Ululahu Kronikols 17 - Buka Blahi Ka Cheke Holo

Lordne nhaꞌa cheke ka King Devet

¹ Kate au teu ka nogna suga biꞌo na, King Devet ne cheke eghu ka Profet Natan, “Iara gognarona au ka famane suga biꞌo teke horo ka thaba gaju sida, nu nogna Bokis Blahi Lord na au kolho ka suga tapuale.”

² Aonu Profet Natan ne cheke eghu ka king, “Jame mala eni kaisei glepo teu iagho ka gaoghathomu na, iagho na eni naugna Lord na au balumu iagho.”

³ Nu ka grafi tuana, Lord ne cheke ka profet, ne cheke eghu,

⁴ “Iagho tei cheke eghu ka mae Devet, nogu mae gloku iara ia, ‘Lord neke cheke eghu: Theome iagho te mala eni kaisei suga te mala au iara na.

⁵ Funu ka narane te hata fajifladi iara Ijep kuꞌemi ghotilo tifa ra, te ghilei mei posa gognarogne, iara neke theome au ka suga. Leuleghu fata na iara neke tei tafri baludi mare, eghuteuna iara neke au kolho ka suga tapuale.

⁶ Iara neke chekedi hatimare mae lida mala fiofilodi nogu naikno iara gre, nu ka namono aheva te tei iara baludi mare na, iara neke theome ghusna eghu ka mae lida igre: Naugna unha si ghotilo te theome eni nogu suga iara ka thaba gaju sida gnea?’ ”

⁷ Lord ne cheke eghu ka mae Natan, “Iagho tei cheke eghu ka nogu mae gloku iara Devet, ‘Lord mae ihei te au nolaghi fateote'o igne ne cheke eghu: Iara neke hata fajifla nigho iagho kani reireghi sipu teku iagho ia, eghuteuna vahi nigho iagho mala nodi lida nogu naikno iara Israel.

⁸ Funu tifa te mei na iara neke au balumu iagho ka vido aheva te tei iagho na. Iara neke togho nigho iagho neke tapla faparidi nei uludi neku iagho nou naoka ra. Eghume, iara ginauna tusu ranghi nigho iagho nafnakno biꞌo, salaꞌudi lida te gnafa teke fnakno fara tifa ra ghilei mei posa ka narane gognarogne.

^9-10 Iara neke vahinihi kaisei vido glose malami ghotilo nogu naikno iara Israel ra, eghuteuna iara magnahaghei ghami ghotilo te au fakeli ka vido glose igne. Eghuteuna ginauna theo kaisei naikno te diꞌa nate mei te goigoni ghami ghotilo jateula teke edi mare tifa ra teuna. Funu ka narane teke hata kuꞌedara vido glose igne nei ka naranedi hatimare mae funei teke vavahi iara ra teuna, hatimare mae naoka neke mei goigoni ghami ghotilo. Nu gognarona iara na togho ghami ghotilo mala au kmu naugna iara la uludihi nomi naoka ghotilo re. “ ‘Eghuteuna te chekeni iara ka ghotilo na, iara ginauna vahini koba kaisei mae ka vikemi ghotilo gne te mala nomi king ghotilo na.

¹¹ Kate lehe iagho na, mare na giugilu nigho iagho baludi kuꞌemu ra, eghuteuna iara ginauna vahini kaisei mae thumu iagho mala ke king tughu nigho iagho. Eghuteuna iara ginauna toghoni mana mala kegra heta fabrahu.

¹² King igne ginauna horo nogu suga iara na, eghuteuna iara ginauna vahini koba kaisei mae ka vikegna mana na te mala king na.

¹³ Iara ginauna mala kmagna mana, eghuteuna mana ginauna mala thugu iara. Iara ginauna theome gnafa te ghatho tahuni mana na, jateula teke eni iara ka King Sol kani teke nhaꞌa soruni iara mana ka nogna sape nafnakno na teke fakegra king tughuni mana iagho gne eghu.

¹⁴ Eghume ihei te king ka vikemu iagho igne, iara ginauna tusu lao nolaghi ka mana mala funei fruni ni fabrahu Israel nei nogu naikno iara igre eghu.’ ”

¹⁵ Aonu mae Natan tei ne cheke ka King Devet unha teke nomhidi mana ka mifi igne eidi unha teke chekedi God ka mana re.

King Devet tarai ne cheke tegio kaLord

¹⁶ Aonu King Devet tei ka Suga Tapuale te Blahi na ne gnokro ke ulugna nogna Bokis Blahi Lord na. Mana ne tarai eghu, “Lord God, iara nei tharaknagu iara teugre theo nafumi kolho. Neuba, iagho thofno keli fara ranghi ghau iara.

¹⁷ God, eidi gobigna lepo te chekedi iagho unha nate thoke mei nathuꞌu nauriha ka vikegu iara gne thofno keli fara salaꞌudi unha glepo teke edi iagho ka iara tifa ra. Iara khogla naikno kolho, nu iagho Lord God, iagho eni kaisei glepo te thofno keli fara ka iara.

¹⁸ “Unha nafnata cheke gne nate chekeni iara ka iagho na? Iara nou mae gloku iagho kolho, iagho lase fakeli ghau iara fara.

¹⁹ Glepo biꞌo te edi iagho igre jifla mei ka gaoghathomu iagho kolho, eghuteuna thofno jifla mei jateula teke nhaꞌa chekeni iagho ia eghu. Eghuteuna iagho snakre ghau iara te mala lasedi glepo igre.

²⁰ “Lord, iagho thofno haghe fara! Theo kaisei jateula iagho teuna. Ghehati nomhini ka kuꞌemi ra te kaisei iagho ngala God na.

²¹ Theo kaisei ka keha naikno ka nauthoglu igne te jateula nou naikno iagho Israel igre teuna. Iagho neke fakarhidi mala tangomana naikno te gnafa igre te laseni nanghamu iagho te haghe fara na. Iagho neke hata fapulodi Israel nou naikno themu teke au sosolo Ijep, eghuteuna iagho neke edi kmana glepo te thono biꞌo fara kani teke brue fajifladi iagho keha naiknore ka namono igne.

²² Iagho neke vahidi naiknodi Israel igre mala nou naikno iagho fabrahu, eghuteuna iagho Lord nodi God mare.

²³ “Lord, u nhaꞌa cheke teke eni iagho ka iara nei ka vikegu iara gre teu igne mala au fabrahu tifa tifa. Iara tore nigho iagho mala edi iagho unha teke nhaꞌa chekedi iagho ra.

²⁴ Te eghu iagho na, naikno te gnafa gre ginauna pala hagheni fabrahu nanghamu iagho na. Naiknore ginauna chekeni te Lord mae ihei au nolaghi fateote'o igne nodi God naiknodi Israel. Eghuteuna vikegu iara igne ginauna rheta fabrahu mala nodi king mae Israel.

²⁵ “Nogu God, iagho falalase ka iara eigna iagho ginauna toghoni vikegu iara igne mala rheta fabrahu, eghuteuna king igne ginauna au fabrahu ka vike igne. Eghume, iara theome mhaghu te tore ari ka iagho na.

²⁶ Lord, iagho God. Iara tangomana te rouronu ka nou nhaꞌa cheke iagho te mala edi glepo te keli ka iara nou mae gloku gne.

²⁷ Gognarona iara tore nigho iagho mala fablahini vikegu iara gne, mala au ka pharikeli fabrahu ke parimu iagho. Lord iagho neke chekehi, jame te fablahini iagho vikegu iara gne na, iara ginauna laseni iagho ginauna fablahidi mare fabrahu.”