Ululahu Korin 7 - Buka Blahi Ka Cheke Holo

Eigna tholaghi

¹ Gognaro na iara magnahaghei te cheke tughudi unha teke riso mei ghotilo ka iara ra. Ulu lahu na, te keli na mae nalhaꞌu na thosei thuru balugna kaisei gaꞌase.

² Nu naugna kmana naikno gnognoro fara, eghume jame te keli na mae nalhaꞌu te gnafare nabagna te hata khetogna thegna, eghuteuna gaꞌase na jaola hata khetogna langau thegna.

³ Mae tholaghi na mala thuru fodu ka khetogna na, eghuteuna thau tholaghi na mala jaola thuru fodu ka khetogna na.

⁴ Naugna gaꞌase tholaghi na theome mala funei fruni ni thinigna thegna na, nu mae khetogna na jaola funei fruni ni thinigna naꞌa na. Eghuteuna mae nalhaꞌu na mala theome funei fruni ni thinigna thegna na, nu khetogna na jaola funei fruni ni thinigna mana na.

⁵ Nu repa jame kaisei nodi gaoghatho mala thosei thuru fodu katha vido, mala tangomana repa te snagla te mala tharai na. Nu ke leghu na repa ginauna funu thuru fodu nodi. Nu kaisei ka repa thosei thodo te snakreni thinigna na ka keha ikno na mala thuru balugna eghu. Te theo na mae Satan tangomana te fariuriuni kaisei ka repa te theome tangomana te nheta na.

⁶ Iara chekeni igne mala togho ghami ghotilo, theome jateula kaisei vetula eghu mala leghuni ghotilo.

⁷ Ka gaoghathogu iara na, iara magnahaghei ghami ghotilo hui te mala au jateula iara eghu mala theome tolaghi kolho. Nu God neke tusu ranghi ghita soasopai khokofakasai. Kaisei mae hata keha nafnata khokofakasai na, eghuteuna keha mae na hata keha nafnata khokofakasai na.

⁸ Gognaro na iara cheke ka ghotilo iheire te theome tolaghi teura, nei iheire tela lehehi khetodira eghu, te keli na ghotilo jame theome tolaghi jateula iara eghu kolho.

⁹ Nu jame nalhaꞌu ba gaꞌase te theome tangomana te au kolho na, nabami na ghotilo tolaghi kolho. Naugna puhi tholaghi na keli fara uluni nafnata puhi te fiti thuru fodu kolho na.

¹⁰ Ka ghotilo iheire tela tolaghihira, iara tusu ari vetula igne ka ghotilo, eigna theome nogu iara kolho nu nogna Lord. Vetula na igne, gaꞌase na theome mala tei kokoni khetogna na.

¹¹ Nu jame kaisei gaꞌase tei kokonihi khetogna na, naꞌa mala thosei ke tolaghi, ba naꞌa ke pulo au fodu ka khetogna na. Eghuteuna nalhaꞌu na jaola thosei koko khetogna na.

¹² Ranghi ghami ghotilo keha naiknora, iara kolho te chekeni igne, theome nogna Lord. Uve, te chekeni iara na, jame kaisei mae khiloau tolaghi ka gaꞌase te theome fatutuani ni Kraes nu naꞌa magnahaghei au fabrahu balugna mana teuna, mana mala thosei koko gaꞌase igne.

¹³ Eghuteuna jame kaisei gaꞌase khiloau tolaghi ka mae te theome fatutuani ni Kraes, nu mana magnahaghei au fabrahu balugna naꞌa teuna, gaꞌase tuana thosei koko mae nalhaꞌu igne.

¹⁴ Mae ihei te theome fatutuani na, mana tangomana te mei namo ka God na, naugna mana ne kaisei balugna thau khiloau te tolaghi mana tagna na. Eghuteuna gaꞌase te theome fatutuani na, naꞌa tangomana te mei namo ka God naugna naꞌa ne kaisei balugna mae khiloau te tolaghi naꞌa tagna na. Jame te theome tutuani igne na, thumi ghotilo re ginauna theome doglo ka tathagna God na. Nu gognaro na naugna ka nomi fatutuani ghotilo idodi kmadira, thumi ghotilo re tangomana te mei namo ka God.

¹⁵ Jame kaisei naikno theome fatutuani ni Kraes, eghuteuna magnahaghei koko khetogna te fatutuani ni Kraes na teuna, keli kolho te snakre teini na. Jame te eghu na, thabusida ba greghada ka Kraes tuana na snagla ka puhi tholaghi na. Nu te tangomana na, repa au fodu naugna God neke kilo ghita mala au ka pharikeli.

¹⁶ Iara chekeni igne ka ghotilo gaꞌase khiloau ba nalhaꞌu khiloau ra mala au fodu fabrahu baludi khetomire. Naugna ghotilo ginauna jau theome laseni te fakarhidi khetomi te theome fatutuanire.

Soasopai nafnata nakarhada

¹⁷ Nu neubane tahati te gnafa na mala au fabrahu ka nafnata nakarha teke tusu ranghi ghita Lord na. Jateula nafnata nakarha teke au tahati kani teke kilo ghita God ia eghu. Igne u vetula te chekeni iara ka khiloau te gnafare.

¹⁸ Jame kaisei mae teke kulu vahehi kani teke kiloni God na, mana mala thosei ke tughu igne. Eghuteuna jame kaisei mae teke theome vahe teku kani teke kiloni God na, mana mala thosei huhuruni thegna mala ke vahe.

¹⁹ Naugna te vahe ba te theome vahe na theome glepo ulu. Glepo te ulu na te leghuni ngala nogna vetula God na.

²⁰ Ghotilo te gnafa na mala au fabrahu ka nafnata nakarha jateula kani teke kilo ghami God igne eghu.

