Ululahu Korin 8 - Buka Blahi Ka Cheke Holo

Eigna gano te fafara ka mumuju

¹ Gognaro na iara magnahaghei cheke eigna gano teke fafara ka mumuju. Tutuani fara, keha naiknore cheke eghu, “Tahati te gnafa na kafe au noda glalase.” Neuba, nafnata glalase te mala laseni unha te tutuani ba unha te theome tutuani na igre mala fahaehaghe ghita theda kolho. Nu namha na biꞌo uluni glalase na naugna namha na tangomana te thofno fahetani noda fatutuani na.

² Ihei te cheke eghu na, “Iara lasedi fara gobigna lepore” teuna, naikno tuana theome thofno laseniu kolho puhi glalase na.

³ Nu ihei te namhani God na, God laseni mana.

⁴ Eghume igne unha te chekeni iara eigna te ghamu gano teke fafara ka mumuju na. Eigna te laseni tahati na, u mumuju na tharumaꞌei lepo kolho ka nauthoglu igne. Eghuteuna te laseni langau tahati na jare na kaisei God ngala.

⁵ Tutuani, kligna ba ka nauthoglu gne au glepo te kilodi mare “god”. Eghuteuna neubane au kmana nafnata “god” nei kmana nafnata “Lord”,

⁶ te fatutuani ni tahati na jare na kaisei God tutuani ngala te au na. Mana Kmada tahati naikno khiloau, eghuteuna mana neke vuavuhadi gobigna lepore, nakarhada tahati na nogna mana. Kaisei Lord ngala nanghagna na Jisas Kraes. God neke vuavuha gobigna lepore ka mana, nei tahati jaola karha kolho ka mana.

⁷ Nu neuba ngau, keha naiknore theome kafe lase fakelini mumuju na, eigna mumuju na theome god tutuani. Naugna kate ima gano teke fafara ka mumuju na, mare ghaoghathodi na jateula te fafaradi thedi eghu ka nodi mumuju mae bongihehe tifa ra. Gaoghathodire theome heta kolho, eghuteuna gano teke fafara ka mumuju igne fathonadi kolho mare.

⁸ Nu gano na theo nogna nolaghi te mala hata gita te ari namo ka God na. Jame te tiroda ima tahati na, tahati theome au khaba ka God. Eghuteuna neubane ima tahati nafnata gano igne, gano tuana theome mala fakeli ghita ke ulugna God.

⁹ Neuba, ghotilo filo fakeli glahu totokhei naikno te theome biꞌo nodi fatutuani re ka unha te eni ghotilo na.

¹⁰ Naugna jame ihei te theome nheta gaoghathogna na ginauna filo nigho te ima teu iagho ke lamnagna nogna Sugablahi mumuju na. Eigna iagho laseni theome jafra te ima jare ka gano teke fafara ka mumuju na. Nu neuba iagho ginauna batuni mana mala ima koba gano teke fafara ka mumujure!

¹¹ Eghume nou glalase iagho eigna gano igne na batu fadiꞌani mae ihei te theome nheta nogna fatutuani na. Ba, ghotilo theome laseni Kraes teke lehe eigna mae kherada igne?! Tutuani, ghotilo laseni mae kherada igne mana kaisei mae biꞌo ka Kraes.

¹² Ka puhi igne ghotilo jafra ranghini Kraes ka unha te jafra ghotilo ranghini mae kherami fofodu te theome nheta nagnafagna na.

¹³ Eghume jame te fadidiꞌa iara nogna fatutuani mae kheragu fofodu na ka gano te ima iara teke fafara ka mumuju na, iara ginauna thosei ke ima gano teke fafara ka mumuju na.