Ululahu Korin 14 - Buka Blahi Ka Cheke Holo

Nogna khokofakasai Tharunga te Blahi

¹ Hati nhetami na mala leghuni puhigna namha na. Eghuteuna ghotilo jaola hati nhetami na mala hata keha nogna nafnata khokofakasai Tharunga te Blahi, tulao fariuriu fara te mala hata nolaghi te mala toutonuni chekegna God na.

² Tutuani, ihei te chekeni chekegna God ka soasopai nafnata chekei na, mana theome cheke ka naikno, nu mana cheke ka God kolho. Theo kaisei naikno te tangomana te laseni nafnata cheke tuana, naugna Tharunga te Blahi na neke tusu ranghini mana u nolaghi te mala chekedi glepo te poru igre.

³ Nu ihei te toutonuni chekegna God na, mana ne cheke ka naiknore. Mana toghodi naiknore mala nheta nodi fatutuani na ka Lord balu fabrabrana nei fameomego.

⁴ Ihei te chekeni chekegna God ka soasopai nafnata chekei na, mana tangomana te mala toghoni kolho nogna fatutuani thegna na, nu ihei te toutonuni chekegna God na, mana tangomana te toghodi nodi fatutuani naikno te gnafa ka khiloau na.

⁵ Tutuani, iara magnahaghe ghami ghotilo hui te hata nolaghi te mala cheke ka soasopai nafnata cheke, ke tulaoi, nolaghi te mala toutonuni chekegna God na. Nu jame kaisei mae ka khiloau na au jare mala rurutha gaoghathodi cheke igre ka soasopai nafnata cheke, mana toghoni naikno khiloau na jateula mae mala toutonuni eghu chekegna God na.

⁶ Ba, kheraguro, jame mei te chekeni iara chekegna God ka soasopai nafnata chekei na, tuana na togho ghami ghotilo? Theo! Nu jame te toutonuni iara glepo teke falalase God ka iara na, ba keha glalase ba chekegna God, ba keha farirhiu, tuana nate togho ghami ghotilo na.

⁷ Glepo te theo karha tadi jateula glalahu nifu ba gita teu igre na jaola. Jame te theome koje fakeli kaisei naikno na, tahati na theome lase fakelini khoje tuana.

⁸ Jaola, jame te theo kaisei naikno te kufli fakeli na, naiknore na theome tarabana mala magra.

⁹ Jateula tuana eghu ka ghotilo na. Jame te theome thakle fakeli chekemi ghotilo re, faꞌunha eghu naiknore ame lasedi nga unha te chekedi ghotilo re? Theome tangomana. Naugna cheke te edi ghotilo re ginauna theo nafugna kolho nu jateula kaisei mae te phanga ranghini maloa na ia eghu kolho.

¹⁰ Tutuani, jare na kmana nafnata cheke ka nauthoglu igne. Eghuteuna cheke te gnafa igre au gaoghathodi eghu.

¹¹ Jame te theome laseni iara gaoghathogna unha te chekeni kaisei naikno ka iara na, iara jateula kaisei mae phosa eghu ka mana, eghuteuna mana jaola kaisei mae phosa ka iara.

¹² Ghotilo jateula tuana eghu, eigna ghotilo magnahaghedi fara keha nogna nafnata khokofakasai Tharunga te Blahi na. Eghume hati nhetami na mala hata nolaghi te mala toghoni nodi fatutuani naikno te gnafa ka khiloau gne.

¹³ Eghume ihei te chekeni chekegna God ka keha nafnata chekei na, mana mala toreni God mala tangomana mana jaola te rurutha gaoghathogna unha te chekeni mana na.

¹⁴ Eigna jame te tarai iara ka nafnata cheke te theome laseni iara na, tharungagu iara na ginauna tarai, nu gaoghathogu iara ginauna na theome laseni unha te chekeni na.

¹⁵ Eghume unha nate eni iara na? Uve, iara ginauna tarai ka God balugna tharungagu na, nu iara ginauna jaola tarai balugna gaoghathogu na. Eghuteuna iara ginauna koje ka God balugna tharungagu na, nu iara ginauna jaola koje balugna gaoghathogu na.

¹⁶ Nu jame te kilo fnaknoni God ghotilo ka tharungami kolho na, kaisei naikno te majaghani ka khiloau te au balumi ka tharai na ginauna theome laseni unha te chekeni ghotilo na. Mana ginauna theome kaisei gaoghatho ka nomi tharai nei theome tangomana te chekeni “Amen” teu balumi ghotilo na.

¹⁷ Neuba nomi tharai ghotilo te mala cheke fakelini God na ne keli fara, nomi tharai ghotilo tuana na theome toghoni kolho mana.

¹⁸ Tutuani, iara cheke fakelini God, naugna iara tangomana te chekeni chekegna God ka keha nafnata chekei na, iara ulu ghami ghotilo hui.

¹⁹ Nu kate au iara baludi ka khiloau na, iara magnahaghei te farirhiudi. Eghume, neuba iara ne cheke kolho kaisei ba phei cheke te naba nomhini mare na, tuana te keli uluni jame te chekedi iara niha thogha cheke ka nafnata cheke igre.

²⁰ Kheraguro, puhimi ghotilo re mala klino jateula sua eghu. Thosei edi glepo te diꞌare. Nu ghotilo mala au jateula mae tela biꞌohi eghu ka puhimire ka khiloau gne, thosei ghaoghatho jateula mae sua eghu.

