Ululahu Korin 3 - Buka Blahi Ka Cheke Holo

Khiloau na ne fnota

¹ Kheraguro, tifa na iara neke theome tangomana te cheke ka ghotilo jateula te cheke ka naikno te au Tharunga te Blahi tadira neku. Iara neke cheke ka ghotilo jateula te cheke ka naikno te theome fatutuani ni God ra neku kolho, eigna ghotilo jateula sua eghu kolho puhimire ka khiloau gne.

² Eghume farirhiu teke tusu ari iara ka ghotilo ra jateula milk eghu kolho e bligi fara. Theome jateula gano maku te nabadi mae biꞌo ra eghu e ninhigrana. Naugna theome nabami ghotilo. Neuba gognaro na farirhiu igre jateula gano te maku eghu theome nabami ghotilo.

³ Tutuani, puhimi ghotilo re kaisei nanaba ngala ka naikno te leghuni puhigna nauthoglu igne. Naugna goghotu koba, magra koba teu ghotilo igre ngala fagaglana gna te leghuni ghotilo puhigna nauthoglu na, theome leghuni mae Tharunga te Blahi.

⁴ Keha ka ghotilo cheke eghu, “Iara nogna mae Pol,” ba “Iara nogna mae Apolosi.” Cheke igre fagaglana gna te leghuni ghotilo puhigna nauthoglu gne.

⁵ Ba, mae ihei mae Apolosi na? Mana kaisei mae biꞌo? Theo! Ba, mae ihei mae Pol na? Iara na kaisei mae kolho. Ghepa mae Apolosi phei nogna mae gloku God kolho mala togho ghami ghotilo mala fatutuani ni God. Ghepa te gnafa na eni kolho gloku teke tusu ranghi ghami God na.

⁶ Kate farirhiu ghami ghotilo na, iara jateula kaisei mae mala joꞌu sisi ka nagare eghu kolho, eghuteuna mae Apolosi na jateula kaisei mae mala toatofa khoꞌu eghu kolho, nu God thegna kolho te mala fakotu haghedire.

⁷ Tutuani mae ihei te joꞌu nei mae ihei te toatofa khoꞌu teu igne theome ulu. Nu God thegna ngala te ulu fara na, naugna mana thegna ngala te fakotu haghedire.

⁸ Eghume mae te joꞌu sisi nei mae te toatofa khoꞌu teu igre kaisei gaoghatho kolho fei gloku na. Aonu God ginauna tabadi phiamare leghuni nodi gloku na.

⁹ Eigna ghepa kafe loku ranghini God ngala te mala togho ghami ghotilo, eghuteuna ghotilo jateula nogna nagare eghu mana. Eghuteuna ghotilo jaola jateu kaisei suga teke horo God eghu.

¹⁰ God neke tusu ranghi ghau iara khokofakasai te mala babana suga na. Iara lilisei kmana thina mala famamhakugna suga tuana jateula kaisei mae te lase horo suga fara eghu. Keha mae re gognaro na mala babana ke klignadi thina tuare. Nu te chekeni iara ka ghotilo na, mae te gnafare filo fakelini babana gna na!

¹¹ Tutuani, God liliseini mae Jisas Kraes mala jateula kaisei thina biꞌo eghu mala makugna suga na, eghuteuna theo kaisei mae te tangomana te hata fadeleini mana teke tughu ka keha thina delei jare na.

¹² Kate babana suga igne, keha mae re ginauna lilisei glepo keli fara, jateula gol nei silva nei keha thina te keli ba keha glepo jateula gaju nei buburu nei gnognofi te theome au raugha kolho.

¹³ Eghuteuna ka narane leghu lahu nate mei fate Kraes na nodi gloku naikno te gnafare ginauna na kakhana unha te keli ba unha te diꞌa. Naugna kau narane tuana nogna khaꞌaghi God na ginauna fariuriudi nodi gloku naikno te gnafare mala laseni te keli ba te diꞌa na.

¹⁴ Jame te theome nhako unha teke babana mana ke kligna gna thina tuana na, God ginauna tabani mana.

¹⁵ Nu jame te nhako kolho ka khaꞌaghi gloku teke eni mana na, ginauna theo kaisei mae nate tabani mana na. Nu neuba, God ginauna fakarhini mana, eigna God jateula kaisei mae te hata fajiflani mana ka suga te nhako ia eghu.

Naikno khiloaure nogna Sugablahi tutuani God

¹⁶ Ghotilo lasenihi igne, eigna ghotilo jateula nogna Sugablahi God eghu, eghuteuna Tharunga gna God na auhi ka ghotilo.

¹⁷ Eghuteuna jame ihei te roꞌeni sugagna God na, God ginauna jaola roꞌeni mana. Naugna sugagna God na blahi fara, eghuteuna ghotilo jateula sugagna mana na eghu mala blahi fara.

¹⁸ Thosei chaghi ghami themi. Jame kaisei mae ke lamnami ghotilo te magnahaghei lalase fara ka nafnata glalase gna nauthoglu igne na, nabagna na mana mala jateula te meomekro eghu ka puhigna nauthoglu igne mala tangomana mana teke lalase fara na.

¹⁹ Naugna nogna glalase te keli nauthoglu gne theo nafudi kolho ka God. Tutuani, grioriso te blahi na cheke eghu, “God ginauna fatedi mae glalase te lase chaghi re.”

²⁰ Grioriso te blahi na jaola cheke eghu, “Lord laseni unha te ghathoni mae glalasere theo nafudi kolho.”

²¹ Eghume ghotilo theome naba te cheke fahaehagheni unha te eni naikno na! Tutuani fara, gobigna lepore nomi ghotilo.

²² Iara mae Pol, baludi mae Apolosi ghe mae Pita nomi ghotilo. Eghuteuna nauthoglu, karha, glehe, glepo te edi gognaro gre nei glepo nate mei nathuꞌu nauriha teu igre nomi ghotilo.

²³ Eghuteuna ghotilo nogna Kraes, eghuteuna Kraes na nogna God.