²¹ Jame iagho teke kaisei mae sneka kani teke kilo nigho God na, iagho thosei nanga nou ka puhi igne. Nu jame iagho te filoni kaisei nabrou te snagla na, iagho tangomana te leghuni tuana mala snagla fabrahu.

²² Tutuani, mae ihei teke mae sneka kani teke kiloni Lord na, mana gognaro na snagla malagna Lord. Jateula mae teke snagla kolho kani teke kiloni Lord na, mana gognaro na mae sneka malagna Kraes.

²³ God neke foli fajifla ghamihi ka nakhibo, eghuteuna tabagna teke foli ghami mana na biꞌo fara. Eghume thosei snakreni kaisei naikno hata ghami mala sneka.

²⁴ Kheraguro, ghotilo te gnafa na mala au fabrahu ka nafnata nakarha te keli balugna God, jateula teke eni ghotilo kani teke kilo ghami God ia eghu.

Gusna eidi iheire te theome tholaghi

²⁵ Gognaro na iara cheke eidi iheire te theome tolaghi ra. Iara theo kaisei nogu vetula funu ka Lord eigna igne, nu iara na cheke arini gaoghathogu thegu na. Tutuani, ghotilo tangomana te rouronu ghau iara na, naugna Lord neke lolokeli ranghi ghau iara nei toghoni gaoghathogu na.

²⁶ Tutuani, kate filoni iara puhi biꞌo nate mei ginauna, iara ne ghathoni igne, te keli na ghotilo au ka nakarha te au teu themi gognaro gne te mala tolaghi ba te mala theome tolaghi na.

²⁷ Jame mae ihei teke kulu tolaghihi na, thosei fariuriu mala sopa au ka khetogna na. Eghuteuna jame ihei te theome tolaghi nga teuna, thosei fariuriu hironi kaisei gaꞌase.

²⁸ Nu jame kaisei mae te magnahaghei tolaghi na, keli fara, theome jafra. Eghuteuna jaola theome jafra jame te tolaghi gaꞌase khupi na. Nu iheire te tolaghire ginauna dedi kmana puhi ka nakarhadire, eghume iara chekeni igne ka ghotilo naugna iara theome magnahagheni te thoke ghami ghotilo puhi igre na.

²⁹ Uve kheraguro, igne gaoghathogna nogu cheke iara na, katha vido kmoꞌei kolho te mala loku tahati ranghini Lord na. Eghume, funu gognaro na, mae iheire tela tolaghihira, mare mala au jateula iheire te theome tolaghi eghu mala loku brana.

^30-31 Eghuteuna iheire te diꞌanagnafa ka nauthoglu igne ra, mala au jateula iheire te gleale'a fara ra eghu. Iheire te gleale'a fara ra, mala au jateula ihei te diꞌanagnafa eghu. Eghuteuna iheire te dedei ka nauthoglu igne ra, mare mala au jateula ihei te kuma eghu eigna iheire te dedei ka nauthoglu igne ra mare na theome edi glepo igre tifa tifa. Tutuani, tahati te gnafa na mala snagla gaoghathodare mala loku ranghini Lord. Naugna nauthoglu te filoni tahati gognaro gne, la namo sala'u arihi.

³² Iara magnahaghe ghami ghotilo te mala thosei nangani kaisei glepo ka nauthoglu igne malagna nakarhami themi na. Tutuani, mae ihei te theome tolaghi na mala nangani kolho nogna gloku Lord na, naugna mana magnahagheni Lord te gleale'a fara.

³³ Nu mae ihei te tolaghi na, mana nangadi fara glepo gna nauthoglu igne, naugna mana magnahagheni khetogna na te gleale'a fara,

³⁴ eghuteuna mana fnota gaoghathogna na ka phei nabrou. Naikno biꞌo te theome tolaghi ba khupi na, naꞌa mala nangani kolho nogna gloku Lord na, naugna naꞌa magnahaghei te snakreni thegna ka Lord. Nu gaꞌase te tolaghi na, naꞌa tangomana te nangani fara glepo gna nauthoglu igne, naugna naꞌa fariuriu mala faglealeꞌani khetogna na.

³⁵ Iara chekeni igne ka ghotilo, naugna iara magnahaghei te togho ghami ghotilo. Eghuteuna iara theome magnahaghei te lhotini puhi tholaghi na ka ghotilo. Eigna iara magnahaghei ghami ghotilo te eni kolho unha te doglo na nei snakre ghami themi mala loku fabrahu ranghini Lord.

³⁶ Jame phei naikno nhaꞌa chekehi mala tolaghi. Eghuteuna gaꞌase na la fatapeahi eghu, neuba mae nalhaꞌu na magnahaghei thuru fodu ka naꞌa teuna, te keli na repa tolaghi gognaro na. Igne theome nakhibo.

³⁷ Jame kaisei mae te au gaoghathogna fara te mala tirogna tolaghi ka khupi na teuna, gaoghatho te eni mana igne keli fara. Naugna theo kaisei naikno te huhuruni mana te mala tolaghi na.

³⁸ Eghume mae ihei te tolaghi na, mana eni glepo te doglo na. Nu mae ihei te theome tolaghi na, mana eni glepo ke ulu tulaoi.

³⁹ Gaꞌase tholaghi na mala au fabrahu balugna khetogna na. Nu jame te lehe khetogna na, naꞌa tangomana teke tolaghi ka ihei te magnahagheni naꞌa na, eghu jame te kaisei mae khiloau mana na.

⁴⁰ Nu gaoghathogu iara na, naꞌa ginauna gleale'a fara jame te theome fapea tolaghi na. Eghuteuna kate cheke ranghi ghami eigna puhi igne, iara fatutuani ni Tharunga gna God na au balugu iara mala batuni gaoghathogu na.