Ululahu Kronikols 20 - Buka Blahi Ka Cheke Holo

King Devet ne uluni namono Raba

¹ Leuleghu finogha kate namo gnafa nhigra te nakhete nei reka teuna, hatimare mae king tangomana te hata nodi armi te tei magra ka nodi naoka re. Aonu ka finogha ke leghugna te uluni mae Devet armigna Siria igne, mae Joab batuni armigna Israel ne tei magra ka naiknodi Amon. Mare magra ne uluni Amon nei faligohoni namono Raba, nodi namono biꞌo mare na. Nu mae Devet neke theome tei ka magra, mana neke au neku kolho Jerusalem.

² Mae Devet tei Raba ne hata nogna khepi nafnakno king na ka phaꞌugna mumuju god Milkom. Khepi nafnakno igne neke horo ka gol nei ka famane thina. Tahugna gol ka khepi igne thokeni tolufulu fati kilo. Aonu mare ne lisei lao khepi igne ka phaꞌugna mae Devet na. Eghuteuna mana ne jaola ne hata kmana famane glepo ka namono igne.

³ Eghuteuna mana ne hata naiknogna namono igne ne huhurudi mala loku jateula naikno sneka eghu. Keha ka mae igre loku ka soa nei nhirama mala kato thaba nei thina. Eghuteuna mana eni nafnata puhi igne ka naiknodi keha namono jare Amon. Ke leghu, mae Devet balu nogna armi na neke pulo Jerusalem.

Mare ne aknu falehe goigholi biꞌo gna Filistia

⁴ Ke leghu, armigna Israel neke tei magrai ka armigna Filistia ka namono Gesa. Ka narane tuana, mae Sibekae maegna Husa, mana ne aknu faleheni mae Saf, kaisei mae soldia nheta ka vikegna mae Rafa maegna Filistia, mae igre mae biꞌo nei nheta fara eghu. Eghuteuna mare ne thofno uluni armigna Filistia.

⁵ Eghuteuna keha fata na, mae Israel ne magra ka armigna Filistia, mae Elhanan thugna mae Jaea igne ne aknu falehe kaisei goigholi gna Gat. Nanghagna goigholi igne, mae Lami, thabusigna mae Golia. Gajugna nogna goru mana igne biꞌo jateula fatha suga eghu.

⁶ Eghuteuna keha fata na, mare tei ne magra ka namono Gat. Ka namono igne mare au kaisei nodi goigholi. Goigholi igne au nabotho phei geghesu ka khamegna re, namnoi ka keha khame na, eghuteuna namnoi ka keha khame na. Eghuteuna mana jaola au nabotho phei geghesu ka ghahegna re, namnoi ka keha ghahe na, eghuteuna namnoi ka keha ghahe na.

⁷ Mae igne fahaehaghe fara cheke fadiꞌani armigna Israel. Eghume mae Jonatan thugna mae Simea, thabusigna King Devet, mana tei ne aknu falehe goigholi igne.

⁸ Goigholi igre vikegna mae Rafa, maegna Gat, eghuteuna mae Devet balu nogna soldia tei ne kafe aknu falehe ne hui goigholi igre.