Ululahu Korin 16 - Buka Blahi Ka Cheke Holo

Sileni maladi naikno khiloau Jerusalem

¹ Gognaro na iara magnahaghei chekeni ka ghotilo eigna sileni te mala toghodi naikno khiloau te au Jerusalem. Ghotilo mala edi unha teke chekedihi iara ranghidi khiloau ka Provins Galesia.

² Leuleghu narane Sade na ghotilo te gnafa na mala lilisei fadelei keha sileni nihai teke thokeni ghotilo ka nomi gloku na mala theome ke salo ghotilo ke leghugna te posa ari iara ka ghotilo na eghu.

³ Kate posa ari iara jare na, iara ginauna kurudi keha mae teke vahidi ghotilo re mala hata tei sileni tuana Jerusalem. Eghuteuna iara ginauna tusu lao kaisei letas ka mare mala hata tei baludi. Letas igne na cheke ranghidi naikno khiloau Jerusalem eidi mae te hatagna te tei sileni teke salo ghotilo igre.

⁴ Jame naba te teila iara na, mae igre ginauna tei balugu iara.

Keha nogna gaoghatho mae Pol

⁵ Iara ginauna ari posa ka ghotilo ke leghugna te ari sala'u iara ka Provins Masidonia na.

⁶ Jau iara ginauna ari au raugha balumi ghotilo jare. Jame ka vido te khoburu na iara ginauna au balumi ghotilo, mala tangomana ghotilo te togho ghau iara ka vido aheva te tei iara na.

⁷ Iara theome magnahaghei te filo ghami gognaro na naugna iara au katha vido kmoꞌei kolho. Gaoghathogu na iara magnahaghei te ari au faraugha balumi ghotilo, eghu jame te snakre ghau Lord na.

⁸ Nu iara ginauna au agne Efesus ghilei thokei narane Pentekos.

⁹ Naugna gognaro na, grengatha na la thora ranghi ghauhi iara, mala tangomana iara te edi kmana gloku te keli fara, neubane kmana naoka langau te loku fanogra ghau iara na.

¹⁰ Jame te ari mae Timoti ka ghotilo na, ghotilo mala reireghi fakelini mana naugna mana jateula iara eghu loku ranghini Lord.

¹¹ Eghume theo kaisei ka ghotilo te mala filo faparini mae Timoti na. Nu ghotilo mala toghoni mana ka vido aheva te tei mana, mala gleale'a ke pulo mei mana ka iara thogheiro na. Naugna iara ofoni mana mala ke pulo mei baludi keha naikno khiloaure.

¹² Eigna thabusida ka khiloau mae Apolosi, iara chekeni mana kmana fata mala ari baludi keha mae thabusigna mala sigho ghami ghotilo. Gognaro na mana theome ghathoni ngau te mala ari na, nu ka vido te snagla ginauna, mana na ari ka ghotilo.

Nogna cheke leghu lahu mae Pol

¹³ Reireghi fakeli ghami themi, brana ka nomi fatutuani na, thosei mhaghu, nei au heta fabrahu ka gaoghathomire.

¹⁴ Gobigna lepo te edi ghotilo re mala jifla mei ka nomi namha na.

^15-16 Ghotilo lasenihi tharaknagna mae Stefanas ia. Mare ngala teke kulu fatutuani ni Kraes na ka Provins Akaia, eghuteuna mare loku fabrahu mala toghodi nogna naikno God re. Kheraguro, iara tore ghami mala leghudi naikno te baubatu ghami igre, baludila iheire te loku ka gloku blahi igne.

¹⁷ Iara gleale'a fara naugna mae Stefanas nei mae Fotiunetas nei mae Akaikas eghu thilomare neke mei posa ka iara agne. Ghotilo theome tangomana te mei agne na, nu thilomare te hata sapemi ghotilo re.

¹⁸ Thilomare faglealeꞌa ghau iara jateula mare teke faglealeꞌa ghami ghotilo tifa ia eghu. Ghotilo mala ghatho tahudi nafnata mae igre.

¹⁹ Khiloau ka Provins Esia igre, mare kubae ghami ghotilo. Mae Akuila ghe Prisila baludi naikno khiloau te khapru leghu fata ka sugadi repa re, kubae ghami ghotilo ka nanghagna Lord.

²⁰ Eghuteuna naikno khiloau te gnafa igre kubae ghami ghotilo. Kate fari thafoi na, te keli na ghotilo kubae fari themi ka thofno namha.

²¹ Iara riso ranghi ghami ghotilo letas igne ka khamegu thegu.

²² Jame ihei te theome namhani Lord na, iara magnahagheni mae tuana ginauna mala fnota fabrahu ka God tifa tifa. Nomi Lord, mei iagho!

²³ Iara toreni nogna khokofakasai Lord Jisas mala au balumi.

²⁴ Iara namha ghami ghotilo gnafa. Tahati kaisei ngala ka Jisas Kraes. Me gnafa. Iara, mae Pol.