Ululahu Kronikols 5 - Buka Blahi Ka Cheke Holo

Vikegna mae Ruben

¹ Mae Ruben gne thugna ulu lahu mae Jekop. Nu naugna teke thuru mana balugna fapea khetogna mae kmagna na, mana theome tangomana te hata nolaghi teke thugna ululahu mana na. Eghuteuna mae Jekop kmagna mae Ruben igne neke tusu lao nolaghi igne ka mae Josep nei ka vikegna mana na. Naugna igne, nanghagna mae Ruben na ne theome mei ulu lahu ka susureidi vikegna Israel.

² Neuba vikegna mae Juda igne ne rheta salaꞌudi keha vikegna mae Israel igre, eghuteuna king gna Israel na jifla mei ka vikegna mae Juda, nu vikegna mae Josep gne neke hata nogna nolaghi mae teke kulu karha na.

³ Mae Ruben gne neke au fati thugna nalhaꞌu. Nanghadi mae igre: Mae Hanok, mae Palu, mae Hesron, nei mae Kami.

^4-6 Vikegna mae Joel re igre: Mae Joel gne neke kmagna mae Semaea, eghuteuna mae Semaea gne neke kmagna mae Gog, eghuteuna mae Gog gne neke kmagna mae Simei, eghuteuna mae Simei gne neke kmagna mae Maeka, eghuteuna mae Maeka gne neke kmagna mae Rehaea, eghuteuna mae Rehaea gne neke kmagna mae Baal, eghuteuna mae Baal gne neke kmagna mae Bera. Mae Bera gne kaisei mae mala baubatu ka vikegna mae Ruben. Nu king Tiglat-Pilesa maegna Asiria igne mei neke lokini mana hata ne tei Asiria.

⁷ Mare ne rioriso sukha tharakna gna mae Ruben. Ka grioriso igne, mare ne lisei sukha nanghadi mae funei igre: Mae Jel, mae Sekaraea,

⁸ mae Bela thugna mae Asas. Mae Asas gne neke thugna mae Sema ka vikegna mae Joel. Vikegna mae Joel igre, mare au ka nohi rhegna namono Aroa. Nodi vido glose mare na funu ka vido igne tei posa Nebo nei Baal-Meon.

⁹ Mare au nodi kmana buluka nei sipu eghu Gilead ne ghilei theome nabadi mare namono igne. Aonu keha ka mare tei ne au ka vido ke maghati namono nagou biꞌo tei posa ka Khoꞌu biꞌo Iufretis.

¹⁰ Ka narane te king Sol igre, vikegna mae Ruben te au ka vido ke maghati namono nagou biꞌo igre neke tei neke magra neke uluni namono Hagri neke hata nodi namono iheire te au ke maghati Gilead.

Vikegna mae Gad

¹¹ Vikegna mae Gad na mare tei ne au ka nohi Besan. Nogna glose mae Gad igne funu ke rarugna nogna glose mae Ruben igne tei posa ka namono Saleka.

¹² Igre goro mae biꞌo ka vikegna mae Gad te au ka namono Besan igne: Mae igre te mae lida biꞌo ka vike igne, ulu lahu na mae Joel, fapea na mae Safam, fatilo na mae Jana eghuteuna fafati na mae Safat.

¹³ Igre nanghadi fitu mae thabuknagna ka vike igne: Mae Maekol, mae Mesulam, mae Seba, mae Jorae, mae Jakan, mae Sia, nei mae Eba.

¹⁴ Fitu mae igre neke karha mei ka vikegna mae Abihael. Mae Abihael gne thugna mae Huri, eghuteuna mae Huri gne thugna mae Jaroa, eghuteuna mae Jaroa gne thugna mae Gilead, eghuteuna mae Gilead gne thugna mae Maekol, eghuteuna mae Maekol gne thugna mae Jesisae, eghuteuna mae Jesisae gne thugna mae Jado, eghuteuna mae Jado gne thugna mae Bus.

¹⁵ Mae Ahi gne neke thugna mae Abdiel, eghuteuna mae Abdiel gne neke thugna mae Gumi. Mae Ahi gne mae mala baubatu ka vikegna mae Gad.

¹⁶ Vikegna mae Gad igre mare au ka phei nohi, Gilead ghe Basan, nei ka sare Saron aheva te au kmana gano maladi nodi sipure.

¹⁷ Mare neke rioriso sukha nanghadi vikegna mae Gad igre ka buka susurei na ka narane te king mae Jotam Juda, eghuteuna mae Jeroboam king gna Israel.

Hatimare mae soldia ke maghati Khoꞌu biꞌo Jordan

¹⁸ Phiatutu fati thogha, fitu gobi namnosalei soldia ka vikegna mae Ruben, ka vikegna mae Gad, nei keha ka vikegna mae Manase te au ke maghati Khoꞌu biꞌo Jordan igre mare jifla balu nodi greoreo, naflahi nei phaloho neu ne tei magra.

¹⁹ Mae igre tei ne magra ka vikedi mae Hagri, mae Jetua, mae Nafis nei mae Nodab.

²⁰ Eghuteuna mae soldia igre ne toreni God mala toghodi ka magra igne. Aonu God ne toghodi mare, naugna mare ne fatutuani ni mana. God ne lisa lao ka khamedi mare vikegna mae Hagri igre, nei iheire te gnafa teke balugna mana re.

²¹ Mare ne hata glimafulu thogha kamel, phia gobi glimafulu thogha sipu, nei phei thogha dongki. Mare jaola ne hata kaisei gobi thogha naikno mala nodi naikno gloku.

²² Kmana te aknu falehe mare na, naugna God neke toghodi vikegna mae Ruben, vikegna mae Gad nei vikegna mae Manase teu igre. Mare au neu jare ne ghilei thokeni narane te mei armi gna Asiria te khi jifladi ka nodi namono na.

Keha ka vikegna mae Manase te au ke maghati Khoꞌu biꞌo Jordan

²³ Keha ka vikegna mae Manase te au ke maghati Khoꞌu biꞌo Jordan igre kmana ne vuragha naikno na. Mare au ka nohi ke raru Besan te tei posa ka phei namono Baal-Hemon ghe Seni rhegna Thogele Hemon.

²⁴ Igre nanghadi mae teke baubatu ka vike igre: Mae Efa, mae Isi, mae Eliel, mae Asriel, mae Jeremaea, mae Hodavaea, nei mae Jadiel. Mae igre mae soldia nheta, eghuteuna naiknore ghatho tahudi mare.

Vikedi mae Ruben, mae Gad nei mae Manase teu igre theome ghatho tahuni God

²⁵ Naiknodi thilo vike igre theome ghatho tahuni nodi God mae kuꞌedi tifa ra. Mare ne funu tarai ka nodi mumuju god iheire teke roꞌedi God ka namono Kenan.

²⁶ Aonu nodi God mae Israel igne ne nhaꞌa lao gaoghatho te diꞌa ka mae Pul, king gna Asiria mala tei magra ka mare. Mare jaola kiloni mae king igne, mae Tiglat-Pilesa. Mana hata naiknore ne tei au ka thilo namono, Hala, Haboa, nei Hara, rhegna khoꞌu biꞌo Gosan. Mare au jare funu ka narane tuana ghilei posa ka narane igne.