Ululahu Kronikols 23 - Buka Blahi Ka Cheke Holo

¹ Kate funu kuekuꞌe farahi King Devet na, mana neke vahini mae Solomon, mae thugna nalhaꞌu na mala king gna Israel tughuni mana.

Nodi gloku mae Livaet

² Ke leghu, King Devet ne kilo meidi hatimare mae lidadi Israel, baludi mae pris nei mae Livaet.

³ Mana ne cheke ka hatimare mae lida mala kahadi mae Livaet te funu ka tolufulu finogha di te haghe. Eghuteuna khaputudi mare te gnafa na posani tolufulu nhana thogha mae.

⁴ Aonu mae Devet ne cheke eghu, “Varadaki fati thogha mae mala fiofilogna gloku te eni mare ka nogna Sugablahi Lord na. Eghuteuna namno thogha mae te mala fanomho ka fate te mala rioriso soru nodi cheke hatimare mae king.

⁵ Eghuteuna fati thogha mae mala reireghigna Sugablahi. Eghuteuna fati thogha mae mala cheke fakelini Lord ka thua nafnata khoje mala cheke fakelini nanghagna Lord. Iara neke edi thua nafnata khoje igre neke tusu lao ka mare.”

⁶ Eghuteuna mana neke fotadi mae igre ka thilo tothoghei, leghuni vikegna mae Geson, mae Kohat nei mae Merari, thilo mae igre thugna mae Livae.

Vikegna mae Geson

⁷ Nanghadi thugna mae Geson re igre, mae Ladan ghe mae Simei.

⁸ Eghuteuna mae Ladan neke au thilo thugna nalhaꞌu: Mae Jehiel, mae Setam nei mae Joel.

⁹ Mae Simei neke au thilo thugna nalhaꞌu: Mae Selomot, mae Hasiel nei mae Haran. Thilo mae igre lida ka vikegna mae Ladan.

^10-11 Eghuteuna mae Simei jaola neke au fati mae thugna nalhaꞌu: Mae teke kulu karha na, mae Jahat, fapea na mae Saena, eghuteuna fatilo na mae Jeus, eghuteuna fafati na, mae Beria. Nu iheire teke karha mei ke leghugna mae Jeus nei iheire teke karha mei ke leghugna mae Beria gre eghu neke theome kmana, eghume tharaknadi phei mae igre neke loku fodu neke kaisei vike ngala.

Vikegna mae Kohat

¹² Mae Kohat neke au fati thugna nalhaꞌu: Mae Amram, mae Isaha, mae Hebron nei mae Usiel.

¹³ Mae Amram neke au phei thugna nalhaꞌu: Mae Eron ghe mae Moses. Lord neke vahini mae Eron baludi thugna mana re mala fiofilodi glepo blahi teke tusu lao naiknore ka Lord, eghuteuna vikegna mana na eni koba gloku igne. Nodi gloku mare na mala gahu fafara mala tufru soruni Lord, eghuteuna mare edi keha gloku te mala fablahidi naiknore ka nanghagna Lord.

¹⁴ Nu thugna mae Moses nogna mae gloku God igne, mare loku fodu kolho baludi hatimare mae Livaet.

¹⁵ Nanghadi phei thugna mae Moses re, mae Gesom ghe mae Eliesa.

¹⁶ Thugna ululahu mae Gesom na mae Sebuel.

¹⁷ Mae Eliesa neke au kaisei thugna kolho, nanghagna na mae Rehabaea, mae ihei te lida ka vikegna mae Eliesa. Nu mae Rehabaea neke au kmana thugna.

¹⁸ Mae sua nalhaꞌu teke kulu karha ka mae Isaha na, mae Selomit.

¹⁹ Mae Hebron neke au fati thugna nalhaꞌu: Teke kulu karha na mae Jeraea, fapea na mae Amaraea, fatilo na mae Jehasiel, eghuteuna fafati na mae Jekameam.

²⁰ Mae Usiel neke au phei thugna nalhaꞌu, mae teke kulu karha na, mae Maeka eghuteuna fapea na mae Isia.

Vikegna mae Merari

²¹ Mae Merari neke au phei thugna nalhaꞌu, mae Mali ghe mae Musi. Mae Mali neke au phei thugna nalhaꞌu, mae Eleasa ghe mae Kis.

²² Nu mae Eleasa lehe neke theo thugna nalhaꞌu, mana neke au thugna gaꞌase kolho. Eghuteuna thugna gaꞌase mana igre neke tolaghi ka fakarhaidi, thugna mae Kis.

²³ Mae Musi neke au thilo thugna nalhaꞌu, Mali, Eda nei Jeremot.

²⁴ Igre nanghadi mae biꞌodi teke tharaknagna nei vikegna teku mae Livae re. Nogna mae gloku king igre neke rioriso soru ka buka nanghadi re, eghuteuna kahadi mae iheire te funu ka varadaki finogha te haghe igre mala loku ka nogna Sugablahi Lord.

²⁵ King Devet ne cheke eghu, “Lord, noda God tahati maeda Israel igne mana neke tusu mei pharikeli ka nogna naiknore, eghuteuna mana ginauna au fabrahu Jerusalem.

²⁶ Gognarona, nodi gloku hatimare mae Livaet gre kela tughu, naugna gloku te mala tughagna Suga Tapuale te Blahi gne la gnafahi, eghuteuna gloku te mala paladi glepo blahi re la jaola la gnafahi.”

²⁷ Eghuteuna ka nogna cheke mae Devet igre, hatimare mae Livae te funu ka varadaki finogha te haghe igre, mare ne au nodi gloku te mala toghodi hatimare mae pris.

²⁸ Nodi gloku mae Livaet gre mala toghodi mae pris teke karha mei ka tharaknagna mae Eron te mala tarai ka nogna Sugablahi Lord. Eghuteuna mare mala filo faligohoni Sugablahi na nei chogho ke lamnagna Sugablahi igne. Eghuteuna mare mala jaola mala fagagae glepo blahi re.

²⁹ Nodi gloku mare te mala fiofilodi bret blahi te lilisei mae pris ka Tevo Blahi na. Eghuteuna mare mala fiofilodi flaoa teke gahu hatimare mae pris gre mala fafara, nei bret te theo isigna, nei bret teke gahu mare ka biti. Eghuteuna leuleghu fata na mare skel gobigna nafnata glepo te mala fafara igre.

³⁰ Eghuteuna leuleghu narane, hamerane nei grafi teuna, hatimare mae Livaet gre mare kegra haghe tegioni Lord nei koje mala cheke fakelini mana.

³¹ Mare eni nafnata puhi igne kate gahu fafara ka narane Sabat, nei ka Gaghamu Khafa, nei ka keha narane biꞌo mala tarai. Mae igre edi gloku ka Sugablahi na leghuni thofno naba te magnahagheni mare na nei leghuni kastom gna gloku na.

³² Ulu lahu na, nodi gloku mae Livaet gre mala fiofiloni nogna Suga Tapuale te Blahi Lord, eghuteuna ke leghu na mare mala loku ka nogna Sugablahi Lord nei mala toghodi mae pris ka tharaknagna mae Eron.