Ululahu Kronikols 11 - Buka Blahi Ka Cheke Holo

King Devet neke kegra king gna Israel

¹ Eghuteuna lida te gnafa ka vikegna Israel igre mei ne filoni King Devet Hebron. Eghuteuna mare ne cheke eghu ka mana, “Tahati te gnafa na, tahati kaisei thabusigna kolho.

² Tifa na Sol neke king fruni ghita tahati, nu neuba iagho nake batu ghami ghehati mala tei ka magra. Eghuteuna Lord na cheke ka iagho mala reireghi ghami ghehati nogna naikno mana re, eghuteuna iagho ginauna nomi king ghehati.”

³ Aonu, lida te gnafa Israel igre ne kafe mei Hebron, eghuteuna mae Devet ne eni kaisei nhaꞌa cheke ka mare ke ulugna Lord. Mare tofa oel ka phaꞌugna mana na, fagaglanagna te king gna Israel mana na, jateula teke chekeni Lord ka Profet Samuel tifa ia eghu.

King Devet ne hata Jerusalem

⁴ King Devet ne tei balugna armigna Israel na ne magra Jerusalem, eghuteuna vikegna mae Jebus gne teke au ka namono igne.

⁵ Maedi Jebus te au ka namono igne diꞌatadi ne cheke eghu ka mae Devet, “Ghotilo theome tangomana te ruma mei ke lamnagna nomi namono ghehati igne!” Nu neuba, mae Devet ne uluni namono te rheta fara igne. Nanghagna namono igne Saion. Nu ke leghu na naiknore kiloni namono igne, “Nogna Namono biꞌo mae Devet.”

⁶ Ka narane te uluni mae Devet namono biꞌo Jerusalem igne, mana ne cheke eghu ka nogna soldia re, “Mae ihei te kulu tei te mala magra ka vikegna mae Jebus, mana ginauna mala komanda ka nogu armi iara na!” Eghuteuna mae Joab thugna Seruia igne ne kulu haghe, aonu mana ne komanda ka nogna armi mae Devet.

⁷ Namono igne kaisei namono rheta fara. Eghuteuna kate uluni mae Devet namono igne, naiknore ne kiloni namono igne, “Nogna Namono biꞌo mae Devet.”

⁸ Mana neke eni fabiꞌo namono igne. Mana neke fufunu ke maghati ka vido teke fafofodu glose mare igne. Ka narane igre, mae Joab neke fakekheli keha vidogna Jerusalem.

⁹ Nogna nolaghi mae Devet na rheta fara, naugna Lord mae ihei te au nolaghi fateote'o igne ne au fabrahu balugna mana.

Nogna soldia mae Devet igre au nodi nafnakno biꞌo

¹⁰ Lida te gnafa ka vike te gnafa Israel igre ne toghoni mae Devet mala king leghuni unha teke nhaꞌa chekeni Lord. King Devet ne au nogna soldia te keli, mae iheire te thofno toghoni mana te kaisei mae king rheta.

¹¹ Igre nanghadi nogna soldia keli mana re: Ulu lahu na mae Jes-Baal ka vikegna mae Hakmon. Mae igne mae funeidi thilo mae soldia te rheta tulao. Ka kaisei magra na mana neke fada falehe thilo gobi soldia ka nogna goru na.

¹² Eghuteuna fapea mae te rheta fara ka thilo mae soldia igre na mae Eleasa thugna mae Dodae ka vikegna mae Ahohi.

^13-14 Kaisei narane mae Eleasa au neku balugna mae Devet ka namono Pas-Damim ka teke mei soldia di Filistia igre teke magra ka kaisei nagare bali na, nu soldia di Israel igre neke kafe rikha. Mae Eleasa ghe mae Devet kolho teke magra heta teke aknu falehe soldia di Filistia. Ka narane tuana, Lord neke toghodi phiamare neke thofno uludi mare.

¹⁵ Kaisei fata, thilo mae lida ka tolufulu soldia te nheta fara igre neke tei ka mae Devet rhegna gluma thina Adulam. Ka narane igne, kaisei tothoghei armigna Filistia au neu ka glogu Refaem.

¹⁶ King Devet au neu ka kaisei vido keli holo ka thogele na, eghuteuna kaisei tothoghei armigna Filistia ne hata namono Betlehem.

¹⁷ Mae Devet ne magnahaghei koꞌu fara. Aonu mana ne cheke eghu, “Iara ginauna kelitagu fara, jame kaisei mae tei hata ghegu khoꞌu keli iara ka seu rhegna grengathagna namono Betlehem!”

¹⁸ Thilo mae soldia te nheta fara igre nomhini igne kegra haghe ne tei ka vido aheva te au teu soldia di Filistia tagna na, eghuteuna thilo mare doglo ne tei fari hoteidi mare ne tei hata khoꞌu ka seu igne hata neke figri ka mae Devet. Nu mana ne theome koꞌu khoꞌu igne, mana ne totofa khoꞌu igne jateula kaisei nogna fafara ka Lord neu ne tarai eghu,

¹⁹ “Lord God, iara theome tangomana te koꞌu khoꞌu igne, eigna jateula dadaradi eghu thilo mae te snakreni nakarhadi na!” Eghume naugna thilo mae igre te theome nangani nakarhadi thedi na, mae Devet ne theome koꞌu khoꞌu igne. Igre glepo biꞌo teke edi thilo mae soldia te nheta fara igre.

