Ululahu Kronikols 14 - Buka Blahi Ka Cheke Holo

Unha teke edi King Devet ka namono biꞌo Jerusalem

¹ King Hiram maegna ka namono Taea, ne kurudi keha mae biꞌo mala tei filoni King Devet. Eghuteuna mana jaola fatei gaju sida, keha mae te lase kato thina, nei keha mae mala horo nogna suga King Devet. Eghuteuna mae igre mei ne horo kaisei nogna suga King Devet.

² Eghuteuna kate filodi mae Devet glepo igre, mana laseni Lord teke vahini mana te mala king gna Israel. Eghuteuna mana jaola laseni Lord te fakelini nogna kantri na, naugna Lord ne namhadi fara nogna naiknore.

³ Mae Devet ne hata kmana khetogna ne au Jerusalem, eghuteuna mana jaola ne keha nogna gaꞌase gloku. Gaꞌase igre ne karha thudi nalhaꞌu nei thudi gaꞌase eghu ka mana.

⁴ Nanghadi thugna nalhaꞌu mana teke karha Jerusalem re igre: Mae Samua, mae Sobab, mae Natan, mae Solomon,

⁵ mae Ibha, mae Elisua, mae Elpelet,

⁶ mae Noga, mae Nefeg, mae Jafia,

⁷ mae Elisama, mae Eliada nei mae Elifelet.

King Devet ne uludi soldia di Filistia

⁸ Kate nomhini naiknodi Filistia te kegra king gna Israel mae Devet na, soldia di Filistia igre tei ne hironi mae Devet mala lokini mana. Nu kate nomhini mana puhi igne, mae Devet soru ne tei magra ka mare.

⁹ Soldia di Filistia igre mei ne magra ka glogu Refaem.

¹⁰ Aonu King Devet ne tarai eghu ka God, “Faꞌunha jame te tei magra iara ka mare na, iagho ginauna togho ghau iara mala uludi mare?” Eghuteuna Lord ne cheke tughu eghu ka mana, “Uve, tei sagho magra ka mare! Iara ginauna togho nigho iagho mala uludi iagho mare!”

¹¹ Mae Devet jifla ne tei Baal-Perasim ne magra ka soldia di Filistia ne uludi mare. Aonu mae Devet ne cheke eghu, “Lord ne paradi nogu naoka iara re, jateula khoꞌu te britha te goigonidi namono ra neu.” Naugna igne mare kiloni namono igne, Baal-Perasim, gaoghathogna Baal-Perasim teu igne, “Mae funei na paradi mare.”

¹² Kate rikha soldia di Filistia igre, mare ne tei kokodi nodi mumuju re ka vido igne. Eghuteuna King Devet ne chekedi nogna soldia re mala gnubra mumuju igre.

¹³ Nu ke leghu, soldia di Filistia igre neke pulo mei ka glogu Refaem mala ke magra.

¹⁴ Aonu mae Devet ne toreni Lord unha nate eni mana na. Eghuteuna Lord ne cheke eghu ka mana, “Kate tei iagho ka vido tuana, iagho thosei doglo tei ka mare. Iagho lithui mei ke leghudi mare. Ghotilo tei kegra rhegna gaju balsam ka vido tuana mala tarabana mala magra ka mare.

¹⁵ Eghuteuna ghotilo ginauna nomhini naogla te jateula naikno te nolo ke klignadi gaju balsam ra teuna. Eghuteuna kate nomhini igne, ghotilo faghose tei magra ka mare, naugna iara na kulu tei ke ulumi ghotilo, eghuteuna ghotilo ginauna uludi mare.”

¹⁶ Aonu mae Devet ne eni jateula te chekeni Lord na neu ne tei kegra faligohoni armigna Filistia. Eghuteuna mare ne aknu falehedi ne gnafa soldia di Filistia igre funu Gibeon tei posa Gesa.

¹⁷ Eghuteuna naikno te gnafa te au heva heva ka namono te gnafa ka nauthoglu igne ne nomhini thoutonu eigna unha te eni mae Devet igne ne fafnaknoni mana, Lord neke eni igne ka mae naokare mala mhaghuni mana.