Ululahu Kronikols 13 - Buka Blahi Ka Cheke Holo

King Devet magnahaghei teke hata fapulo Bokis Blahi na Jerusalem

¹ Aonu King Devet ne cheke baludi mae komanda ka armi.

^2-3 Eghuteuna mana ne chekeni nogna gaoghatho na ka naikno te gnafadi Israel teke mei Hebron. Mana ne cheke eghu, “Te ghathoni iara na, jame te keli na tahati hata ke fapulo mei agne nogna Bokis Blahi noda God. Naugna tahati la theome ghathonihi funu ka narane teke King Sol ia. Jame te doglo ka gaoghathogna Lord noda God na, ghotilo na jaola glealeꞌa, eghuteuna tahati ginauna kurudi keha mae mala tei ka kherada Israel ra, mae pris ra, mae Livaet te au ka namono agne Israel ra, mala jifla tei heva heva mala kilo meidi mala loku fodu baluda tahati agne.”

⁴ Naiknore nomhini gaoghatho igne ne kelitadi fara ka nogna cheke mae Devet igne.

⁵ Aonu mae Devet ne fatei cheke ka naiknodi Israel te au ke mata khoꞌu biꞌo Sihoa jare Ijep, tei posa ke raru Lebo-Hamat. Mana ne kafe kilodi mare gnafa mala ke hata fapulo Bokis Blahi igne Jerusalem.

⁶ Eghuteuna mana batudi naiknodi Israel ne tei ka namono Bala, namono igne mare jaola kiloi Kiriat-Jaerim jare Juda. Mare tei mala ke hata fapulo nogna Bokis Blahi God igne. Bokis Blahi igne au nanghagna Lord, mae ihei te au nolaghi fateote'o te gnokro ka nogna sape nafnakno na ke klignadi phei engel te gnokro ke kligna gna Bokis Blahi igne.

⁷ Mare tei ka namono Bala ne tei ruma ka sugagna mae Abinadab mae ihei te tathaji ka sugagna na Bokis Blahi igne. Mare hata Bokis Blahi igne ne nhaꞌa lao ka kaisei chariot majaghani ne tei baludi. Kate tei teu mare na, mae Usa ghe mae Ahio te saghe leghuni te tei chariot igne.

⁸ Eghuteuna mae Devet baludi kmana naikno di Israel, mare nolo ne tei balu ragi fara nei koje fabiꞌo eghu mala cheke fakelini nanghagna God. Eghuteuna mare ne lalahu ka thua nafnata gita, nei nifu, nei belo nei sesele.

⁹ Kate mei mare ka nogna vido glose kaisei mae Kidon, ka vido aheva te mala fagagae bali na, phei buluka te korhogna chariot igne ne theome nolo fakeli. Aonu mae Usa ne ngafa lao khamegna na ne loku ka Bokis Blahi na.

¹⁰ Nu Lord ne thono diꞌatagna fara ka mae Usa, naugna mana theo nogna nolaghi te mala habo ka Bokis Blahi igne, aonu mana ne faleheni mae Usa. Mana khoko soru rhegna Bokis Blahi na ne lehe kolho jare.

¹¹ Eghuteuna Devet ne diꞌatagna fara, naugna Lord diꞌatagna ne parani mae Usa. Eghuteuna funu ka narane tuana te mei posa gognarogne, mare kiloni vido glose igne, “Peres Usa,” gaoghathogna Peres Usa teu igne, “Parani Usa.”

¹² Eghuteuna mae Devet ne mhaghuni Lord, ne cheke eghu, “Faꞌunha eghu ame tangomana nga iara te hata te mei Bokis Blahi igne te mala au balugu na?”

¹³ Aonu mae Devet ne theome hata ne mei Bokis Blahi igne Jerusalem. Aonu mana figri chariot igne mala tei ka keha nabrou delei, eghuteuna mana hata ne tei Bokis Blahi na ka sugagna mae Obed-Idom, maegna ka namono Gat.

¹⁴ Eghuteuna Bokis Blahi igne ne au thilo nhigra ka vido igne. Ka narane tuare Lord ne fablahini fara mae Obed-Idom balu tharaknagna.