Ululahu Kronikols 10 - Buka Blahi Ka Cheke Holo

King Sol nei thilo thugna re eghu neke lehe

¹ Kaisei narane armigna Filistia haghe ne magra ka armigna Israel ka Thogele Gilboa. Eghuteuna armigna Filistia igne ne aknu falehe kmana soldia ka armigna Israel, eghuteuna kehare ne rikha.

² Nu soldiadi Filistia igre ne ngolhini King Sol baludi thilo mae thugna re ne ghilei tei hata ne aknu falehedi thilo thugna mana igre: mae Jonatan, mae Abinadab nei mae Malkisua.

³ Magra igne raꞌe ne rheta fara ka vido aheva te au teu mae Sol igne. Keha maedi Filistia ne fada jatani mana ne thofno ghoreho fadiꞌa fara.

⁴ Aonu mae Sol ne cheke ka mae majaghani te pala nogna glepo mala magra mana re, ne cheke eghu ka mana, “Iagho hata nou naflahi mala magra na mala aknu falehe ghau iara. Glahu mei goigoni ghau nei aknu falehe ghau eghu iara mae Filistia te mae bongihehe igre.” Nu mae majaghani igne ne mhaghu nogna fara, ne theome leghuni nogna cheke mae Sol igne. Aonu mae Sol ne hata nogna naflahi mala magra na ne uka soru ke kligna gna ne faleheni thegna.

⁵ Eghuteuna kate filoni tela lehehi mae Sol na, mae majaghani igne jaola ne hata nogna naflahi mala magra na ne uka soru thegna ke kligna gna ne lehe balugna Sol.

⁶ Mae Sol ne lehe baludi thilo mae thugna nalhaꞌu re ka narane tuanala, eghuteuna vikegna mae Sol na ne gnafa ka narane igne.

⁷ Ka narane tuana, keha naiknodi Israel au neu ka glogu Jesrel. Kate nomhini mare te rikhahi armigna Israel na, eghuteuna mae Sol baludi thilo mae thugna nalhaꞌu re ne lehe ka magra igne, maedi Israel kafe rikha ne tei kokodi nodi namono re. Eghuteuna maedi Filistia mei ne hata namono igre.

⁸ Eghuteuna ka keha narane na, soldiadi Filistia igre mei ne hata nodi gobigna lepo maedi Israel teke lehe ka magra re. Mare mei ne filoni thinigna mae Sol baludi thinidi thilo mae thugna nalhaꞌu re ka Thogele Gilboa.

⁹ Aonu mae soldiadi Filistia igre ne kusu phaꞌugna king na, eghuteuna mare jaola ne hata nogna pohe mala magra mana re. Eghuteuna mare ne kuru tei keha mae mala hata tei nonomho igne ka nodi Sugablahi mumuju god nei ka nodi naiknore ka namono te gnafa Filistia.

¹⁰ Eghuteuna mare ne lilisei nogna pohe mala magra mae Sol re ka Sugablahi nodi god re, eghuteuna mare fagefe haghe phaꞌugna mana na ka Sugablahi nodi god te kiloni Degon.

^11-12 Nu kate nomhini unha te eni mae Filistia ka Sol igne, mae nhetadi ka namono Jabes jare ka nohi Gilead te theome mhaghu igre mare tei ne hata fapulo thinigna mae King Sol na baludi thinidi thilo thugna mana re. Aonu mare ne giugilui nhubradi fati mae igre ke parigna kaisei gaju biꞌo jare Jabes. Eghuteuna mare ne theome ghamu nabagna fitu narane.

^13-14 King Sol ne lehe naugna mana ne theome ghatho tahuni Lord, eghuteuna mana neke theome leghudi nogna cheke mana re. Eghuteuna mana neke theome toreni Lord mala toghoni, nu mana tei toreni kaisei naikno biꞌo ihei tangomana te facheke ka tharungadi naikno tela lehehira. Eghume Lord neke faleheni mana, eghuteuna Lord neke vahini mae Devet thugna Jesi mala king tughuni mana.