Ululahu Kronikols 12 - Buka Blahi Ka Cheke Holo

Igre mae iheire teke au balugna mae Devet ka teke theome king teku mana na

¹ Mae Devet rikhani King Sol ne tei au Siklag. Eghuteuna kmana soldia te nheta tei ne au balugna mae Devet mala magridi nogna naoka mana re.

² Kehare ka vikegna Benjamin, igne vikegna mae King Sol. Mae igre lase fada ka phaloho nei jata, eghuteuna mare lase fada ka phiri kuava ka khame nhetadi nei ka khame maeridi. Nanghadi mae soldia re igre:

³ Mae Ahiesa ghe mae Joas phei mae thabusigna igre thugna mae Sema maegna ka namono Gibea. Eghuteuna mae Ahiesa gne nodi lida mae soldia igre. Mae Jesiel ghe mae Pelet, phei thugna mae Asmavet. Mae Beraka, ghe mae Jehu kaisei maegna ka namono Anatot.

⁴ Mae Ismaea, maegna Gibeon, mana kaisei mae lida ka tolufulu nogna soldia nheta mae Devet. Mae Jeremaea, mae Jahasiel, mae Johanan nei mae Josebad ka namono Gedera.

⁵ Mae Elusae, mae Jerimot, mae Bealaea, mae Semaraea nei mae Sefataea ka namono Harif.

⁶ Mae Elkana, mae Isaea nei mae Asarel. Mae Joesa ghe mae Jasobeam, phia mae ka vikegna mae Kora.

⁷ Mae Joela, mae Sebadaea, phei thugna mae Jeroham, maegna Gedoa.

Keha ka vikegna mae Gad mei ne toghoni mae Devet

⁸ Eghuteuna keha mae ka vikegna mae Gad mei ne loku fodu ka nogna soldia mae Devet kate poru teu mare ka namono nagou na. Mae igre thofno mae soldia nheta fara, eghuteuna mare laseni fara lokugna greoreo nei goru teu ka magra na. Naiknore mhaghu nodi fara kate filodi mare na jateula te mhaghu fara kate filoni lion ia eghu. Eghuteuna mare lase chari fara.

⁹ Igre nanghadi nogna soldia mae Gad re: Mae Esa nodi lida ululahu mare na. Fapea na, mae Obadaea. Fatilo na, mae Eliab.

¹⁰ Fafati na mae Mismana. Falima na mae Jeremaea.

¹¹ Fafamno na mae Atae. Fafitu na mae Eliel.

¹² Fahana na mae Johanan. Faheva na mae Elsabad.

¹³ Fabotho na mae Jeremaea. Eghuteuna fabotho kaisei na mae Makbanae.

¹⁴ Mae igre komanda ka armi. Eghuteuna keha mae te theome nheta ka mae igre na nabadi te magra te uludi kaisei gobi soldia, eghuteuna mae te nheta fara re nabadi magra te uludi kaisei thogha soldia!

¹⁵ Kaisei fata, ka nhigra ulu lahu ka finogha na, Khoꞌu biꞌo Jordan gne britha fabiꞌo fabrahu, mae soldia igre kasa ka khoꞌu igne ne tei magra nei brue teidi naikno te au ka glogu rhedi phei gerigna Khoꞌu biꞌo Jordan.

Keha ka vikedi mae Benjamin ghe mae Juda ne loku fodu ka mae Devet

¹⁶ Eghuteuna keha ka vikegna mae Benjamin, nei keha ka vikegna mae Juda eghu mare mei ne filoni mae Devet ka vido aheva te poru teu mana na.

¹⁷ Mae Devet jifla ne tei thafodi mare, ne cheke eghu ka mare, “Jame ghotilo te kheragu iara na, ghotilo mei mala togho ghau iara, iara ginauna kelitagu fara te mei ghotilo te loku fodu ka iara na. Nu ghotilo laseni, jame ghotilo mei te mala lisa lao ghau iara ka khamedi nogu naoka re, nodi God mae kuꞌeda ra ginauna laseni glepo igne, eghuteuna mana ginauna para ghami ghotilo.”

¹⁸ Eghuteuna tharunga gna God na ne mei ka mae Amasae mae ihei te lida ka tolufulu soldia te nheta igre ne eha eghu fabiꞌo, “Devet, thugna mae Jesi! Ghehati nou iagho gognaro na! Iagho ginauna tangomana nate uludi magra re. Iara toreni God mala tusu ranghi nigho iagho nei iheire te au balumu nogna nolaghi nei pharikeli.” Aonu mae Devet ne kelitagna fara ka mare, eghuteuna mana ne vahidi mare mala batudi tothoghei soldia teke tei blau glepo ka nodi namono mae naoka re.

Keha mae ka vikegna mae Manase ne loku fodu ka mae Devet

¹⁹ Kani teke loku fodu mae Devet baludi mae king di Filistia te mala tei magra ka King Sol tifa na, keha mae ka vikegna mae Manase igre magnahaghei te mei mala loku fodu ka mana. Nu king di Filistia igre ne mhaghu nodi, glahu chaghidi mae Devet na lisa laodi ka khamegna King Sol, aonu mare ne kuru fapuloni mana ka namono Siklag, mala theome eni mana kaisei glepo te mala toghodi mare na.

