Ululahu Kronikols 29 - Buka Blahi Ka Cheke Holo

Naiknore hata mei glepo mala horogna Sugablahi na

¹ Eghuteuna King Devet ne cheke eghu ka naikno te kafe khapru mei ka mana re, “Lord neke vahini mae thugu iara Solomon mala king nei mala horo nogna Sugablahi mana na. Mana kaisei mae majaghani fara, eghuteuna mana neke theome eni kaisei gloku biꞌo jateula igne teku tifa na. Nu gloku gna Sugablahi igne ginauna biꞌo fara, naugna Sugablahi igne theome nogna suga naikno, nu nogna suga thegna God.

² Eghume, iara neke loku heta mala tarabana gobi lepogna nogna Sugablahi noda God. Iara la tarabanahi gol, silva, bras, aean, nei thaba. Eghuteuna iara la tarabanahi kmana thofno famane thina te kiloi soham nei onikis, nei kmana nafnata thina te famane kala. Eghuteuna iara tarabanahi kmana famane thina te kiloi mabol te mala lalaoni ka suga ra.

³ Ke klignadi glepo teke kulu lilisei tekuhi iara igre, gognarona iara nake lisei laoi nogu gol nei silva teku thegu re, naugna iara magnahaghedi fara mare te horo nogna Sugablahi nogu God na.

⁴ Eghume iara nake nhaꞌa lao kaisei gobi thogha kilo te thofno famane gol fara, nei phei gobi phiatutu thogha kilo famane silva mala lalaoni mare gringni ke lamnagna nogna Sugablahi na,

⁵ eghuteuna keha glepo te mala edi mae glokure mare ginauna edi ka gol nei silva. Eghume ihei ka ghotilo te kelitagna te ghatho tahuni Lord gognarona?”

⁶ Aonu hatimare mae mala baubatu ka tharakna, hatimare mae funei ka vike, keha mae komanda ka armi, nei hatimare mae biꞌo te mala fiofilodi nogna gobigna lepo king teu igre mare ne kelitadi kolho ne tusu lao kmana glepo.

⁷ Mare ne tusu lao glepo igre te mala horogna nogna Sugablahi God na. Kaisei gobi fitusalei thogha kilo ka gol, eghuteuna nabotho thogha gol sileni, eghuteuna thilo gobi phiatutu glima thogha kilo ka silva, eghuteuna namno gobi nabotho thogha kilo ka bras, eghuteuna thilo mola fati gobi glimafulu thogha kilo ka aean.

⁸ Eghuteuna mae iheire te au nodi famane thina igre, mare mei ne tusu lao ka mae Jehiel mae ihei te fiofilodi famane glepo te mala horogna Sugablahi igne. Mae Jehiel ka tharaknagna mae Geson.

⁹ Naiknore ne thofno kelitadi fara naugna hatimare mae biꞌo re ne magnahaghei fara te tusu lao kmana glepo ka Lord. Eghuteuna King Devet jaola ne kelitagna fara ne salaꞌui.

King Devet teke cheke fakeliniLord

¹⁰ Aonu King Devet ne cheke fakelini Lord ke ulugna mavitu na ne tarai eghu, “Iara cheke fakeli nigho Lord, nogna God mae Israel kuꞌemi ghehati tifa ia. Ghehati ginauna cheke fakeligho fabrahu tifa tifa.

¹¹ Iagho thofno haghe fara, eghuteuna iagho au nolaghi fateote'o. Nanghamu iagho na thono haghe fara, eghuteuna iagho thofno keli fara. Lord iagho king nei iagho funei ka nou nolaghi. Gobigna nafnotu fateote'o te au kligna nei ka nauthoglu igne teu igre nou iagho kolho. Eghuteuna iagho thofno haghe fara, eghuteuna iagho funei frunidi gobigna nafnotu fateote'o.

¹² Dedei nei nafnakno teu igre mei funudi ka iagho kolho. Iagho funei frunidi thua nafnotu fateote'o gre ka nou nolaghi themu. Eghuteuna iagho ngala tangomana te nhaꞌa hagheni naikno na ka nafnakno biꞌo nei nanheta.

¹³ Gognarona ghehati tegio nigho iagho nomi God, eghuteuna ghehati cheke fakelini nanghamu iagho na.

¹⁴ “Nu iara nei nou naikno iagho gre eghu, ghehati theo nafumi kolho naugna ghehati gne theo kaisei nomi glepo themi te mala tusu ari ka iagho na. Gobigna lepo te tusu ari ghehati ka iagho igre neke mei funudi ka iagho ngala.

¹⁵ Lord, iagho laseni nakarhami ghehati ka nauthoglu igne. Leuleghu fata na, ghehati haimini te jateula te au teu ka keha kantri delei ra eghu. Leuleghu fata na ghehati naikno phosa jateula teke kuꞌemi Ijep tifa ra eghu. Nakarhami ghehati gre ghosei tei salaꞌu jateula naungo eghu, eghuteuna ghehati theome tangomana te rikhani glehe na.

