Ululahu Pita 2 - Buka Blahi Ka Cheke Holo

Mae Jisas thina karha ka sugagna God

¹ Eghume, thosei nomire eghudi puhi te diꞌare. Thosei chaghidi naiknore. Thosei goghotu ba cheke fadiꞌadi keha naiknore.

² Nu ghotilo mala jateula sua gegeꞌe te karha majaghani te magnahaghei chuꞌu ia eghu kolho. Naugna ghotilo nabami na magnahaghei farirhiu te famane klino nei bligi eghu kolho. Eghuteuna ghotilo ginauna tangomana te kotu haghe ka farirhiu igne nei ginauna hata u thofno nakarha eghu.

³ Eigna ghotilo lasenihi puhigna Lord na, nei lasenihi mana na kaisei mae keli fara.

⁴ Noda Lord Jisas na thina karha. God neke vahini mana mala glepo ulu tulao ka tathagna God na. Neubane eghu ngau, naiknogna nauthoglu igne theome magnahagheni mana. Nu ghotilo mei ka mana.

⁵ Ghotilo jaola jateu thina karha eghu, eghuteuna God ginauna salo fodu ghami jateula nogna Sugablahi eghu ka nogna nolaghi mae Tharunga te Blahi. Ghotilo ginauna jateula nogna mae pris blahi eghu God mala au fodu mala fafara ka God. Mae Tharunga te Blahi ginauna togho ghami ghotilo mala fafara, nei God ginauna keli tagna fara ka fafara igre ka nanghagna mae Jisas Kraes.

⁶ Glepo igre tutuani fara, naugna grioriso te blahi na cheke eghu, “Iara vavahi kaisei thina te keli fara mala fakegra hagheni jateula kaisei thina te ulu tulao ka Sugablahi Jerusalem. Eghuteuna ihei te fatutuani ni mana na, mana ginauna theome mamaja.”

⁷ Thina igne glepo ulu fara ka ghotilo naikno te fatutuani na. Nu ka naikno te theome fatutuani re, grioriso te blahi na cheke eghu, “U thina teke tirodini mae iheire te horo suga na, kela kegra haghe kaisei thina ulu fara ka suga na.”

⁸ Eghuteuna ka keha grioriso te blahi na cheke eghu, “Naiknore ginauna totokhei ka thina igne. Eghuteuna mare ginauna na uka ka thina igne.” Mare uka naugna mare ne theome leghuni unha te chekeni God na. Igne unha te ghathoni God te maladi mare na.

⁹ Nu ghotilo naikno vavahi. Tutuani fara, God neke vahi ghami ghotilo mala nogna vike mana. Ghotilo nogna pris mae King, eghuteuna ghotilo nogna naikno blahi mana. Ghotilo thofno nogna naikno God thegna, neke vahi ghami mala toutonu ranghidi glepo te keli teke edi mana re. Mana neke kilo ghami ghotilo mala jifla mei ka vido te romno na mala ruma lamna nogna famane naphae na.

¹⁰ Tifa na ghotilo neke theome nogna naikno God, eghuteuna God neke theome kokhoni ghami ghotilo. Nu gognaro na ghotilo nogna naikno mana eghuteuna mana kokhoni ghami ghotilo fara.

Au doglo ke ulugna God

¹¹ Uve kheraguro, ghotilo jateula naikno fasigho nei mae phosa eghu ka nauthoglu igne naugna ghotilo theo kaisei namono ka nauthoglu gne te thofno namonomi ghotilo na. Eghume, iara thofno tore ghami ghotilo mala au fadelei ka glepo te diꞌa te magnahaghedi thinimire. Naugna glepo te diꞌa igre magra ka nakarhami ghotilo re.

¹² Gognaro na naikno te theome fatutuani ni God re cheke fadiꞌa ghami ghotilo fabrahu. Eghume puhimi ghotilo re mala keli nei doglo eghu ka tathadi naikno tuare mala tangomana mare te filodi glepo te keli te edi ghotilo re. Te eghu ghotilo na, ka narane ke pulo meigna mae Kraes na mare ginauna kilo fnaknoni God eidi puhimi ghotilo teke cheke fadiꞌadi mare tifa ra.

¹³ Te mala keli tagna noda Lord na, ghotilo leghudi mae biꞌo te gnafa te au nodi nolaghi re te mala funei fruni ghami ghotilo na. Leghuni mae king biꞌo gna Rom mae ihei te kligna lahu ka naikno te gnafare.

¹⁴ Leghudi hatimare mae gavana eigna mae king biꞌo neke vahidi mare. Mana neke kuru teidi mare te mala paradi iheire te huhughuni vetula na, eghuteuna kilo fnaknodi iheire te leghuni puhi te keli na.

¹⁵ Naugna God magnahaghe ghami ghotilo te leghuni koba puhi te doglo na, eghuteuna ghotilo tangomana te fakmudi iheire te cheke fadiꞌa eimi ghotilo. Tutuani fara, mae igre theome laseni u nabrou te doglo na.

¹⁶ Te keli na ghotilo au jateula naikno te snagla nodi fara eghu, na eghunu ne snaglahi eghu ghotilo edi glepo te diꞌare. Theo. Ghotilo mala au jateula nogna mae sneka God eghu sia.

¹⁷ Ghatho tahudi naikno te gnafa nei namhadi kherada te gnafa ka khiloau gne. Thofno ghatho tahuni God ke uludi naikno te gnafare nei jaola ghatho tahuni mae king biꞌo gna Rom.

Mae Kraes falalase ka tahati puhi te mala au papara na

¹⁸ Ghotilo mae gloku ra, leghudi nomi funeire, nei ghatho tahudi eghu. Thofno keli fara te ghatho tahudi ghotilo nomi funeire, neuba mare ne keli fara ranghi ghami ghotilo ba mare tangomana te para ghami ghotilo fara.

¹⁹ Jame te fiti para ghami mare kate theo nafugna na, nu ghathoni God ghotilo me kegra maku teuna, God ginauna na fablahi ghami ghotilo.

²⁰ Nu jame te para ghami mare eigna najafra teke eni ghotilo na, neubane kegra maku ghotilo ka narane tuana, tuana theo nafugna kolho. Nu jame te para ghami mare neubane eidi ngala ghotilo glepo te kelire, eghuteuna kegra heta ghotilo tagna teuna, God ginauna na fablahi ghami ghotilo eigna igne.

²¹ God neke kilo ghamihi mala eni igne, naugna mae Kraes neke papara fara mala fakarha ghami ghotilo. Mana neke falalase ka ghotilo nogna puhi na mala leghuni ghotilo ginau.

²² “Mana neke theome eni kaisei nakhibo, eghuteuna theo kaisei cheke chaichaghi te jifla mei ka foflogna na.”

²³ Eghuteuna kate cheke fadiꞌani na, mana neke theome cheke diꞌa fapulo. Kate parani na, mana theome diꞌatagna. Nu mana rouronu ka God mae ihei tangomana te fate naikno ka puhi te doglo.

²⁴ Kate haghe te mala lehe ka gaju fafatha na, mae Kraes neke pala nakhibodare ka thinigna na. Mana neke eni igne mala tangomana tahati te lilisei ke leghuda puhigna nakhibo na nei tangomana leghuni u puhi te doglo ke ulugna God. Naugna ka nafneragna mana na, mana neke fakeli fapulo ghita.

²⁵ Ghotilo tifa na jateula sipu neku neke tei snivi. Nu gognaro na, ghotilo ke pulo mei mala leghuni God, mae greireghi sipu na, thofno mae te mala reireghini nakarhami ghotilo na.