Ululahu Kronikols 22 - Buka Blahi Ka Cheke Holo

¹ Aonu mae Devet au neu ka nogna glose mae Arauna igne ne cheke eghu, “Tahati ginauna horo nogna Sugablahi Lord mae ihei te God na ka vido igne. Eghuteuna olta te mala gahu fafara na ginauna jaola au agne.”

King Devet tarabana mala horo Sugablahi na

² King Devet ne kilodi naiknodi delei te au soru Israel mala mei Jerusalem. Eghuteuna mana ne chekedi keha mae ka mae igre mala kato thina mala horo Sugablahi nogna God.

³ Mae Devet ne tarabana kmana aean mala horo nila nei vido aean mala famamhaku grengatha. Eghuteuna mana jaola tarabana kmana bras te theome tangomana kaisei mae te skeledi bras igre.

⁴ Eghuteuna naiknodi Taea nei Saedon teu gre jaola hata ne mei phugra gaju sida ka mae Devet, eghuteuna theo kaisei naikno naba te kahadire thaba igre.

⁵ Kani theome lehe nga teku King Devet na, mana neke tarabana kmana thua nafnata glepo te mala horogna nogna Sugablahi Lord na. Mana neke cheke eghu, “Thugu iara Solomon gne, mana mae majaghani fara eghuteuna mana theome laseni te famane horo suga na. Nu iara magnahagheni mae thugu iara Solomon ginauna famane horo fakeli nogna Sugablahi Lord na. Eghuteuna naikno te gnafa ka nauthoglu igne ginauna kelitadi ni fara suga igne na tusu lao nafnakno biꞌo ka suga igne. Eghume iara na tarabana nogna glepo mae Solomon malagna suga igne.”

⁶ King Devet ne kilo meini Solomon, ne cheke ranghini mana mala horo kaisei nogna Sugablahi Lord, nodi God mae Israel.

⁷ Mana ne cheke eghu, “Thuguo, iara neke magnahagheni fara te horo kaisei Sugablahi mala cheke fakelini nanghagna Lord noda God.

⁸ Nu Lord neke cheke eghu ka iara, ‘Devet, iagho theome tangomana te horo nogu suga iara na, naugna iagho neke magra kmana fata neke aknu falehe kmana naikno. Eghume iara theome magnahaghei nigho iagho te horo suga igne.

⁹ Nu iagho ginauna na au kaisei thumu nalhaꞌu, eghuteuna kate kegra king mana na, naiknore ginauna au ka pharikeli, eghuteuna iara ginauna na theome snakredi keha kantri are te naoka ka mana na. Eghuteuna mae sua nalhaꞌu igne iagho ginauna kiloni nanghagna Solomon, gaoghathogna Solomon teu igne, “Pharikeli” eghu. Naugna iara ginauna tusu lao nakarha te keli nei pharikeli eghu ka naiknodi Israel ka narane te kegra king mana na.

¹⁰ Mae igne ngala nate tangomana te horo Sugablahi igne mala mei naiknore mala kilo fnaknoni nanghagu iara na. Mana ginauna mae thugu iara, eghuteuna iara kmagna mana na. Eghuteuna iheire nate karha mei ka vikegna mana re, mare ginauna king fabrahu agne Israel.’ ”

¹¹ Eghuteuna mae Devet neke cheke eghu ka mae Solomon, “Thuguo, Lord ginauna au balumu iagho, eghuteuna mana ginauna togho nigho iagho, mala tangomana iagho te horo nogna Sugablahi mana na, leghuni unha teke nhaꞌa chekeni mana na.

¹² Iara magnahagheini Lord te tusu ranghi nigho gaoghatho te keli nei glalase, mala tangomana iagho te lasedi gobigna lepo te mala funei fruni Israel. Ka puhi igre, iagho ginauna tangomana te leghudi nogna vetula Lord noda God.

¹³ Ghema Solomon! Jame leghudi iagho vetula nei farirhiu eghu teke tusu lao Lord ka mae Moses tifa ra meuna, gobigna lepo te edi iagho re ginauna thofno keli fara. Iagho kegra heta leghu fata, ba thosei mhaghu. Eghuteuna thosei snakreni gaoghathomu na glaꞌe soru.

¹⁴ “Iara neke loku heta fara neke tarabanahi thilo mola fati gobi thogha kilo ka gol, nei tolufulu fati mola kilo silva eghu te au teu te mala horogna nogna Sugablahi Lord na. Eghuteuna iara jaola salo fodu kmana bras nei aean eghu te theo ihei nga te tangomana te skeledi re. Eghuteuna iara jaola la tarabana hi thaba nei thina teure, nu iagho magnahaghei te hata keha glepoi langau eghu.

¹⁵ Iagho au nou kmana mae gloku. Mae iheire te lase kato thina nei mae iheire te lase horo suga ka thina, nei mae iheire loku ka kapenta, nei kmana mae iheire te lase horo gobigna lepo fateote'o

¹⁶ ka gol nei silva, nei ka bras nei ka aean. Eghume iagho funu loku gognarogne, eghuteuna snakreni Lord mala au balumu.”

¹⁷ Aonu King Devet ne cheke ka hatimare mae lidadi Israel mala toghoni mae Solomon.

¹⁸ Eghuteuna mana ne cheke eghu ka mare, “Lord noda God tahati na au balumi ghotilo. Mana neke snakre ghau iara neke uludi naikno teke kulu au agne tifa ka kantri igne. Eghuteuna gognarona mare au ke parigna nogna nolaghi mana, nei tahati nogna naikno mana ra. Eghuteuna ka puhi igne, mana tusu mei pharikeli ka ghotilo, nei ka iheire te au falithui ghami ghotilo. Eghuteuna theo kaisei naoka nate mei magri ghami ghotilo na.

¹⁹ Eghume, gognarona ghotilo kaisei gaoghatho ngala mala leghuni gaoghathogna Lord nomi God. Gognarona ghotilo fufunu loku ka Sugablahi te mala cheke fakelini nanghagna Lord, eghuteuna ghotilo ginauna tangomana te hata te mei lilisei nogna Bokis Nhaꞌa Cheke Lord nei keha glepo blahi ra eghu ke lamnagna.”