Ululahu Kronikols 26 - Buka Blahi Ka Cheke Holo

Mae mala reireghigna Sugablahi na

¹ Nanghadi mae iheire te mala reireghigna nogna Sugablahi Lord na igre: Mae Meselemaea thugna mae Kora ka tharaknagna mae Asaf ka tharaknagna mae Kora.

² Igre nanghadi fitu thugna nalhaꞌu mae Meselemaea te funu ka mae teke kulu karha na tei posa ka mae teke karha leghu lahu na: Mae Sekaraea, mae Jediael, mae Sebadaea, mae Jatniel,

³ mae Elam, mae Jehohanan nei mae Eliehoenae.

^4-5 God neke fablahini mae Obed-Idom, eghuteuna mae Obed-Idom ne au kmana thugna nalhaꞌu. Igre nanghadi thugna mana re: Teke kulu karha ka mare na mae Semaea, eghuteuna mae Jehosabad, eghuteuna mae Joa, eghuteuna mae Saka, eghuteuna mae Natanel, eghuteuna mae Amiel, eghuteuna mae Isaka, eghuteuna mae Peuletae.

⁶ Mae Semaea, thugna mae Obed-Idom igne mana au keha thugna nalhaꞌu. Eghuteuna mae igre lida ka tharaknagna mae Obed-Idom naugna mae igre thofno mae keli fara.

⁷ Thugna mae Semaea re igre: Mae Otni, mae Rafael, mae Obed nei mae Elsabad. Eghuteuna phei thabusidi mare, mae Elihu ghe mae Semakaea igre jaola mae keli fara.

⁸ Mae igre te gnafa na kafe ka vikegna mae Obed-Idom. Khaputudi mae igre namnosalei phei mae. Mare balu thudi nei thabusidi teu igre kafe mae keli fara, eghuteuna mare nabadi fara te mala reireghini Sugablahi na.

⁹ Eghuteuna mae Meselemaea au nabotho nhana thabusigna nei thugna eghu, mae igre thofno mae soldia keli fara.

¹⁰ Eghuteuna mae Hosa gne mei ka tharaknagna mae Merari. Nanghadi thugna mae Hosa re igre: Mae Simri, mae ihei te funei ka mare na, neuba mana neke theome kulu karha, mae kmagna na neke vahini mana te mala mae funei na.

¹¹ Mae Hilkaea gne mei fapea ka thugna mana igre, mae Tebalia gne mei fatilo ka mare, eghuteuna mae Sekaraea gne mei fafati ka thugna mana igre. Eghume, thabusigna nei thugna teku mae Hosa igre neke nabotho thilo mae.

¹² Tothoghei mae greireghi igre au nodi gloku leghuni mae ihei te batuni tothoghei igne. Tothoghei te gnafa igre au nodi narane te mala reireghi ni Sugablahi na, mare loku jateula ngau te edi keha mae Livaet ra eghu.

¹³ Neubane tharakna biꞌo ba ikoi, mare na lalahu khale mala laseni grengatha aheva gne nate reireghi tharakna tuana.

¹⁴ Mare ne lalahu khale mala laseni tharakna aheva gne nate reireghi grengatha ke maghati na, igne ne soru ka tharakna gna mae Meselemaea te mala reireghi grengatha ke maghati na. Ke leghugna igne mare neke lalahu khale mala laseni tharakna aheva gne nate reireghi grengatha ke raru na, igne jaola ne soru ka tharaknagna mae Sekaraea thugna mae Meselemaea te mala reireghi grengatha ke raru na. Mae Sekaraea gne kaisei mae te au tagna gaoghatho te keli.

¹⁵ Aonu ke leghugna igne mare lalahu khale ne soru ka tharaknagna mae Obed-Idom te mala reireghigna grengatha ke mata na, eghuteuna lalahu khale igne ne vahidi thugna manare mala reireghi mare chogho te mala lilisei glepo na.

¹⁶ Lalahu khale igne ne soru ka tharaknadi mae Supim ghe mae Hosa mala reireghi grengatha ke mosu na, nei mala reireghi mare grengatha te kiloi mare, “Grengatha Saleket” ka nabrou te haghe holo na. Leuleghu fata na mare reireghi grengatha ghilei gnafa nodi vido narane mala loku na, eghuteuna keha mae greireghi re ke mei tughudi mare.

