Ululahu Korin 9 - Buka Blahi Ka Cheke Holo

Nolaghi nei nodi gloku mae khuru

¹ Ghotilo lase ghauhi iara, eigna iara kaisei mae te snagla te eni unha te magnahagheni thegu na. Eghuteuna ghotilo jaola lase ghau iara kaisei mae khuru. Ghotilo lase ghau iara neke filoni mae Jisas noda Lord. Eghuteuna ghotilo lasenihi eigna ghotilo te gnafa na funu fatutuani ni Lord ka nogu gloku iara na.

² Neubane theome filo glani ghau iara keha naiknore te mae khuru iara na, ghotilo filo glani ghau iara. Naugna ka nomi thofno nakarha majaghani ghotilo na, ghotilo kaisei balugna Lord. Igne fagaglana eigna te kaisei mae khuru tutuani iara na.

³ Keha naiknore cheke fapari ghau iara, nu igne nogu cheke tughu iara na:

⁴ naugna iara kaisei mae khuru, tutuani iara tangomana te toredi naiknore te mala togho ghau ka gano ba khoꞌu jame te magnahagheni iara na.

⁵ Eghuteuna jame magnahagheni iara na, iara jaola tangomana te hata kaisei gaꞌase khiloau te mala tei balugu ka nogu gloku na, jateula te edi keha mae khurura eghu, hatimare mae thabusigna Lord, nei mae Pita teu ra neke eni igne.

⁶ Jaola, mae khuru gre theome loku sileni. Nu ghepa mae Banabas loku mala togho ghami themi. Ba, ghepa ngala?

⁷ Ka nogu puhi iara te mala hiro sileni, filo si ghotilo: theo kaisei mae soldia te loku ka armi te mala folini thegna nogna taba na. Eghuteuna jaola theo kaisei mae te loku ka nagare, eghuteuna theome ima keha sisi thegna teuna. Ba, kaisei mae te reireghi sipu te hata keha milk te mala koꞌu thegna na.

⁸ Kate chekeni igne, iara theome leghuni kolho nogna gaoghatho naikno na, naugna nogna vetula mae Moses na jaola neke chekeni igne.

⁹ Uve, te risoni ka nogna vetula mae Moses na cheke eghu, “Thosei haru foflogna buluka na mala lhotini te ghamu kate tapla naꞌa ke kligna wit na.” Ba, kate chekeni igne, God neke ghathoni eigna buluka kolho? Theo.

¹⁰ Mana neke thofno cheke eida tahati mae gloku blahi ra ka grioriso te blahi tuana. Mae ihei te joꞌu nei mae ihei te pulei teuna, phiamare mala kafe hata ghedi vido gano ka unha teke loku phiamare na.

¹¹ Ghehati mae khuru gre joꞌu sisi malagna te famane kotu haghe nakarhami ghotilo re ka khiloau gne. Eghume ghotilo nabami te mala togho ghami ghehati fei thini na.

¹² Keha naiknore au nodi nolaghi te mala salo glepo ka ghotilo na. Tutuani fara, ghehati jaola au nolaghi biꞌo uludi mare! Nu ghehati theome loku ka nolaghi igne. Theo. Neubane ninhigrana ranghi ghami gobigna lepore, ghehati theome toreni kaisei glepo ka ghotilo, naugna ghehati theome magnahaghei te eni kaisei glepo te mala fanograni u Nonomho te Keli eigna Kraes na.

¹³ Ghotilo lasedihi iheire te loku ka Sugablahi ra, mare tangomana te hata gano ka Sugablahi na. Eghuteuna iheire te gahu fafara ka olta ra, mare tangomana te hata vido gano teke fafara mare ka olta na.

¹⁴ Jateula tuana eghu, Lord neke cheke ranghidi iheire te toutonuni u Nonomho te Keli na mala hata sileni eigna nodi gloku na.

¹⁵ Nu neuba, iara theome toreni kaisei vido sileni ka ghotilo. Eghuteuna iara theome risoni igne mala hata kaisei glepo ka ghotilo. Nabagu na iara mala kulu lehe kolho! Tutuani, theo kaisei naikno te tangomana te tughu puhigu iara te fahaehaghe koba igne.