¹⁶ Lord, nomi God, ghehati hata mei kmana famane glepo mala horo kaisei Sugablahi malagna nanghamu iagho te blahi, nu gobigna lepo te hata te mei ghehati ka iagho igre neke kulu nou iagho neku ngala!

¹⁷ Iara laseni, nogu God, iagho fariuriudi gaoghathodi nou naiknore, eghuteuna iagho glealeꞌa baludi naikno te leghuni puhi te doglo na. Ka puhi te doglo kolho, iara magnahagheni fara te tusu ari gobigna lepo igre ka iagho. Iara la filonihi eigna nou naikno iagho igre, mare magnahaghei fara te tusu ari glepo igre ka iagho.

¹⁸ Lord, iagho nogna God mae Ebraham, nogna God mae Aesak nei nogna God mae Jekop, thilo kuꞌemi ghehati tifa ra. Ghehati ghatho tahu nigho iagho, toghodi sagho iheire nate karha mei ke leghumi ghehati igre mala jaola au fabrahu nafnata gaoghatho igne, nei ghatho tahu nigho fabrahu.

¹⁹ Tusu lao famane gaoghatho te keli sagho ka thugu iara Solomon, mala thofno leghudi nei faꞌuvedi eghu mana nou cheke iagho re. Toghoni mana sagho mala horo mana Sugablahi igne naugna iara neke kulu tarabana neku glepo te mala loku fahuigna na.”

²⁰ Aonu mae Devet ne cheke eghu ka naiknore, “Cheke fakelini Lord noda God!” Aonu naiknore ne kafe cheke fakelini Lord nodi God kuꞌedi tifa ra. Mare ne kafe pogho soru ne fafnaknoni God, nei jaola fafnaknoni King Devet.

Mare ne tofa oel ka Solomon mala king

²¹ Ka keha narane na, naiknore ne falelehe kaisei thogha buluka nalhaꞌudi, nei kaisei thogha sipu nalhaꞌudi, nei kaisei thogha sipu ikodi mala gahu faknoro mala fafara. Mare ne fafara waen ka Lord. Eghuteuna mare ne aknu falehe kmana buluka, sipu, nei nanigot mala fafara fagaglana gna te mala au ka pharikeli balugna Lord.

²² Naiknore ne ghamu nei koꞌu neu ke ulugna Lord ka narane tuana balu glealeꞌa biꞌo. Aonu naiknore ne fapea chekeni te Solomon ngala nodi king mare na. Eghuteuna hatimare mae pris ne tofa oel ka phaꞌugna mana na ka nanghagna Lord, eghuteuna mae Solomon ne kegra king ka narane igne. Eghuteuna mare ne jaola ka mae Sadok mala nodi pris.

^23-24 Aonu mae Solomon neke tughuni mae kmagna na ne kegra king gna Israel. Hatimare goro nogna mae biꞌo mae Devet igre nei hatimare mae soldia te ulu tulao, nei keha thugna King Devet ra teu igre ne kafe nhaꞌa cheke te mala leghuni King Solomon. Mana kaisei mae thofno king keli fara, eghuteuna naikno te gnafa Israel igre ne leghuni mana.

²⁵ Lord ne nhaꞌa hagheni Solomon ka nafnakno biꞌo ka tathadi naikno te gnafa Israel, eghuteuna naiknore ne ghatho tahuni mana. Uve, mana fnakno fara salaꞌudi keha king di Israel ulu lahu ra.

King Devet ne lehe

^26-27 King Devet thugna Jesi, mana king ka vido te gnafa Israel phiatutu finogha. Ulu lahu na, mana king gna Juda fitu finogha ka namono Hebron. Ke leghu na, mana king gna Israel tolufulu thilo finogha Jerusalem.

²⁸ Mana lehe kate thofno kuekuꞌe fara. Eghuteuna mana kaisei king te fnakno fara nanghagna na, eghuteuna mana jaola kaisei mae dedei fara. Aonu naiknore ne thofno ghatho tahuni fara mana. Aonu thugna mana Solomon ne kegra king.

²⁹ Thoutonu eidi unha teke edi King Devet funu kate king mana te ghilei lehe na, mare rioriso soru ka buka te kiloi Nogna Thoutonu Profet Samuel, Nogna Thoutonu Profet Natan nei Nogna Thoutonu Profet Gad.

³⁰ Buka igne toutonu eidi unha gloku biꞌo teke edi mae Devet re, nei glepo biꞌo eghu teke edi mana kate king nei funei fruni teku mana kantri na. Eghuteuna jaola eidi unha te thokeni mana nei naiknodi Israel, nei keha glepo te thokedi keha king ka kantri te au falithuini Israel.