Ululahu Korin 15 - Buka Blahi Ka Cheke Holo

Karha fapulogna Kraes

¹ Gognaro na, kheraguro, iara magnahaghe ghami ghotilo teke ghatho fapuloni u Nonomho te Keli teke toutonunihi iara ka ghotilo ia. Ghotilo neke hata balu gleale'a, eghuteuna nomi fatutuani ghotilo re kegra maku tagna.

² Eghuteuna God ginauna fakarhi ghami ghotilo ka Nonomho te Keli igne. Nu ghotilo mala loku famaku ka cheke teke toutonu ranghi ghami iara igne, na eghunu fiti fatutuani kolho ghotilo eghu.

³ Cheke te ulu fara teke hata iara na tela toutonu arihi iara ka ghotilo ana. Tutuani, nogu cheke iara na igne, mae Kraes na neke lehe mala hata fadeleidi nakhibodare, jateula te chekeni teu kau grioriso te blahi na.

⁴ Eghuteuna mare neke giugiluni mana, eghuteuna God neke fakarha fapuloni mana ka fatilo narane na, jateula te chekeni teu ka grioriso te blahi ia.

⁵ Mana neke fatakleni thegna ka mae Pita, ke leghu na ka hatimare nabotho phei mae fanomhore.

⁶ Ke leghugna tuana, mae Jisas neke fatakleni thegna ka hatimare sala'uni glima gobi naikno khiloau teke khapru fodu teku kaisei vido ngala. Tutuani, kmana ka naikno igre mare karhau ngala gognaro na. Nu kehare la lehehi.

⁷ Aonu mana neke fatakleni thegna ka mae Jemes, ke leghu na ka hatimare mae fanomho te gnafare.

⁸ Leghu lahu na, iara jaola neke filoni mana. Naugna iara neke filoni mana ke leghudi mare, iara jateula sua te karha mei leghu lahu ia eghu.

⁹ Tutuani, iara ngala leghu lahu ka keha mae khurure. Tutuani, iara theome nabagu te kilo ghau mare mae khuru na naugna iara neke parani nogna khiloau God na.

¹⁰ Nu ka nogna khokofakasai God iara theome fiti au gognaro na. Theo. Nogna khokofakasai na togho ghau iara te mala nogna mae gloku God. Naugna iara loku heta fara ke uludi keha mae khurure, nu theome nogu gloku iara thegu. Nogna khokofakasai God te au balugu iara na mala togho ghau iara.

¹¹ Eghume, neuba iara ba keha mae khurure ne toutonu ka ghotilo, ghehati te gnafa na toutonuni kaisei glepo ngala. Tutuani, u Nonomho te Keli te toutonuni ghehati igne unha te fatutuani ghotilo na.

Karha fapuloda

¹² Leuleghu fata na ghehati toutonuni eigna God te fakarha fapuloni Kraes kau glehe. Eghume, naugna unha si keha naikno ka ghotilo te cheke eghu, “Naikno tela lelehira theome tangomana te karha fapulo na” teu gnea?

¹³ Jame te theome tangomana teke karha fapulo naikno teke lehehira na, God na jaola neke theome fakarha fapuloni kolho Kraes kau glehe.

¹⁴ Eghuteuna jame teke theome karha fapulo Kraes kau glehe na, unha te toutonuni ghehati ka ghotilo na theo nafugna kolho, eghuteuna ghotilo theome tangomana te fatutuani ni na.

^15-16 Eghuteuna keha glepo na teuna ghehati jame jaola chaghi kolho eigna God, kate chekeni ghehati God neke fakarha fapuloni Kraes ka glehe teuna. Naugna ghehati thofno toutonu eigna mana teke fakarha fapuloni kau glehe na. Eghume jame te theome karha fapulo naiknore ka glehe na, faꞌunha eghu tangomana God teke fakarha fapuloni Kraes kau glehe?!

¹⁷ Jame te theome karha fapulo Kraes kau glehe na, nomi fatutuani ghotilo ka Kraes na theome tutuani. Eghuteuna God na jaola theome hata fadeleidi kolho nakhibomi ghotilo re.

¹⁸ Eghume naikno khiloau tela lehehira jaola luvu kolho hi.

¹⁹ Jame noda grouronu ka Kraes na malagna nauthoglu igne kolho meuna, tore kokhoni ghita fara ke uludi naikno te gnafare.

²⁰ Nu tutuani fara God neke fakarha fapuloni Kraes kau glehe. Eghuteuna igne kaisei fagaglana eigna God nate fakarha fapulodi naikno te gnafa teke fatutuani ni mana tela lehehira ginauna.

