Ululahu Kronikols 18 - Buka Blahi Ka Cheke Holo

Mae Devet ne uludi nogna naokare

¹ Kaisei fata ke leghu igne, King Devet baludi nogna soldia re tei ne magra ka armi gna Filistia. Armi gna Israel ne uluni magra igne ne hata namono Gat baludi keha namono te au faligohoni namono tuana.

² Keha fata na, mae Devet tei ne magra ka naiknodi Moab, eghuteuna mana ne uludi mare, aonu maedi Moab gre ne au ke parigna nogna nolaghi mana, eghuteuna mare ne foli takis ka mana.

³ Eghuteuna keha fata na, mae Devet baludi nogna soldia re tei ne magra ka naiknodi Hamat rhegna Khoꞌu biꞌo Iufretis mala au mare ke parigna nogna nolaghi mana. Mana ne uluni King Hadadesa mae ihei te king Soba kaisei namono biꞌo ka kantri Siria.

⁴ Nogna armi mae Devet igne ne hata ka King Hadadesa kaisei thogha chariot mala magra, fitu thogha soldia te saghe ka chariot, nei varadaki thogha soldia. Eghuteuna mana ne hata kaisei gobi hose mala korho chariot ka magra. Nu keha hose re mare ne kusu naula ka ghahedire mala theome tangomana reꞌe te chari na.

⁵ Ka narane igne soldia di Siria te au Damaskas igre mei ne toghoni King Hadadesa, nogna armi King Devet igne ne aknu falehe varadaki phei thogha soldia ka magra igne.

⁶ Eghuteuna mae Devet ne lisei faleghu kmana soldia mala au jare Damaskas. Aonu naiknodi Siria ne mei au ke parigna nogna nolaghi mae Devet, eghuteuna mare ne foli takis ka mana. Namono aheva te tei magra mae Devet na, Lord toghoni mana.

⁷ Mae Devet ne filodi greoreo teke horo ka gol teke hata nogna komanda mae Hadadesa igre hata ne mei Jerusalem.

⁸ Mae Devet jaola neke hata kmana bras ka phei nogna namono biꞌo mae Hadadesa, Tibhat ghe Kun. Keha finogha ke leghudi igre, King Solomon hata bras igre neke horo tangk biꞌo malagna Sugablahi na, nei phei khegra biꞌo, nei keha glepo langau eghu ka Sugablahi igne.

⁹ Kate nomhini King Tou thoutonu eigna mae Devet te uluni nogna armi King Hadadesa igne,

¹⁰ mana ne kuruni mae thugna na, mae Hadoram ne tei cheke fakelini mae Devet. King Tou jaola ne kelitagna fara te nomhini mae Devet te uluni King Hadadesa igne, naugna mana neke magra ka mae Hadadesa kmana fatahi. Ka narane igne, mae Hadoram hata ne mei keha namha teke horo mare ka gol, silva nei bras, ne tusu lao ka King Devet.

¹¹ Aonu King Devet ne fablahidi glepo igre mala nogna Lord. Tuana unha te eni mana ka silva nei gol eghu teke hata mana ka teke uludi mana naiknodi Idom, naiknodi Moab, naiknodi Amon, naiknodi Filistia nei naiknodi Amalek.

¹² Kaisei fata ke leghu, mae Abisae thugna Seruia igne, mana batuni nogna armi mae Devet na ne tei aknu falehe nabotho nhana thogha maedi Idom ka glogu te kiloi, “Glogu mala hata tahi.”

¹³ Eghuteuna mae Abisae ne lilisei kmana soldia ka nogna tothoghei armi na mala reireghidi kmana namono Idom, eghuteuna kmana naiknodi Idom ne au ke parigna nogna nolaghi mae Devet. Ka vido aheva te tei magra mae Devet igre, Lord toghoni koba mana mala uludi magra tuare.

Nogna mae biꞌo King Devet

¹⁴ Mae Devet ne funei frunidi vido te gnafa Israel, eghuteuna mana reireghi fakelidi naiknore ka puhi te keli nei doglo.

¹⁵ Ka narane igre, mae Joab thugna Seruia igne, mana kaisei mae komanda biꞌo fara ka armi. Mae Jehosafat thugna Abihu igne, mana mala rioriso soru ka buka nogna cheke king.

¹⁶ Mae Sadok thugna Ahitub ghe mae Ahimelek thugna mae Abiata, phiamae igre mae pris. Eghuteuna mae Savsa gne mae mala rioriso soru nogna cheke king re.

¹⁷ Mae Benaea thugna Jehoeada igne mana nodi komanda mae te mala reireghini King Devet. Eghuteuna thugna mae Devet igre, mare jaola mae biꞌo ka gavman.