²⁰ Vikegna mae Manase te loku fodu ka mae Devet re igre: Mae Adna, mae Josabad, mae Jediael, mae Maekol, nei keha Josabad, mae Elihu, nei mae Siletae. Mae igre lida ka kaisei thogha soldia eghu ka vikegna mae Manase.

²¹ Mae soldia te nheta igre mei ne loku fodu ka mae Devet, eghuteuna mana ne vahidi mare mala komanda ka nogna soldia re. Mae igre te magridi nogna naoka mana re.

²² Leuleghu narane na mae te mei loku fodu ka mae Devet igre nogna armi mana na ne ghilei kmana soldia, ne nheta jateula nogna armi God neu.

Nogna soldia mae Devet

²³ Kate au teu mae Devet ka namono Hebron, kmana soldia te nheta ne mei loku fodu ka nogna soldia mana re. Mare ne toghoni mana mala king tughuni King Sol, leghuni unha teke nhaꞌa chekeni Lord. Mae igre te hata mare te mala tei ka magra na:

²⁴ Ka vikegna mae Juda, mare au namno thogha, nhana gobi soldia balu nodi greoreo nei goru mala magra.

²⁵ Ka vikegna mae Simion, mare au fitu thogha, kaisei gobi soldia tarabana mala tei ka magra.

²⁶ Ka vikegna mae Livae, mare au fati thogha, namno gobi soldia.

²⁷ Eghuteuna mae Jehoada mae lida ka vikegna mae Eron ne hata thilo thogha, fitu gobi soldia.

²⁸ Eghuteuna mare jaola ne hata mae Sadok mae ihei te mae nheta tulao ka magra, eghuteuna mana hata ne mei balugna varadaki phei nogna mae lida.

²⁹ Ka vikegna mae Benjamin, mare au thilo thogha soldia, tifa na mare neke ghatho tahuni King Sol.

³⁰ Ka vikegna mae Efrem, mare au varadaki thogha, nhana gobi soldia te nheta tulao, eghuteuna naikno te gnafa ka vikedi mare na ghatho tahudi mae igre.

³¹ Kaisei vido gaga ka vikegna mae Manase ke mosu Khoꞌu biꞌo Jordan, mare au nabotho nhana thogha soldia. Mare vavahi mae igre mala tei Hebron mala king mae Devet.

³² Ka vikegna mae Isaka, mare au phei gobi ofisa balu nodi soldia. Mae ofisa igre au tadi gaoghatho te keli, nei lasedi unha glepo te thoke mei ba unha glepo te edi naiknodi Israel.

³³ Ka vikegna mae Sebulun, mare au glima fulu thogha soldia te nheta tulao. Mare kaisei gaoghatho kolho te mala toghoni mae Devet ne mei balu nodi thua nafnata glepo mala magra.

³⁴ Ka vikegna mae Naftali, mare au kaisei thogha lida nei tolufulu fitu thogha soldia. Eghuteuna mare mei balu nodi greoreo nei goru mala magra.

³⁵ Ka vikegna mae Dan, mare au varadaki nhana thogha, namno gobi soldia. Mare tarabana koba mala tei ka magra.

³⁶ Ka vikegna mae Asa, mare au phiatutu thogha soldia te nheta tulao. Mare jaola tarabana koba mala magra.

³⁷ Eghuteuna thilo vike te au ke maghati Khoꞌu biꞌo Jordan, vikegna mae Ruben, vikegna mae Gad, nei kaisei vido gaga ka vikegna mae Manase, mare au kaisei gobi varadaki thogha soldia, mare mei balu nodi thua nafnata glepo mala magra.

³⁸ Mae soldia igre kelitadi kolho te loku fodu ka nogna armi mae Devet. Mare ne kafe mei ka namono Hebron, eghuteuna mare ne kaisei gaoghatho ngala ka mae Devet te mala king gna Israel. Tutuani, naiknodi Israel te gnafa igre jaola ne au nafnata gaoghatho igne.

³⁹ Mae soldia igre ne au thilo narane Hebron balugna mae Devet. Kheradi mae igre ne tarabana kmana gano nei khoꞌu eghu, eghuteuna mare ne ei gaghamu biꞌo nabagna thilo narane.

⁴⁰ Eghuteuna naiknodi Israel te au ke rarudi thilo provins Isaka, Sebulun nei Naftali teu igre hata gano ne mei Hebron ka mare. Mare luja ne mei ka dongki nei kamel eghu kmana flaoa, sisi gaju fig, sisi grep te moja, waen nei oliv oel, eghuteuna mare jaola hata mei buluka nei sipu eghu te mala ghamu mare na. Mare ne edi gobigna lepo igre, naugna naikno te gnafa Israel igre ne thofno kelitadi ne glealeꞌa fara.