²⁰ Abisae thabusigna mae Joab, mana lida ka tolufulu soldia te nheta. Kaisei fata mae Abisae neke magra ka thilo gobi soldia neke fada falehedi neke gnafa ka nogna goru na. Naugna igne te hata mana u nangha biꞌo jateula thilo mae soldia te nheta igre teuna.

²¹ Nanghagna mae Abisae gne thono fnakno fara ke uludi keha thiloi mae igre, neuba mana ne theome thokedi nodi naba thilo mae igre, mana nodi lida mare.

²² Mae Benaea, thugna mae Jehoeada ka namono Kabsel, mana kaisei mae soldia nheta te jaola te hata nangha biꞌo eidi glepo biꞌo teke edi mana re. Kaisei glepo na, mana neke aknu falehe phei soldia nhetadi Moab. Eghuteuna keha fata ka narane te reka fara na khoveo te kiloni snou na ne soru toku tafru namono na, mana soru ka kaisei khora ne aknu falehe kaisei lion jare.

²³ Eghuteuna kaisei fata mana neke aknu falehe kaisei maegna Ijep. Brahugna mae igne namo thokeni phei mita vidogna. Maegna Ijep igne mana hata ne mei balugna kaisei goru te biꞌo. Eghuteuna mae Benaea hata koko ka mana goru biꞌo igne ne fada falehe mae igne ka nogna goru thegna na.

²⁴ Igre glepo biꞌo teke edi mae Benaea re. Mana jaola ne hata nangha biꞌo jateula thilo mae soldia te nheta ra neu.

²⁵ Ka thilo mae soldia igre, nanghagna mana na ne haghe, nu mana theome thokedi nodi naba thilo mae igre. King Devet ne vahini mae Benaea mala mae funeidi hatimare mae soldia te mala reireghini king.

²⁶ Igre nanghadi nogna soldia mae Devet te nheta fara re: Mae Asahel, thabusigna mae Joab. Mae Elhanan, thugna mae Dodo, maegna ka namono Betlehem.

²⁷ Mae Sama, maegna ka namono Harod. Mae Heles, maegna ka namono Pelon.

²⁸ Mae Ira, thugna mae Ikes, ka namono Tekoa. Mae Abiesa, maegna ka namono Anatot.

²⁹ Mae Sibekae, maegna ka namono Husa. Mae Ilae, maegna ka namono Ahohi.

³⁰ Mae Maharae, maegna ka namono Netofa. Mae Heled, thugna mae Bana ka namono Netofa.

³¹ Mae Itae, maegna ka namono Gibea, thugna mae Ribae ka vikegna mae Benjamin. Mae Benaea, maegna ka namono Piraton.

³² Mae Hurae, maegna ka glogu Gas. Mae Abiel, maegna ka namono Aba.

³³ Mae Asmavet, maegna ka namono Baharum. Mae Eliaba, maegna ka namono Salbon.

³⁴ Hatimare thugna mae Hasem, maegna ka namono Gison. Mae Jonatan, thugna mae Sagi, maegna ka namono Harari.

³⁵ Mae Ahiam, thugna mae Sara, maegna ka namono Harari. Mae Elifal, thugna mae Ur.

³⁶ Mae Hefa, maegna ka namono Mekerat. Mae Ahaeja, maegna ka namono Pelon.

³⁷ Mae Hesro, maegna ka namono Kamel. Mae Narae, maegna ka namono Esbae.

³⁸ Mae Joel, thabusigna mae Nata. Mae Mibha, thugna mae Hagri.

³⁹ Mae Selek, maegna ka namono Amon. Mae Naharae, maegna ka namono Berot, mae ihei te mala pala nogna glepo mala magra mae Joab, thugna Seruia.

⁴⁰ Mae Ira ghe mae Gareb, phia maedi ka namono Itri.

⁴¹ Mae Uria, maegna ka namono Het. Mae Sabad, thugna mae Ahalae.

⁴² Mae Adina, thugna mae Sisa mae ihei te mae biꞌo ka vikegna mae Ruben, eghuteuna mana batuni kaisei tothoghei te au tagna tolufulu soldia.

⁴³ Mae Hanan, thugna mae Maka. Mae Josafat, maegna ka namono Mitan.

⁴⁴ Mae Usia, maegna ka namono Asterat. Mae Sama ghe mae Jehiel, phei thugna mae Hotam, ka namono Aroa.

⁴⁵ Mae Jediael, thugna mae Simri, ghe mae Joha thabusigna Jediael, phia mae igre maedi ka namono Tis.

⁴⁶ Mae Eliel, maegna ka namono Mahava. Mae Jeribae ghe mae Josavaea, phei thugna mae Elnam. Mae Itma, maegna ka namono Moab.

⁴⁷ Mae Eliel ghe mae Obed. Eghuteuna mae Jasiel, maegna ka namono Mesoba.