Ululahu Korin 6 - Buka Blahi Ka Cheke Holo

Puhi keli te mala fadoglini u najafra na

¹ Jame kaisei ka ghotilo magra balugna kaisei thabusigna ka khiloau, ghotilo theome tangomana te hata te tei puhi tuana ka mae bongihehere mala fadoglini mare. Naugna u najafra tuana nodi gloku mae khiloau kolho te mala fadoglini na.

² Eigna ghotilo lasenihi ginauna naikno khiloau gre tangomana te fatedi naikno te gnafa ka nauthoglu gne. Eghume jame te nabami ghotilo te fateni naiknogna nauthoglu igne na ghotilo jaola tangomana fara te fadoglidi farihoteimi themi puhi te ikodi tuare.

³ Ghotilo laseni nathuꞌu nauriha na tahati naikno khiloau gre ginauna jaola fatedi nogna engel God re. Te eghu na, glepo ikodi te edi leghu narane igre, bligi kolho tahati te mala fadoglidire.

⁴ Kate thakle mei puhi igre, naugna unha si ghotilo te tei fathoethoke koba ka mae ihei te au ke kosigna khiloau gnea? Naugna ghotilo theome ghatho tahudi mare!

⁵ Tore, ghotilo theome mamaja nomi sia?! Naugna te laseni iara na, jare ke lamnami ghotilo na au keha mae glalase tangomana te fadoglidi magra te edi farihoteimi ghotilo naikno khiloau are.

⁶ Nu ghotilo magnahaghei te tei toreni mae bongihehe na te mala fadoglini puhi teke eni kaisei mae ranghini keha mae thabusigna ka khiloau na!

⁷ Nafnata puhi te eni ghotilo fari themi ka fate na igne falaseni te thofno jafrahi ghotilo na. Te keli na ghotilo snakredi keha thabusigna ka khiloau gne mala fanenei ghami, ba mala hata nomi glepore!

⁸ Nu ghotilo theo eghu. Tutuani neubane kafe naikno khiloau, ghotilo fanenei fari themi nei jaola blau fari themi!

^9-10 Ghotilo thofno laseni ihei te edi glepo te diꞌa igre ginauna theome thokeni u nakarha te funei frunini God na. Naikno igre te diꞌare: iheire te gnognoro, ba iheire te pogho soru ka mumuju, ba iheire te huhughuni vetula gna tholaghi, ba nalhaꞌu te ei puhi diꞌa fari nalhaꞌu, ba iheire te blau, ba iheire te mamagna, ba iheire te koꞌu te dranga, ba iheire te toutonu chaichaghidi keha naiknore, nei iheire te chaghi mala hata glepo ka keha naiknore. Eghume kheraguro, thosei snakreni ihei te mala chaghi ghami ghotilo eigna puhidi naikno te funei frunidi God re.

¹¹ Tifa na, keha naikno ka ghotilo neke jateula tuana neku! Nu ka nanghagna noda Lord Jisas Kraes nei ka nogna nolaghi Tharunga gna noda God, mana neke hata fadelei nakhibomire mala nogna naikno nei mala au doglo ka tathagna God na.

Sugablahi nogna Tharunga te Blahi

¹² Keha ka ghotilo cheke eghu, “Naugna iara leghuni Kraes, iara tangomana te eni unha te magnahagheni thegu na.” Igne tutuani, nu gobigna lepore theome mala togho nigho eghu. Eghume, neuba iara ne tangomana te edi gobigna lepore, iara theome snakreni kaisei puhi te mala funei fruni ghau na.

¹³ Keha mae na jame jaola cheke eghu, “Thi'a na malagna gano, eghuteuna gano na malagna thi'a.” Uve. Nu God ginauna kafe roꞌedi phei glepo igre. Nu ghotilo theome tangomana te chekeni thini na mala gnognoro teuna. Naugna thini na mala loku ranghini Lord, eghuteuna Lord na mala funei frunini u thini na.

¹⁴ Tutuani, ka nogna nolaghi God neke fakarha fapuloni Lord Jisas kau glehe, eghuteuna God ginauna jaola fakarha fapulo ghita ka nogna nolaghi na.

¹⁵ Ghotilo thofno laseni igne, eigna thinimi ghotilo re kaisei ka thinigna Kraes. Eghume tahati theome tangomana te hata thinigna Kraes na te loku fodu ka thinigna thau vine na.

¹⁶ Ghotilo laseni igne, eigna mae ihei te thuru fodu balugna thau vine na repa ginauna kaisei thini ngala. Naugna grioriso te blahi na cheke eghu, “Repa ginauna kaisei thini ngala.”

¹⁷ Nu ihei te loku fodu balugna Lord na, phiamare na kaisei ngala ka thofno nakarha na.

¹⁸ Ghotilo thosei leghuni puhi gnognoro na! Keha nakhibo te edi naiknore au ka gaoghatho kolho theome loku fodu ka thini. Nu iheire te gnognoro re thofno fathonadi fara thinidi thedire.

¹⁹ Ba, ghotilo theome laseni thinimi ghotilo gre jateula Sugablahi nogna Tharunga te Blahi teuna!? Tharunga te Blahi na au ke lamnami ghotilo, eigna God neke tusu mei ka ghotilo. Ghotilo theome nomi themi,

²⁰ naugna God neke foli fapulo ghamihi ka nakhibo mala fasnagla ghami. Eghuteuna tabagna teke foli ghami ghotilo na biꞌo fara. Eghume thinimi ghotilo re mala kilo fnaknoni God kolho.