Ululahu Kronikols 9 - Buka Blahi Ka Cheke Holo

¹ Igre nanghadi hatimare mae Israel te gnafa teke rioriso mare ka buka eidi hatimare mae King di Israel.

Naikno teke pulo mei Jerusalem naiknodi Israel igre sneka neke tei au Babilonia, naugna mare neke theome ghatho tahuni God

² Naikno teke kulu pulo mei teke au ka nodi namono nei nodi vido glose tekure neke hatimare mae pris, hatimare mae Livaet, nei hatimare mae mala loku ka Sugablahi.

³ Kehare ka vikegna mae Juda, kehare ka vikegna mae Benjamin, kehare ka vikegna mae Efrem, nei kehare ka vikegna mae Manase, mare mei ne au Jerusalem.

^4-6 Namno gobi nhevasalei naiknodi Juda neke pulo mei Jerusalem. Mae igre vikedi mae Peres, mae Sela nei mae Sera. Mae igre neke thilo thugna mae Juda. Mae teke funei ka vikegna mae Peres na neke mae Utae. Mae Utae igne thugna mae Amihud. Mae Amihud gne thugna mae Omri. Mae Omri gne thugna mae Imri. Mae Imri gne thugna mae Bani, thugna mae Peres. Eghuteuna mae teke funei ka vikegna mae Sela na, mae teke kulu karha ka mana na, mae Asaea nei thugna mana re. Eghuteuna mae teke funei ka vikegna mae Sera na, neke mae Juel.

^7-9 Nheva gobi glimafulu namno naikno ka vikegna mae Benjamin teke pulo mei Jerusalem. Mae Salu thugna mae Mesulam te baubatudi re. Mae Mesulam gne neke thugna mae Hodavaea, eghuteuna mae Hodavaea gne neke thugna mae Hasenua. Mae funei teke batudi mare na mae Ibnea, mae Ibnea gne neke thugna mae Jeroham. Kaisei mae funei teke batudi mare na mae Ela. Mae Ela gne neke thugna mae Usi, mae Usi gne neke thugna mae Mikri. Kaisei mae funei teke batudi mare na mae Mesulam. Mae Mesulam gne neke thugna mae Sefataea. Mae Sefataea gne neke thugna mae Ruel, eghuteuna mae Ruel gne neke thugna mae Ibnaeja.

Mae Pris teke pulo mei Jerusalem

^10-12 Igre mae pris teke pulo mei Jerusalem: Mae Jedaea, mae Jehoearib, mae Jakin, nei mae Asaraea. Mae Asaraea gne kaisei mae biꞌogna Sugablahi na, mae igne neke thugna mae Hilkaea. Mae Hilkaea gne neke thugna mae Mesulam. Mae Mesulam gne neke thugna mae Sadok. Mae Sadok gne neke thugna mae Meraeot. Mae Meraeot gne neke thugna mae Ahitub. Keha mae pris na mae Adaea. Mae Adaea gne neke thugna mae Jeroham. Mae Jeroham gne neke thugna mae Pasua. Mae Pasua gne neke thugna mae Malkaeja. Keha mae pris na mae Masaea. Mae Masaea gne neke thugna mae Adiel. Mae Adiel gne neke thugna mae Jasera. Mae Jasera gne neke thugna mae Mesulam. Mae Mesulam gne neke thugna mae Mesilemit, mana thugna mae Ima.

¹³ Khaputudi mae pris teke pulo mei re, kaisei thogha fitu gobi namnosalei horoghoto. Mae pris igre teke baubatu ka mare na, eghuteuna mae igre laseni fara te loku ka nogna Sugablahi God na.

Mae Livaet teke pulo mei Jerusalem

¹⁴ Mae Livae teke pulo mei Jerusalem re igre: Mae Semaea thugna mae Hasub. Mae Hasub gne neke thugna mae Asrikam. Mae Asrikam gne neke thugna mae Hasabaea ka vikegna mae Merari.

¹⁵ Eghuteuna mae Bakbaka, mae Heres, nei mae Galal. Eghuteuna mae Matanaea thugna mae Mika. Mae Mika gne thugna mae Sikri ka vikegna mae Asaf.

¹⁶ Eghuteuna mae Obadaea thugna mae Semaea. Mae Semaea gne thugna mae Galal mae ihei teke karha ka mae Jetutun. Eghuteuna mae Berekaea thugna mae Asa. Mae Asa gne thugna mae Elkana. Vikegna mana na au ka namono Netofa.

Mae te mala reireghigna Sugablahi teke pulo mei Jerusalem

¹⁷ Igre mae greireghigna Sugablahi teke pulo mei Jerusalem re: Mae Salum, mae Akub, mae Talmon, mae Ahiman, baludi mae kheradire. Mae Salum gne nodi lida mare na.

¹⁸ Mae igre neke mala reireghini grengatha ke maghati Sugablahi, te kiloi mare, “Nogna Grengatha King.” Tifa te mei na, kuꞌedi mae igre neke reireghini nodi namono mae Livaet te au rhegna Suga Tapuale te Blahi na.

¹⁹ Aonu mae Salum nei hatimare nei mae kheragnare eghu ne neke reireghi ni grengatha ke ulugna Sugablahi na. Mae Salum gne thugna mae Kore. Mae Kore gna thugna mae Ebiasaf ka vikegna mae Kora. Tifa te mei na, kuꞌedi mae igre neke reireghi ke ulugna nogna Suga Tapuale te Blahi Lord.