¹⁷ Leuleghu narane na, namno mae reireghi grengatha ke maghati, fati mae reireghi grengatha ke raru, fati mae reireghi grengatha ke mata, eghuteuna phei mae reireghi chogho mala lilisei gobigna lepo teke tusu laohi naiknore ka Lord.

¹⁸ Fati mae reireghi ke mosu lithui ke kosigna Sugablahi na, eghuteuna phei mae reireghini varandagna na.

¹⁹ Mae greireghi igre mei ka tharaknadi mae Kora ghe mae Merari.

Keha gloku te edi hatimare mae Livaet ka Sugablahi na

²⁰ Hatimare thabusigna te Livaet ka tharaknadi mae Kora ghe mae Merari igre mare te fiofilodi re gol nei silva teugna Sugablahi na, eghuteuna mare reireghidi chogho te mala liliseidi gobigna lepo teke tusu laohi naiknore ka Lord.

^21-22 Mae Ladan gne mei ka tharaknagna mae Geson. Aonu mae Jehiel gne mei ka tharaknagna mae Ladan, eghuteuna mae Ladan gne au phei thugna nalhaꞌu, mae Setam ghe mae Joel. Phiamare te fiofilodi gol nei silva nei sileni gna teu nogna Sugablahi Lord.

²³ Eghuteuna tharaknagna mae Amram, tharaknagna mae Isaha, tharaknagna mae Hebron nei tharaknagna mae Usiel, mae igre jaola fiofilodi sileni gna Sugablahi na. Igre nanghadi mare re:

²⁴ Mae Sebuel ka tharaknagna mae Gesom mana thugna mae Moses, mana nodi lida mae iheire te mala fiofilodi gol nei silva nei keha famane glepogna Sugablahi na.

^25-26 Mae Selomot gne neke thugna mae Sikri, eghuteuna mae Sikri gne neke thugna mae Joram, eghuteuna mae Joram gne neke thugna mae Jesaea, eghuteuna mae Jesaea gne neke thugna mae Rehabaea, eghuteuna mae Rehabaea gne neke thugna mae Eliesa thabusigna mae Gesom. Eghuteuna mae Selomot baludi mae thabusigna igre mare te mala fiofilodi chogho te mala liliseidi nogna gobigna lepo King Devet teke tusu lao mana ka God. Mare jaola fiofilodi gobigna lepo teke tusu lao hatimare mae lida di tharakna igre nei unha teke tusu lao hatimare mae komanda di armi.

²⁷ Kate uluni mae soldia gre u magra na, mare hata kmana glepo te keli ka mae naoka re, eghuteuna mare hata ne mei glepo igre ne tusu lao ka God, mala tangomana mare te loku ka nogna Sugablahi Lord.

²⁸ Mae Selomot nei hatimare thabusigna ne fiofilodi keha glepo te keli te au ka Sugagna Lord teke lilisei Profet Samuel, King Sol thugna mae Kis, mae Abna thugna mae Ner, nei mae Joab thugna Seruia.

Keha nodi gloku mae Livaet

²⁹ Goro thugna mae Isaha, mae Kenanaea nei goro thugna teu igre, mare theome loku ka Sugablahi. Nodi gloku mare na mala fate nei fanomho ka nodi puhi biꞌo naiknodi Israel.

³⁰ Goro thugna mae Hebron, mae Hasabaea balugna kaisei thogha fitu gobi kheragna mana igre lase loku fara, mae igre te phaꞌugna gloku te mala loku ranghini Lord, nei jaola ka nogna gloku king ka nodi kantri mae Israel ke mosu Khoꞌu biꞌo Jordan.

³¹ Ka narane tuare, mae Jeria teke lida ka tothoghei tharaknagna mae Hebron. Eghuteuna ka phiatutu finogha te king mae Devet igre, nogna mae gloku mana re neke filo fapulo ka susureidi tharaknagna mae Hebron, eghuteuna mare ne filoni mae Jeria au baludi mae te thofno keli fara ka namono Jasa ka provins Gilead.

³² Aonu King Devet ne vahidi phei thogha fitu gobi kheragna mae Jeria mala batuni nogna gloku God, nei nogna gloku king langau eghu, ka nodi kantri mae Israel ke maghati Khoꞌu biꞌo Jordan ka nogna nohi mae Ruben, nei ka nogna nohi mae Gad, nei ka nogna nohi mae Manase.