Ululahu Kronikols 19 - Buka Blahi Ka Cheke Holo

King Devet ne uludi phei armidi Amon ghe Siria

¹ Nahas king gna Amon na ne lehe. Aonu mae Hanun thugna mana na neke kegra king tughuni mae kmagna na.

² Eghuteuna mae Devet ne cheke eghu, “Iara magnahaghei te fofodu ka King Hanun, jateula teke eni King Nahas kmagna mana teke famane fofodu ka iara ia eghu.” Aonu mana ne kurudi keha mae mala tei cheke diꞌanagnafa ka King Hanun eigna te lehe kmagna mana na. Kate tei posa mae igre ka namono Amon na,

³ mae biꞌodi Amon igre ne cheke eghu ka mae Hanun, “Ne kuru mei mae Devet mae igre mala cheke diꞌanagnafa nei fafnaknoni mae kmamu neu sagho gaoghathomu na ia? Theo. Mana kuru mei mae igre mala filodi kolho gobigna lepo te au ka namono igne, mala tangomana mana te mei goigoni ni namono igne eghu kolho si mana gnea.”

⁴ Aonu King Hanun nomhini cheke igne ne loku famaku nogna tothoghei mae King Devet igre. Eghuteuna mare ne ghoighori kaisei phile gremohodi re, eghuteuna kusu fakmoꞌei nodi pohere mala tangomana naiknore te filodi pesidi mare re, gnafa teuna ame ke kuru fapulodi nga.

⁵ Nu mare ne thono mamaja nodi fara teke posa mei ka sugadire. Kate nomhini King Devet eigna puhi igne, mana ne fatei cheke ne cheke eghu ka mare, “Te keli na ghotilo au ghu jare Jeriko ghilei ke thugru gremohomi are, ame ke pulo meinga ghotilo eghu.”

⁶ Kate nomhini King Hanun nei hatimare mae biꞌodi Amon gre eghu te diꞌatagna fara King Devet ka mare na, mare ne foli tolufulu fati thogha kilo silva mala hata chariot mala magra ka maedi Naharaem, maedi Maka, maedi Soba nei maedi Siria.

⁷ Mare ne hata tolufulu phei thogha soldia mala saghe ka chariot, nei nogna armi king gna Maka la ngau eghu. Mare kafe mei ne au Medeba mala magra. Eghuteuna soldiadi Amon gre ne jifla mei ka namonodi re tarabana mala magra.

⁸ Kate nomhini King Devet puhi igne, mana ne kuruni mae Joab balu nogna armi mala tei magra ka mare.

⁹ Aonu soldiadi Amon gre mare tei ne kegra ka nabrou ke kosi grengathagna namono biꞌo Raba, mare tarabana mala magra jare. Eghuteuna nodi soldia king di Siria, mare tarabana mala magra ke kosigna namono igne, ka vido te theo kaisei gaju tagna.

¹⁰ Mae Joab ne filodi hatimare mae naoka te mei ke ulugna nei ke leghugna teu mala magra ka mana teu igre. Aonu mana ne vavahi nogna soldia te thofno keli fara nei nheta fara teu igre ne fakegradi ka vido aheva te mei soldia di Siria.

¹¹ Eghuteuna keha soldia re, mana ne lisa lao ka khamegna mae Abisae, mae thabusigna na, eghuteuna mae Abisae ne fakegradi mare ka vido aheva te mei soldia di Amon.

¹² Mae Joab ne cheke eghu ka mae thabusigna na, “Jame te filoni iagho armigna Siria te ulu ghau iara na, iagho ginauna mei togho ghau iara, eghuteuna jame te filoni iara armigna Amon te ulu nigho iagho na, iara ginauna ari togho nigho iagho.

¹³ Iagho thosei mhaghu! Iagho magra heta mala fakarhidi noda naiknora, nei nogna namono God teke tusu mei ka tahati igne. Iara laseni, Lord ginauna eni unha mana te magnahagheni.”

¹⁴ Aonu mae Joab baludi nogna soldia re ne tugha faꞌulu mala magra ka soldia di Siria, nu soldia di Siria igre ne rikha kolho.

¹⁵ Eghuteuna kate filoni te rikha soldia di Siria igre, soldia di Amon gre jaola ne rikhani mae Abisae, eghuteuna mare tei ne ruma ka nodi namono mare na. Ke leghu, mae Joab ne theome magra ka armigna Amon, nu mana neke pulo kolho Jerusalem.

¹⁶ Kate filoni armigna Siria gne te theome tangomana mare te uluni armigna Israel, mare ne kuru teidi keha mae mala hata mei keha soldia di Siria te au teu ka keha phile Khoꞌu biꞌo Iufretis mala mei toghodi mare. Aonu mae Sofak nogna komanda biꞌo King Hadadesa igne batudi ne mei nogna soldiare.

¹⁷ Kate nomhini King Devet unha te eni soldia di Siria igne, mana kilo meidi ne gnafa soldia di Israel. Aonu mana ne batudi mare ne kasa ka Khoꞌu biꞌo Jordan ne tei namo ka vido aheva te au teu armigna Siria. Aonu mae Devet ne tarabana armigna Israel mala magra ka armigna Siria. Eghuteuna armigna Aram igne ne magra ka nogna armi mae Devet.

¹⁸ Nu armigna Israel igne ne magra heta fara ne ngolhi fapulodi mare. Ka narane tuana, nogna armi mae Devet igne ne aknu falehe fitu thogha soldia te saghe te magra ka chariot, nei keha fati thogha soldia langau eghu. Eghuteuna mare jaola ne akni faleheni mae Sofak, nodi komanda biꞌo armigna Siria.

¹⁹ Kate filoni hatimare mae king te au ke parigna nogna nolaghi King Hadadesa gre te theome tangomana armigna Siria te uluni armigna Israel igne, mare tirodi teke magra ka mae Israel, nu mare magnahaghei te mei au ka pharikeli ke parigna King Devet. Eghuteuna ke leghugna igne, naiknodi Siria gre ne theome magnahaghei teke toghodi naiknodi Amon.