Ululahu Korin 5 - Buka Blahi Ka Cheke Holo

Puhi diꞌa ke lamnagna khiloau

¹ Iara nomhini kaisei thoutonu tutuani eigna kaisei mae ka ghotilo eni kaisei puhi te diꞌa fara. Kaisei mae jare thuru fodu ka khetogna mae thofno kmagna na. Eigna neubane mae bongihehe, mare theome tangomana te eni na glepo te diꞌa fara tuana.

² Tore! Ghotilo theome tangomana te cheke fahaehaghe ghami themi na. Ghotilo jame diꞌanagnafa balu mamaja, eghuteuna mae ihei te eni nakhibo tuana nabagna na mala au kosi.

³ Iara jateula te auhi eghu balumi ghotilo, eghume iara la fatenihi mae te eni glepo te diꞌa tuana. Naugna neubane au khaba iara ka ghotilo, gaoghathogu iara na auhi balumi ghotilo.

⁴ Tutuani, iara fateni mae tuana ka nanghagna Jisas noda Lord. Kate salo fodu ghotilo na, gaoghathogu iara na au balumi ghotilo, ka nogna nolaghi Jisas noda Lord.

⁵ Ka narane te salo fodu tuana, tahati lisa laoni mana ka khamegna mae Satan mala roꞌeni thinigna mana na. Ka puhi igne God ginauna tangomana te fakarhini tharunga gna mana na ka narane gna noda Lord na.

⁶ Nomi fahaehaghe ghotilo eidi puhi te diꞌare theome doglo. Naugna ghotilo lasenihi cheke igne, “Katha isi ikoi kolho te mala fabiꞌodi bret te gnafare.”

⁷ Gognaro na ghotilo hata fadeleidi nakhibo te gnafare mala doglo ke ulugna God. Naugna nakhibo na tangomana te roꞌeni nakarhada na jateula isi te tangomana fabiꞌodi bret. Ghotilo jateula bret te theo isi ia eghu, naugna God neke fafaranihi Kraes te mala hata fadeleidi nakhibodare.

⁸ Eghume kate leghuni tahati Kraes ka nakarha majaghani na, theome tangomana tahati te edi nafnata nakhibo ba nafnata puhi te diꞌa teke edi tifa ra. Nu te edi tahati puhi tuare jateula isi te fabiꞌo bret ia eghu. Nu tahati mala jateula bret te theo kaisei isi ka noda Gaghamu Ghasa-Polho na ia eghu mala doglo nei cheke kate tutuani.

⁹ Ka letas teke riso ari iara ka ghotilo tifei ia, iara neke chekehi ka ghotilo mala thosei fofodu baludi iheire te tapla jafra ka nakhibo are.

¹⁰ Nu iara theome chekeni te mala thosei fofodu ghotilo ka mae te bongihehere, ba mae te edi glepo te diꞌa fara ba mamagna ba blau ba pogho soru ka mumuju. Te tei kokodi ghotilo naikno igre, ghotilo ginauna jifla kokoni nauthoglu igne!

¹¹ Tutuani, iara theome magnahaghe ghami ghotilo te fofodu ka iheire te kiloni thedi naikno khiloau, nu edi fabrahu glepo te diꞌa fara, ba mamagna, ba pogho soru ka mumuju, ba toutonu fadiꞌani ihei, ba khuru koꞌu, ba chaghi mala hata glepo ka keha naiknore. Ghotilo thosei gnokro fodu baludi nafnata naikno tuare, ba ima baludi. Igne gaoghathogna nogu letas iara teke riso ari ka ghotilo tifa ia.

^12-13 Uve, theome nogu gloku iara te mala fatedi naikno bongihehere. God thegna kolho te mala fatedire. Nu ghotilo naikno khiloau are te mala fatedire mae khiloau kolho. Naugna u grioriso te blahi na cheke eghu, “Ghotilo mala faꞌau kosidi iheire te tapla jafra koba ka nakhibo na.”