Ululahu Korin 4 - Buka Blahi Ka Cheke Holo

Nodi gloku mae khuru

¹ Ghotilo mala ghatho ghami ghehati jateula nogna mae gloku Kraes eghu, eigna God vahi ghami ghehati mala toutonuni nogna cheke God teke poru tifa igne.

² Tutuani, mae gloku na mala eni gloku te keli ranghini nogna funei na.

³ Nu iara theome nanga nogu jame te fate ghau iara ghotilo ba ihei ka nauthoglu gne. Iara jaola theome tangomana te fateni puhigu thegu na.

⁴ Iara theome laseni kaisei glepo te fajafrani iara na, nu iara theome chekeni ne kaisei mae doglo thegu teuna. Eigna noda Lord ngala te au nolaghi te mala fate ghau iara na.

⁵ Eghume thosei fate naikno nu ofou ghilei thoke mei Lord. Mana ginauna hata fajifla kate phae glepo te diꞌa fara te poru teu kate romno na, eghuteuna mana ginauna fakakhana glepo teke poru ka nagnafadi naiknore. God ginauna jaola fafnaknodi gnafa naikno te leghuni nodi puhi te kelire.

⁶ Kheraguro, te mala laseni ghotilo unha te chekeni iara na, iara neke cheke eidi puhimi ghepa mae Apolosi, mala glola fakeli ka ghotilo gaoghathodi u cheke igre, “Ghotilo leghuni ngala unha te risoni ka grioriso te blahi na.” Ka puhi igne ghotilo ginauna theome tangomana te cheke fahaehagheni fara kaisei naikno ke uludi keha naiknore.

⁷ Ba ihei te chekeni te doglo ghotilo ke uludi keha naiknore? Tutuani, glepo te khotodi ghotilo gre God ngala teke tusu ari ka ghotilo na! Eghume, ghotilo theo nafumi te mala cheke fahaehaghe fara eidi glepo igre.

⁸ Ba, ghotilo la hatahi glepo te magnahaghedire? Ba, ghotilo la mae dedeihi? Ba, ghotilo ulu ghami fara ghehati la king hi? Tutuani, iara magnahaghe ghami fara ghotilo mala king, ghehati jaola mala jateu king eghu balumi ghotilo! Kheraguro, iara cheke igre mala maꞌe kolho sigre.

⁹ Nu gaoghathogu iara na, God lilisei ghami ghehati mae khuru gre leghu lahu. Ghehati jateula mae sosolo tela fate ghamihi mare te mala lehe ra eghu. Ghehati kegra ke uludi engel nei naiknogna nauthoglu gne eghu ka puhimi ghehati re.

¹⁰ Tore! Gaoghathodi naiknore ghehati gne jateula mae te meomekro eghu, naugna ghehati nogna Kraes. Nu ghotilo la lasenihi, eigna ghotilo nogna Kraes! Ghehati theome heta, nu ghotilo heta fara! Naiknore filo fapari ghami koba ghehati eghuteuna mare ghatho tahu ghami ghotilo!

¹¹ Mei te posa gognaro gne, ghehati kmoꞌei ka ghemi gano ba khoꞌu ba pohe. Naiknore puri ghami koba, eghuteuna kate tei heva heva na ghehati theo nomi suga.

¹² Ghehati loku heta fara te mala au ghemi gano na. Kate cheke fadiꞌa ghami naiknore, ghehati fablahidi. Kate para ghami naiknore, ghehati lisa lao kolho.

¹³ Eghuteuna kate cheke fadiꞌa ghami naiknore, ghehati cheke ranghidi glepo te keli. Naiknore filo ka ghehati na jateula chara eghu kolho. Uve, mei te posa gognaro gne ghehati theo nafumi kolho ka gaoghathodi naiknore.

¹⁴ Iara riso ari ka ghotilo cheke igre theome mala famamaja ghami ghotilo. Theo. Iara namha ghami ghotilo jateula thofno thugu eghu, nu iara magnahaghei te fadoglidi kolho gaoghathomi ghotilo re.

¹⁵ Eigna neuba ne au nabotho thogha naikno ghotilo te mala farirhiu ghami puhigna Kraes na, kaisei mae ngala te jateula kmami teu ghotilo na. Tutuani, iara ngala te hata mei u Nonomho te Keli igne ka ghotilo mala jateula kmami eghu ghotilo ka mae Jisas Kraes.

¹⁶ Eghume iara tore ghami fara ghotilo te mala fariuriu leghuni puhigu iara na.

¹⁷ Naugna igne, iara kuru arini mae Timoti ka ghotilo. Iara namhani mana jateula thofno mae thugu eghu, naugna mana loku fakeli ranghini Lord. Mana ginauna farirhiu ghami ghotilo puhigna Kraes te leghuni iara gne, jateula iara te farirhiudi naikno khiloau ka namono te gnafa gre eghu.

¹⁸ Keha ka ghotilo re fahaehaghe ka gaoghathodire nate theome ke ari iara te mala para ghami na.

¹⁹ Nu jame te magnahaghei ghau iara God na, iara ginauna theome raugha ari ka ghotilo. Eghuteuna ka narane tuana iara ginauna na nomhidi nodi cheke fahaehaghe mae te fahaehaghe tuare, nu jaola iara ginauna ari filoni unha nafnata nolaghi te au ka mare na.

²⁰ Naugna tahati laseni God na tangomana te funei frunini ihei te loku ranghini na, theome cheke kolho.

²¹ Eghume filo fakelidi puhimire mala theome ari para ghami iara. Tutuani, iara magnahaghei ari te mala filodi puhimi te kelire nei te falaseni nogu namha na ka ghotilo. Naugna iara magnahaghei te togho ghami ghotilo fara ka puhi te keli.