²⁰ Ulu lahu na mae Finehas thugna mae Eleasa teke nodi lida mae te mala reireghi igre, eghuteuna Lord neke au balugna mana.

²¹ Tifa na mae Sekaraea thugna mae Meselemaea, mana jaola neke kaisei mae mala reireghi ke ulugna Suga Tapuale te Blahi na.

²² Mare te gnafa teke vahidi mare te mala reireghidi vido igre na, mare thokeni phei gobi nabotho phei mae. Eghuteuna mare rioriso soru nanghadi mae igre ka buka gna nodi vike na leghu nodi namono. Tifa na, King Devet ghe Profet Samuel, phiamare neke vahidi kuꞌedi mare re mala thofno fiofiloni gloku igne.

²³ Eghume iheire te karha mei ka vikedi mae igre na, mare reireghini fabrahu grengatha te mala tei ka nogna Sugablahi Lord na.

²⁴ Mae te mala reireghi igre mare au ka fati philegna Sugablahi na. Kaisei ke maghati, kaisei ke mosu, kaisei ke raru nei kaisei ke mata.

²⁵ Eghuteuna kheradi mare te au ka namono re, mare mei toghodi koba mae igre. Kaisei tothoghei na mare tangomana te mei reireghi ka vido igre nabagna fitu narane, aonu keha tothoghei na ke mei tughudi mare.

²⁶ Nu fati mae Livaet te batudi mae mala reireghi igre, mare mala fiofilodi chogho te au ke lamnagna nogna Sugablahi God na, eghuteuna mare jaola fiofilodi glepo te lilisei hatimare mae pris ka chogho igre.

²⁷ Leuleghu bongi na mare au kolho rhegna Sugablahi igne, naugna mare mala reireghini Sugablahi igne. Eghuteuna leuleghu hamerane na, mare tothora koba grengathagna Sugablahi na.

Keha nodi mae gloku hatimare mae Livaet

²⁸ Keha mae Livaet mala fiofilodi glepo teke hata teke tei hatimare mae pris ka vido te tei ka tarai na. Eghuteuna ka teke hata teke pulo mei glepo igre, mae Livaet gre kaha fakeli koba glepo igre ame ke lisei fapulo nga eghu.

²⁹ Nu keha mae Livaet mala fiofilodi keha glepo blahi te mala loku ka Sugablahi na igre, nei famane flaoa, waen, oliv oel, insens nei keha glepo te mala edi te mala famane siri kelidi oel blahi igre.

³⁰ Nu keha mae pris ghu kolho te au nodi nolaghi te mala ngigno insens nei oel blahi teu igre.

³¹ Kaisei mae Livaet nanghagna na mae Matitaea, mana gahu bret blahi mala tusu lao ka Lord. Mae Matitaea gne neke thugna ululahu mae Salum ka vikegna mae Kora.

³² Eghuteuna keha mae Livaet ka vikegna mae Kohat, nodi gloku mare na mala tarabana Bret Blahi mala tusu ranghini God leuleghu Narane Sabat.

³³ Keha mae lida ka vikegna mae Livaet, mae igre mala baubatu fei khoje ka Sugablahi, mare au ka choghogna Sugablahi igne. Mae igre theome mala edi keha nafnata gloku, naugna bongi narane na mare mala kaikaliti mala koje.

³⁴ Ka susureidi mae Livaet igre falaseni te mae igre mare lida ka nodi vike na. Eghuteuna mare mei au Jerusalem.

Kuꞌegna King Sol baludi vikegna mana re

³⁵ Jehiel neke ei namono Gibeon neke au jare. Nanghagna khetogna na Maka.

³⁶ Sua ululahu repa na, Abdon. Eghuteuna keha thudi repa re: mae Sua, mae Kis, mae Baal, mae Ner, mae Nadab,

³⁷ mae Gedoa, mae Ahio, mae Sekaraea, nei mae Miklot,

³⁸ kmagna mae Simea. Eghuteuna keha teke karha mei ka vikedi mae igre au Jerusalem, rhedi vikegna mae Benjamin.

³⁹ Mae Ner na kmagna mae Kis, eghuteuna mae Kis na kmagna mae Sol. Mae Sol neke au fati thugna nalhaꞌu, mae Jonatan, mae Malkisua, mae Abinadab, nei mae Es-Baal.

⁴⁰ Mae Jonatan gne kmagna mae Merib-Baal, keha nanghagna na Mefiboset. Eghuteuna mae Merib-Baal gne kmagna mae Maeka.

⁴¹ Mae Maeka ne au fati thugna nalhaꞌu, nanghadi re igre: mae Piton, mae Melek, mae Tarea nei mae Ehas.

⁴² Mae Ehas gne kmagna mae Jada. Mae Jada ne au thilo thugna nalhaꞌu, mae Alemet, mae Asmavet nei mae Simri. Mae Simri na kmagna Mosa.

⁴³ Mosa na kmagna Binea. Binea na kmagna Rafa. Rafa na kmagna Eleasa. Eleasa kmagna Asel.

⁴⁴ Mae Asel au namno thugna nalhaꞌu, nanghadi re: mae Asrikam, mae Bokeru, mae Ismael, mae Searaea, mae Obadaea nei mae Hanan.