²¹ Glehe na mei ka naikno te gnafare eigna kaisei glepo te diꞌa teke eni kaisei mae na. Nu karha fapulo na jaola mei ka kaisei mae ngala.

²² Tahati te gnafa na mala lehe naugna tahati kaisei balugna mae Adam. God ginauna jaola mala fakarha fapulo ghita gnafa, naugna tahati kaisei balugna Kraes.

²³ Nu naikno te gnafare ginauna karha fapulo kate thoke mei nogna narane na. Kraes na neke kulu karha fapulo ka naikno te gnafare. Eghuteuna kate pulo mei Kraes na, nogna naikno mana re ginauna jaola karha fapulo.

²⁴ Aonu kate thoke mei narane leghu lahu na, Kraes ginauna magra mala tapla soruni mae Satan nei naitu te gnafa ka nauthoglu igne, eghuteuna mana ginauna snakreni God Kmagna mala King.

²⁵ Eigna Kraes ginauna mala funei frunidi gobigna lepore ghilei thokeni narane God nate lisei soru nogna naoka Kraes re ke parigna nogna nolaghi na.

²⁶ Eghuteuna naoka leghu lahu te mala roꞌeni mana na, u glehe.

^27-28 Naugna grioriso te blahi na cheke eghu, “God lisei soru glepo te gnafare ke parigna nogna nolaghi thegna na.” Kate chekeni “glepo te gnafare” lilisei ke parigna mana teu igne, thono glola fara eigna God theome cheke eigna te lisei soruni thegna na. Theo. Nu God thegna ngala teke tusu lao nolaghi igne ka Kraes te mala funei frunidi gobigna lepore. Ke leghugna God te lisei sorudi gobigna lepore ke parigna nogna nolaghi mae Thugna na, Kraes ginauna lisei soruni thegna ke parigna nogna nolaghi God. Eghume, God ngala te au nolaghi biꞌo te mala funei frunidi gobigna lepore.

²⁹ Jare iheire te apublahire mala toghodi naikno te lehe ra. Nu keha ka ghotilo cheke eghu, “Naikno te lehere theome tangomana teke karha fapulo na.” Jame te tutuani cheke tuana na mala unha si naikno teke apublahi grea?!

³⁰ Jaola, jame te theo u karha fapulo na, naugna unha si ghehati mae khuru gre te eni nomi gloku na kate thoke ghami hoholo leuleghu narane gnea?

³¹ Tutuani fara kheraguro, iara au papara malagna Kraes leuleghu narane. Nu iara jaola gleale'a ka ghotilo kate ghathoni te kaisei tahati balugna Kraes na.

³² Uve, iara tifa na magra ka glepo te fakaukathu re agne ka namono Efesus. Jame te eni iara igne leghuni nogna gaoghatho naikno kolho na, unha gne nate fakeli ghau iara te mala au papara iara na? Theo nafugna kolho. Jame te tutuani cheke igne, “Te theome tangomana teke karha fapulo iheire tela lehehira.” Eghume, iara ginauna leghuni kolho gaoghatho igne, “Tahati ima nei koꞌu eigna nathuꞌu na tahati lehe.”

³³ Thosei snakredi naiknore mala chaghi ghami eigna karha fapulo na. Eigna ghotilo lasenihi u cheke igne, “Jame te kaisei ghotilo baludi naikno te diꞌare, mare ginauna fadidiꞌa puhimi ghotilo te kelire.”

³⁴ Ghotilo mala ke funu ghaoghatho fakeli, eghuteuna ghotilo mala thosei ke edi puhi te diꞌare. Keha ka ghotilo, mare theome laseni God, eghuteuna iara chekeni igne mala mamaja ghotilo.

Thini majaghani ke leghu glehe

³⁵ Nu keha naikno jame ghusna eghu, “Faꞌunha eghu ke karha fapulo si naikno tela lehehi grea? Unha nafnata thini si nate hata mare na ia?”

³⁶ U nafnata ghusna igne meomekro kolho! Naugna ghotilo lasenihi kate joꞌu sisi na, sisire mala lehe ke lamna glose ame tangomana nga te karha te kotu haghe na eghu.

³⁷ Eghuteuna unha teke joꞌu iagho ke lamna glose na, na theome nanaba ka unha nate kotu haghe ke leghu na. Unha te joꞌu na kaisei sisi ngala, sisi wit ba keha nafnata sisi kolho.

³⁸ Ke leghu na, God eni sisi na mala kotu haghe, eghuteuna sisi tuana hata kaisei nafnata thini jateula te magnahagheni God na eghu. Tutuani, thua nafnata sisi igre hata kaisei nafnata thini jateula thinigna thegna.