²¹ Ka grioriso te blahi na, Lord ne cheke eghu, “Iara ginauna cheke ka naikno te lasedi soasopai nafnata cheke igre mala cheke baludi nogu naiknore. Uve, iara ginauna cheke ka foflodi naiknodi deleire, neuba, mare ginauna tirodi fanomho ka unha te chekedi iara re.”

²² Eghume nafnata nolaghi te mala chekeni chekegna God ka keha nafnata chekei igne, kaisei fagaglana gna nogna nolaghi God maladi iheire te theome fatutuani nga teu, theome maladi iheire te fatutuanihi. Nu nafnata nolaghi te mala toutonuni chekegna God igne, kaisei fagaglana gna nogna nolaghi God maladi iheire te fatutuani, theome maladi iheire te theome fatutuani nga teu.

²³ Jame kaisei naikno khiloau majaghani ba ihei te theome fatutuani nga teu te mei fodu balumi ghotilo naikno khiloau gre. Eghuteuna mana nomhi ghami ghotilo te hui te cheke ka keha nafnata chekei kolho na, ka gaoghathogna mana na ghotilo meomekro kolho.

²⁴ Nu jame mana mei kate toutonuni ghotilo chekegna God na, cheke igre ginauna toghoni mana mala filo glanidi nakhibognare. Cheke igre ginauna fateni mana,

²⁵ eghuteuna glepo te poru ka nagnafagna mana re ginauna thakle. Mana ginauna tuturupuku soru mala kilo fnaknoni God, eghuteuna mana ginauna cheke eghu, “Tutuani fara, God na au balumi ghotilo!”

Puhi te keli te mala tarai fodu

²⁶ Kheraguro, igne unha te ghathoni iara na. Kate khapru ghotilo te mala tarai na, ghotilo te gnafa na mala kafe totogho. Kaisei naikno mala koje, eghuteuna keha na mala farirhiu, eghuteuna keha na mala chekeni unha teke falalase God tagna na, eghuteuna keha na mala chekeni chekegna God ka soasopai nafnata chekei, eghuteuna keha na mala rurutha gaoghathogna cheke tuana. Gloku te gnafa igre mala toghoni nodi fatutuani naikno te gnafare.

²⁷ Kate cheke kaisei ka ghotilo ka soasopai nafnata cheke igre na, phei ba thilo naikno kolho te mala eni tuana. Nu mare ginauna theome tangomana te orio cheke na, eghuteuna keha naiknoi te mala rurutha gaoghathogna unha te chekeni mare na.

²⁸ Nu jame te theo kaisei naikno jare te mala rurutha gaoghathogna nafnata cheke tuana na, ihei te magnahaghei cheke ka keha nafnata chekei igne na nabagna na mana mala au kmu kolho. Mana nabagna na mala cheke kolho ka thegna mala nomhini God.

²⁹ Eghuteuna te mala toutonuni chekegna God na, theome kmana, nu phei ba thiloi ngala te mala cheke na. Eghuteuna keha naiknore mala vahi fakelini unha te toutonuni mare na.

³⁰ Nu jame chekegna God na ghosei mei ka keha naikno te au balumi ghotilo re, mae ihei teke kulu cheke na nabagna na au kmu.

³¹ Eghume ghotilo te gnafa na tangomana te toutonuni chekegna God na, kaisei naikno na tangomana te cheke ke leghugna keha naikno na. Ka puhi igne ghotilo tangomana te mala farirhiudi nei fameomegodi teu naikno te gnafare.

³² Mae iheire te toutonuni chekegna God na, mana tangomana te funei fruni ni nogna nolaghi thegna te mala toutonu na.

³³ Naugna God theome magnahaghei ghita te fiti reꞌe teu ka glepodi khiloaure, nu magnahaghei ghita te loku fakeli nei au ka pharikeli. Igne tutuani fara ka nogna naikno God ka khiloau te gnafa gre.

³⁴ Kheraguro, te keli na goro gaꞌasere nabadi na mala au kmu kolho kate tarai na. Iara theome snakredi reꞌe te cheke na. Rehati jaola mala theome baubatu. Igne unha te chekeni ka nogna vetula mae Moses na.

³⁵ Jame te magnahaghe laseni reꞌe kaisei glepo na, reꞌe ginauna tangomana te ghusnadi khetodire kate tei posa ka sugadi na. Theome keli fifilogna na te kegra haghe reꞌe te cheke ka faidu na.

³⁶ Tore! Chekegna God na neke theome mei funu ka ghotilo, eghuteuna theome ghotilo themi kolho teke hata chekegna God na!

³⁷ Jame kaisei mae ghathoni ka gaoghathogna na mana kaisei mae profet, ba nogna nolaghi Tharunga te Blahi na au ka mana, mana mala laseni eigna unha te riso ari iara ka ghotilo igne te mei funu ka Lord.

³⁸ Nu jame te theome magnahaghei nomhi mana cheke igne na, ghotilo jaola mala thosei nomhini chekegna mana na eghu.

³⁹ Eghume kheraguro, ghotilo fariuriu fara te mala hata nolaghi te mala toutonuni chekegna God na. Nu ghotilo mala thosei fanograni ihei te au nolaghi te mala chekeni chekegna God ka keha nafnata chekei na.

⁴⁰ Eghuteuna ka khiloau na ghotilo mala edi gobigna lepore ka puhi te keli, theome mala fiti reꞌe eghu kolho.