Ululahu Korin 12 - Buka Blahi Ka Cheke Holo

Nogna nolaghi Tharunga te Blahi

¹ Gognaro na kheraguro, iara magnahaghe ghami ghotilo te lase fakelini eigna nogna khokofakasai Tharunga te Blahi nate tusu mei God ka nogna naiknore.

² Uve, ghotilo laseni kani au teku ghotilo ka nodi puhi iheire te theome fatutuani God ra, mae Satan neke batu fadelei ghami te mala pogho soru ghotilo ka mumuju te theo karha tadire.

³ Eghume, te chekeni iara ka ghotilo na, theo kaisei naikno te cheke eghu ka nogna baubatu Tharunga gna God na, “Jisas na mae diꞌa!” Eghuteuna ihei ngala te baubatu Tharunga te Blahi na, mana tangomana te thofno cheke eghu na, “Jisas na mae funei!”

⁴ Jare na soasopai nafnata khokofakasai, nu kaisei Tharunga te Blahi ngala teke tusu meidire eghu.

⁵ Jare na soasopai nafnata gloku ranghini God, nu kaisei Lord ngala te loku ranghini tahati na eghu.

⁶ Eghuteuna jare na soasopai nafnata gloku tahati te mala toghodi naikno te gnafare, nu kaisei God ngala teke tusu meidi ka tahati soasopai nafnata nolaghi te mala edi gloku igre.

⁷ Tutuani, Tharunga te Blahi na falalase nogna nolaghi na ka tahati gnafa, mala tangomana tahati te toghodi naiknore.

⁸ Tharunga te Blahi na tusu ranghini kaisei naikno glalase te mala toutonuni chekegna God na ka gaoghatho te keli, eghuteuna ka keha naikno na tusu ranghini nolaghi te mala cheke ka glalase te biꞌo fara mala toghodi naiknore.

⁹ Ka kaisei naikno Tharunga te Blahi na tusu ranghini nolaghi te mala thofno fatutuani. Eghuteuna ka keha naikno na tusu ranghini nolaghi te mala fakelidi iheire te fogra.

¹⁰ Eghuteuna ka keha naikno na Tharunga te Blahi tusu ranghini nolaghi te mala eꞌei kofubobhoi. Ka keha naikno na nolaghi mala toutonuni chekegna God na jateula mae profet eghu. Eghuteuna ka keha naikno na nolaghi mala filo glanini nogna nafnata nolaghi naikno, jame te nogna God ba theo. Ka keha naikno na Tharunga te Blahi na tusu ranghini nolaghi te mala cheke ka keha nafnata cheke. Eghuteuna ka keha naikno na tusu ranghini nolaghi te mala rurutha gaoghathodi nafnata cheke tuare.

¹¹ Kaisei Tharunga te Blahi igne ngala te edi glepo igre leghuni unha te magnahaghei thegna. Mana tusu mei ka soasopai naikno nolaghi te mala loku ka nafnata khokofakasai igre na.

Tahati leghuni Kraes mala kaisei thini ngala

¹² Kraes na jateula kaisei thini eghu, eghuteuna au kmana grerege thini tagna. Neubane au kmana nafnata vido tagna, mana kaisei thini ngala.

¹³ Eghuteuna neuba tahati ne mae Jiu ba theome mae Jiu, mae sneka ba theome mae sneka, kaisei Tharunga te Blahi ngala teke kafe faꞌapublahi ghita na mala jateula kaisei thini eghu tahati. God neke tusu ranghi ghita hui kaisei Tharunga te Blahi ngala mala au ke lamnada.

¹⁴ Eghuteuna thinigna naikno na theome kaisei vido kolho, nu au soasopai nafnata vido.

¹⁵ Jame ghahe na cheke eghu, “Iara theome khame, eghume iara theome nogna thini eghu,” neuba, ghahe na kaisei vido ka thini ngala.

¹⁶ Jame khuli na cheke eghu, “Iara theome tatha, eghume iara theome nogna thini eghu,” neuba, khuli na kaisei vido ka thini ngala.

¹⁷ Jame thini thongana na tatha kolho, thini na theome tangomana te nonomho na. Ba, jame thini thongana na khuli kolho, thini na theome tangomana te gnangho na.

¹⁸ Nu theome ka puhi tuana God teke vuavuha ghita na. Tutuani mana neke vuavuha kmana vido malagna thinida na eghuteuna lilisei soasopai vido aheva mana te magnahagheni.

¹⁹ Jame kaisei vido kolho thini na meuna, tuana theome thini kolho.

²⁰ Theome jateula tuana eghu, naugna kmana soasopai nafnata vido nu thini na kaisei glepo ngala.

²¹ Eghume, tatha na theome tangomana te cheke eghu ka khame na, “Iara theome magnahaghe nigho.” Eghuteuna pha'u na jaola theome tangomana te cheke eghu ka phei ghahere, “Iara theome magnahaghe ghami ghopa.”

²² Theo! Vido ka thinida ne theome nheta teu tahati igre, tahati thofno magnahaghedi fara.

²³ Eghuteuna vido ka thinida ne theome glepo biꞌo teu tahati igre, igre ngala te mala thofno filo fakelidi tahati re. Eghuteuna vido te mamajadi tahati igre ngala te mala pipichi fakelidi tahati re.

²⁴ Nu vido te keli fara ka thinida igre, theome mala toku tafru ka pohe. God thegna neke vuavuha gobigna lepo ka thini na igre neke nhaꞌa fodu ka nafnata puhi te mala fnakno vido ne theome keli teu tahati gre.

²⁵ Eghume ka puhi igne, soasopai vido igre na theome fnota, nu mare te gnafa na tangomana te ghathodi kehare.

²⁶ Jame kaisei vido au papara, keha vidore na jaola au papara. Ba jame kaisei vido ka thinida na fnakno, keha vidore na mala jaola gleale'a.

²⁷ Eghume, ghotilo te gnafa na thinigna Kraes. Ghotilo te gnafa na kaisei vido ngala ka thini tuana.

²⁸ God neke lilisei soasopai naikno te mala edi soasopai gna gloku ka khiloau gne. Ulu lahu na, mana neu lilisei hatimare mae khuru, fapea na, hatimare mae profet. Fatilo na, hatimare mae velepuhi. Eghuteuna kehare mala eꞌei kofubobhoi, nei kehare mala fakelidi iheire te fogra, nei kehare mala totogho, nei kehare mala baubatu ka khiloau, nei kehare mala cheke ka keha nafnata cheke.

²⁹ Mare theome kafe mae khuru ba profet ba velepuhi. Mare theome kafe au nolaghi mala eꞌei kofubobhoi,

³⁰ ba mala fakelidi iheire te fogra, ba mala cheke ka keha nafnata cheke, ba mala rurutha gaoghathogna nafnata cheke tuana.

³¹ Nu ghotilo heta mala hata khokofakasai te thofno keli fara teke tusu mei mae Tharunga te Blahi. Gognaro na, iara na cheke ka ghotilo eidi unha te thofno ulu fara re.