei mhaghudi naikno te para ghami re nei thosei nanga nomi fara eghu ka mare.

¹⁵ Nu te keli na ghotilo lisa lao ghami themi fabrahu ka mae Kraes nomi Lord. Eghuteuna leuleghu fata na ghotilo tarabana mala cheke tughudi naikno te ghusna ghami eigna unha te fatutuani ni ghotilo mae Kraes na.

¹⁶ Nu ghotilo blaknoi famane cheke tughu balu ghaoghatho fakeli. Eghuteuna ghotilo mala doglo nei keli eghu nagnafami fabrahu. Naugna igne, naikno teke cheke fadiꞌa ghami ghotilo eigna unha te leghuni ghotilo mae Kraes na, mare ginauna na mamaja nodi fara.

¹⁷ Jame teke gaoghathogna God te mala au papara tahati eidi glepo te keli teke edi tahati igre na, tuana keli kolho. Nu thono diꞌa fara jame te au papara tahati na naugna te eni tahati unha te theome doglo na.

¹⁸ Naugna mae Kraes te doglo fara ka tathagna God na neke lehe tughudi naikno te diꞌare kaisei fata ngala. Kate au papara na, mana neke hata fadelei ne hui nakhibomi ghotilo re, eghuteuna ke batu fapulo ghami ka God. Tutuani fara, kate au nga teu mana ka nauthoglu gne, naiknore neke faleheni mana, nu God neke fakarha fapuloni mana ka nogna nolaghi mae Tharunga te Blahi.

¹⁹ Ka nogna tothogho mae Tharunga te Blahi mana neke tei toutonu eigna Nonomho te Keli na ka tharungadi naikno te au ka suga sosolo re.

²⁰ Igre tharungadi naikno teke huhughu fara teke ofodi fabrahu teku God ka narane teke horo vaka mae Noa tifa ia. Kehaghu kolho, nhana naikno khaputudire teke fakarhadi God ka khoꞌu na.

²¹ Eghuteuna khoꞌu igne kaisei fagaglana ranghi ghita eigna apublahi. God gognaro na fakarha ghami ghotilo ka khoꞌu naugna mae Jisas Kraes na kela karha fapulohi. Jaola, apublahi gne theome mala tihi koko thona ka thinimi ghotilo re, nu mala eni ghotilo kaisei nhaꞌa cheke ka God ka thofno gaoghatho te tutuani.

²² Mae Jisas Kraes gognaro na gnokrohi kligna fei khame nhetagna God Mama ka sape nafnakno. Mana funei frunidi hatimare mae engel nei nolaghi fateo te au kligna.