Ululahu Kronikols 15 - Buka Blahi Ka Cheke Holo

King Devet tarabana mala hata ke tei Jerusalem Bokis Blahi na

¹ King Devet ne edi nogna sugare Jerusalem. Eghuteuna mana jaola ne tarabana kaisei vido te mala eni kaisei suga tapuale te mala lilisei gna nogna Bokis Blahi God na.

² Aonu mana ne cheke eghu, “Hatimare mae Livaet kolho te au nodi nolaghi te mala palagna nogna Bokis Blahi God na, naugna Lord neke vahidi mare te mala pala na, nei mala loku ranghini mana.”

³ Eghuteuna mae Devet ne kilo fodudi hatimare maedi Israel Jerusalem mala ke tei pala fapulo nogna Bokis Blahi Lord igne mala lilisei ka vido aheva teke tarabanahi mare na.

⁴ Eghuteuna mae Devet jaola ne kilo fodudi hatimare mae pris ka vikegna mae Eron, nei keha mae Livaet langau eghu.

⁵ Ka vikegna mae Kohat, mae Uriel te funei ka kaisei gobi varadaki mae kheragnare.

⁶ Ka vikegna mae Merari, mae Asaea te funei ka phia gobi varadaki mae kheragnare.

⁷ Ka vikegna mae Geson, mae Joel te funei ka kaisei gobi tolufulu mae kheragnare.

⁸ Ka vikegna mae Elisafan, mae Semaea te funei ka phia gobi mae kheragnare.

⁹ Ka vikegna mae Hebron, mae Eliel te funei ka nhanasalei mae kheragnare.

¹⁰ Ka vikegna mae Usiel, mae Aminadab te funei ka kaisei gobi nabotho phei mae kheragnare.

¹¹ Mae Devet ne kilodi Pris Sadok ghe Pris Abiata baludi mae Livaet igre: mae Uriel, mae Asaea, mae Joel, mae Semaea, mae Eliel nei mae Aminadab.

¹² Mana ne cheke eghu ka mare, “Ghotilo mae funeidi hatimare mae Livaet ra. Ghotilo baludi mae kherami are mala fagae ghami themi ka tathagna Lord. Naugna ghotilo tangomana pala te mei nogna Bokis Blahi Lord nodi God mae Israel igne ka vido tela tarabanahi iara ia.

¹³ Tifeiro na ghotilo mae Livaet gre neke theome pala neke mei Bokis Blahi igne, naugna igne Lord neke para ghita tahati. Tahati neke theome ghusnani eigna thofno puhigna te mala palagna Bokis Blahi igne.”

¹⁴ Aonu hatimare mae pris nei hatimare mae Livaet eghu ne fagaedi thedi ka tathagna Lord mala tangomana mare te pala te mei Bokis Blahi igne.

¹⁵ Eghuteuna kate pala mae Livaet gre Bokis Blahi igne, mare ne thofno leghuni vetula te mala palagna Bokis na, jateula teke chekeni Lord ka mae Moses tifa ia neu. Mare pala ka phei gaju brahu ka fafradire pala ne tei Bokis Blahi igne.

¹⁶ Eghuteuna mae Devet ne cheke ka mae funeidi mae Livaet igre mala vavahi keha mae mala koje ka gita, ka babuban, ka khodili nei ka sesele, fagaglanagna nodi glealeꞌa na kate pala te mei mare Bokis Blahi igne.

^17-21 Nanghadi mare re igre: Mae Heman, thugna mae Joel, eghuteuna mae Asaf, thugna mae Berekaea, eghuteuna mae Etan, thugna mae Kusaea ka vikegna mae Merari, thilo mae igre mala lalahu ka babuban. Mare vahidi mae Sekaraea, mae Jasiel, mae Semiramot, mae Jehiel, mae Uni, mae Eliab, mae Masea, mae Benaea mala lalahu ka khodili leghuni naoglagna glepo te kiloni mare Alamot. Te mala lalahu ka gita biꞌo igre te mala leghuni naoglagna glepo te kiloni mare Seminit igne, mare ne vahidi mae Matitaea, mae Elifelehu, mae Miknea nei mae Asasaea, eghuteuna mae Obed-Idom ghe mae Jel phia mae mala reireghigna Sugablahi na.

²² Naugna te lase koje fara mae Kenanaea igne, mare ne vahini mana mala mae funeidi mae te koje igre.

^23-24 Eghuteuna mare vahidi mae Berekaea, mae Elkana, mae Obed-Idom, mae Jehaea mala reireghigna Sugablahi igne. Eghuteuna mae Devet ne vahidi mae pris te mae Sebanaea, mae Josafat, mae Netanel, mae Amasae, mae Sekaraea, mae Benaea, nei mae Eliesa mala tei ke ulugna nogna Bokis Blahi God na balu kufli.

Nogna Bokis Blahi God na ne tei Jerusalem

²⁵ King Devet baludi hatimare mae funeidi Israel, nei hatimare mae komanda gna kaisei thogha soldia teu igre ne tei hata fajifla ka nogna suga mae Obed-Idom na nogna Bokis Nhaꞌa Cheke Lord igne pala ne tei balu glealeꞌa.

²⁶ Eghuteuna ka narane pala te tei mae Livaet igre nogna Bokis Nhaꞌa Cheke Lord na, Lord ne toghodi mare. Eghuteuna mae pris gre ne fafara fitu buluka nalhaꞌudi nei fitu sipu nalhaꞌudi eghu ka mana.

²⁷ Ka narane tuana, mae Devet baludi mae Livaet te pala Bokis Nhaꞌa Cheke igne, nei mae iheire te koje igre, nei mae Kenanaea mae ihei te batuni gloku igne ne kafe pipichi famane pohe. Eghuteuna mae Devet jaola ne fahaghe famane phoko te kiloi efod ne jateula mae pris neu.

²⁸ Aonu naiknodi Israel te gnafa igre hata ne haghe Jerusalem nogna Bokis Nhaꞌa Cheke Lord na, mare ne eha fabiꞌo ne glealeꞌa fara. Eghuteuna mare kufli nei lalahu babuban nei lalahu thua nafnata gita.

²⁹ Kate pala te mei mare ke lamnagna nogna namono biꞌo King Devet nogna Bokis Blahi Lord igne na, khetogna mae Devet Mikal thugna gaꞌase mae Sol igne ne filo mei ka widagna suga biꞌo na. Naꞌa ne filoni king te glealeꞌa balu ragi te koje nei ghasa tafri teu te mala kilo fnaknoni nanghagna Lord. Aonu naꞌa ne tirogna fara te filoni nafnata puhi te eni mae Devet igne.