¹⁶ Nogu gloku iara te mala toutonuni u Nonomho te Keli na theome glepo mala fahaehagheni iara, naugna gloku te eni iara igne neke tusu mei God ka iara. Eghuteuna God ginauna na fate ghau iara jame te theome toutonuni iara u Nonomho te Keli na.

¹⁷ Jame thegu iara kolho teke vahini gloku igne na meuna, iara jame tangomana te hata sileni eigna. Nu iara neke theome vahini, iara eni kolho unha God teke cheke ranghi ghau na.

¹⁸ Eghume, nafnata taba nate hata iara na u nolaghi te mala toutonuni u Nonomho te Keli na ranghidi naikno te gnafare eghuteuna theome mala tore fofoli tagna. Ka puhi igne iara theome loku ka nogu nolaghi thegu te mala hata glepo ka naiknore.

¹⁹ Neuba, iara kaisei mae snagla, eghuteuna theo kaisei naikno te funei fruni ghau na, iara lisa lao ghau thegu mala kaisei mae sneka ranghidi naikno te gnafa. Iara eni igne mala toghodi naikno kmanare mala fatutuani ni Kraes.

²⁰ Kate loku iara baludi mae Jiure, iara jaola au baludi mare jateula kaisei mae Jiu, mala tangomana iara te toghodi mare te mala fatutuani ni Kraes na. Eghuteuna neubane theome leghuni iara nogna vetula mae Moses na, kate loku iara baludi mae Jiu te leghuni vetula na, iara leghuni vetula tuana mala tangomana iara te toghodi mare te mala fatutuani ni Kraes na.

²¹ Eghuteuna kate loku iara baludi iheire te theome Jiure, iara na jateula mare eghu, eigna mare theome leghuni u vetula na. Iara eni igne te mala tangomana te toghodi iheire te fatutuani ni Kraes. Iara theome huhughuni nogna vetula God na, naugna iara tangomana te leghuni nogna vetula Kraes.

²² Kate au iara baludi iheire te theome heta nodi fatutuani na, iara na leghudi keha puhi te edi mare re, mala tangomana iara te toghodi mare te mala fatutuani ni Kraes. Tutuani iara leghudi thua nafnata puhidi naikno te gnafare. Iara fariuriudi nabrou te gnafare mala tangomana te toghodi keha naiknore mala hatini u thofno karha na.

²³ Gobigna lepo te edi iara igre malagna Nonomho te Keli gne, mala jifla tei tongana heva heva, nei jaola mala tangomana te thokeni nogna fablahi God ka iara na.

²⁴ Ghotilo laseni, neubane kmana mae te chari kate fangenghele na, nu na kaisei mae ngala te hata taba na. Eghume, ghotilo te gnafa na mala loku heta ranghini God jateula te chari heta te mala hata taba ia eghu.

²⁵ Tutuani, iheire fateo te magnahaghei chari ka fangenghele na, mare mala reireghi fakelidi koba thinidire mala nheta. Mare eni igne mala hata kaisei khepi nafnakno te theome au raugha kolho. Nu khepi nafnakno nate hata tahati na u khepi nafnakno gna kligna nate tusu ranghi ghita God na te au fabrahu tifa tifa.

²⁶ Iara thegu na la chari la tei thokehi ka taba te mala ulu na. Eghuteuna iara jateula mae te mala magra eghu, mala koko soruni keha mae na pari. Iara theome magnahaghei te fiti tutini kolho maloa na.

²⁷ Tutuani, iara thofno funei frunini nakarhagu thegu na mala nogu mae sneka iara. Naugna iara magnahaghei fara te hatini u thofno nakarha na. Uve, kate toutonuni iara ka naiknore eigna nabrou te mala hata thofno nakarha na, iara thegu na jaola leghuni nabrou tuana, na eghunu theome hata iara tabadi naikno khiloau te fatutuani ni Kraes re eghu.