^39-41 Eghuteuna thinidi glepo ka nauthoglu na igre theome kaisei nafnatadi ngala. Naugna thini naikno na kaisei nafnatagna, thini bosu na kaisei nafnatagna, thini nanghaji na kaisei nafnatagna, thini sasa na kaisei nafnatagna. Glepo igre au nodi soasopai siasigla thedi. Eghuteuna glepo ka maloa na igre jaola theome kaisei nafnatagna ngala. Naugna thinigna naprai na kaisei nafnatagna, thinigna glaba na kaisei nafnatagna, thinidi nathunure kaisei nafnatagna. Glepo igre au nodi soasopai siasigla thedi.

⁴² Ka narane kegra fapulo na ginauna jateula tuana eghu ranghidi iheire tela lehehira. Tutuani, thini teke giugilui tahati na theome tangomana te au raugha na, nu thini te karha fapulo na au fabrahu tifa tifa.

⁴³ Thini te giugilui tahati na diꞌa fara filogna na, nu thini te karha fapulo na famane fara filogna na. Thini te giugilui tahati na glaꞌe fara, nu thini te karha fapulo na nheta fara.

⁴⁴ Thini te giugilui tahati na nogna nauthoglu kolho, nu thini te karha fapulo na malagna kligna. Tahati au thinigna nauthoglu, eghuteuna tahati jaola au thinigna kligna.

⁴⁵ Naugna u grioriso te blahi na cheke eghu, “Naikno ulu lahu na mae Adam, God neke vuavuhani mana mala karha.” Nu mae Adam leghu lahu na Tharunga mala tusu meini thofno nakarha na ka naiknore.

⁴⁶ Mae gna kligna na neke theome kulu mei, nu mae gna ka nauthoglu na neke kulu mei.

⁴⁷ Mae Adam ulu lahu na God neke vuavuhani mana ka glose gna nauthoglu igne, nu fapea Adam gne neke mei funu kligna.

⁴⁸ Naiknogna nauthoglu na, mare kaisei ka mae teke mei funu ka glose na. Nu iheire te mala naiknodi kligna re, mare kaisei ka mae teke mei funu kligna na.

⁴⁹ Tutuani, gognaro na tahati kaisei nanaba ka mae teke mei funu ka glose na, nu tahati ginauna mala kaisei balugna mae ihei teke mei funu kligna na.

Mae Jisas neke tapla soruni u glehe na

⁵⁰ Kheraguro, iara magnahaghei te chekeni ka ghotilo igne, thinigna naikno na theome tangomana te tei thoke kligna na. Uve, thini na theome tangomana te au raugha na naugna glepo mala boto kolho. Eghuteuna glepo te mala boto na theome tangomana te au fodu balugna glepo te theome boto kligna na.

^51-52 Iara magnahaghei te chekeni kaisei glepo teke poru tifa ia. Tahati ginauna theome kafe lehe, nu tahati na karhau ngala kate nomhini naogla gna khufli ka narane leghu lahu na, tahati te gnafa na ginauna ghosei tughu ngala jateula nakafli eghu. Uve, kate tanhi gna khufli na, naikno teke lehehira ginauna nake ghosei karha fapulo mala karha fabrahu tifa tifa. Eghuteuna tahati te karha nga teugre mala jaola e tughu.

⁵³ Naugna unha te theome tangomana te au raugha na, mala tughu ka unha te tangomana te au fabrahu. Eghuteuna unha te tangomana te lehe na, mala ke tughu ka unha te theome tangomana te lehe na.

⁵⁴ Eghuteuna kate eni te hui igne, cheke te eghu ka grioriso te blahi na igne thofno tutuani fara, “Glehe na, God thofno roꞌenihi, nei tapla sorunihi eghu pari!”

⁵⁵ “Glehe, aheva nou nolaghi te mala funei frunidi iagho naiknore? Glehe, aheva nou nolaghi iagho te mala goigonidi naiknore?”

⁵⁶ Tutuani, glehe na au nolaghi mala roꞌedi naiknore naugna glehe na funu mei ka nakhibo. Eghuteuna nogna vetula mae Moses na ngala te au nogna nolaghi te mala fatakle nakhibo ka nakarhadare.

⁵⁷ Nu tahati cheke fakelini God, eigna mana te tapla soruni u glehe na ranghi ghita naugna ka nogna gloku noda Lord Jisas Kraes!

⁵⁸ Eghume kheraguro, naugna igne ghotilo kegra heta ka nomi fatutuani na nei thosei snakreni kaisei glepo mala ngali tafri ghami. Ghotilo mala rugusi fabrahu ka nogna gloku Lord na. Naugna ghotilo lasenihi nomi gloku ranghini Lord na theome tangomana te fiti luvu kolho.