Ululahu Korin 10 - Buka Blahi Ka Cheke Holo

Thosei leghudi puhidi mae Jiu te tirodini God

¹ Kheraguro, iara magnahaghe ghami ghotilo te kulu ghathodi kuꞌeda teke leghuni mae Moses tifa ka namono nagou ia. Kaisei khoveo neke batudi neke kasa ka thongna te kiloni “Thongna Ukru”.

² Eghuteuna mare neke kafe leghuni mae Moses neke kaisei balugna mana jateula te apublahi balugna mana ka khoveo nei ka thongna neku.

³ Mare neke kafe ima gano teke tusu ranghidi God na.

⁴ Eghuteuna mare kafe koꞌu ka khoꞌu teke fafura mei God ranghidi ka thina teke tei baludi na. Thina igne Kraes thegna ngala.

⁵ Neuba God neke toghodi ngau, kmana theome thofno leghuni mana. Eghume God neke diꞌatagnadi fara nei falehedi neku ke lamnagna namono nagou na.

⁶ Glepo igre jateula te cheke faheta eghu ranghi ghita tahati. Tutuani, glepo igre farirhiu ghita mala thosei magnahaghedi fara tahati glepo te diꞌare jateula kuꞌeda tifa tuare eghu.

⁷ Tahati mala thosei pogho soru ka mumuju jateula mare eghu. Eigna grioriso te blahi na cheke eghu, “Naiknore gnokro soru mala ima nei koꞌu. Aonu kegra haghe mala tei gnognoro tafri.”

⁸ Tahati mala thosei gnognoro tafri jateula mare eghu, eigna God neke falehedi varadaki thilo thogha naikno ka mare ka kaisei narane kolho.

⁹ Eghuteuna tahati mala thosei fariuriuni Lord jateula mare eghu, eigna mogo na neke falehedi mare.

¹⁰ Eghuteuna tahati mala thosei buiburini nogna gloku God ka nakarhadare jateula mare eghu, eigna engel gna glehe na neke falehedi mare.

¹¹ Glepo teke edi kuꞌeda igre jateula te cheke faheta eghu ranghi ghita eigna nogna gloku God na. Naugna tahati auhi ka narane leghu lahu te mala ari te gnafagna nauthoglu igne.

¹² Eghume, ihei la kegra hetahi thegna ka fatutuani na teu ka gaoghathogna na, filo fakeli eghu, glahu uka kolho.

¹³ Gobigna lepo te mei fariuriu ghami ghotilo igre, nafnata glepo thoke dila naikno te gnafare. Nu God ginauna theome ghatho ihoni nogna nhaꞌa cheke te mala togho ghami na. Tutuani, mana ginauna theome snakreni kaisei fariuriu mala funei frunini nomi nolaghi ghotilo na. Naugna kate thoke mei ka ghotilo fariuriu na, God ginauna togho ghami ghotilo mala tangomana ghotilo te kegra heta na. Aonu, God ginauna jaola tusu ranghi ghami kaisei nabrou te mala gnafagna u fariuriu tuana.

Eigna gaghamu mumuju nei ima blahi

¹⁴ Eghume kheraguro, thosei pogho soru ka mumuju.

¹⁵ Iara cheke ka ghotilo iheire te lalase ra mala vahini themi unha te chekedi iara tami gre, te doglo ba theo.

¹⁶ Ghotilo ghathoni u hinao te cheke fakelini tahati ka God ia. Kate koꞌu tahati ka hinao igne, tahati kaisei ka dadaragna Kraes. Eghuteuna kate ima u bret te piphike igne, tahati kaisei ka thinigna Kraes.

¹⁷ Eghuteuna kaisei bret ngala. Eghume, neuba tahati ne kmana, tahati kaisei thini ngala, naugna tahati te gnafa na kafe ima ka kaisei bret ngala.

¹⁸ Ghatho laodi naiknodi Israel ra. Kate imani mare unha teke fafara ka God ka olta na, mare kaisei ngala balugna God.

¹⁹ Ba, ghotilo laseni eigna unha te chekeni iara igne? Naugna mumuju ba gano te fafara ka mumuju igre thofno glepo ulu fara?

²⁰ Theo! Nu unha te fafara iheire te theome fatutuani ni God re, mare fafara ka naitu kolho, theome ka God. Eghuteuna iara theome magnahaghe ghami ghotilo te kaisei balugna naitu na.

²¹ Theome naba ghotilo te koꞌu ka nogna hinao Lord na nei jaola koꞌu ka nogna hinao naitu na. Eghuteuna ghotilo theome naba la te ima ka nogna tevo Lord na nei jaola ima ka nogna tevo naitu na.

²² Ba, tahati magnahagheni Lord te diꞌatagna? Ba, tahati nheta fara uluni mana? Theo fara!

Namha na batudi naikno khiloaure

²³ Tutuani fara keha naikno ka ghotilo cheke eghu, “Iara tangomana te eni unha te magnahagheni thegu na.” Nu gobigna lepo igre theome tangomana te mala togho ghita nei mala fakeli ghita teuna.

²⁴ Eghume, theome tangomana kaisei naikno te ghathoni kolho thegna na. Nu tahati mala eni unha te keli na mala toghodi keha naiknore.

²⁵ Tutuani, tahati tangomana te ima gano teke foli ka maket na. Thosei ghusnani unha teke eni mare ka nafnata gano igne te mala laseni iagho te jafra mala ima na.

²⁶ Ghotilo tangomana te ima na, naugna grioriso te blahi na cheke eghu, “Nauthoglu nei gobigna lepo ke lamnagna teu igre nogna Lord.”

²⁷ Jame kaisei mae te theome fatutuani ni Kraes tore ghami ghotilo mala tei ima balugna. Jame te magnahaghei ghotilo na, ima unha te lilisei mana ke ulumi na, thosei ghusna mala laseni jame iagho ghathoni glahu jafra te ima na.

²⁸ Nu jame kaisei mae cheke eghu ka ghotilo, “Gano igre neke fafara ka mumuju,” ghotilo ghathoni cheke mana igne mala thosei ima gano tuana.

²⁹ Ka gaoghathomu iagho na keli kolho, nu thosei fadidiꞌani gaoghathogna keha mae na eghu. Eghuteuna iagho na jaola fadidiꞌani mana. Glahu cheke eghu kaisei mae, “Naugna unha si mae gne te lhoti ghau iara te theome eni iara unha te magnahagheini iara gnea?

³⁰ Iara tangomana te cheke fakelini God eigna gano tuana. Eghume naugna unha si keha naikno gre te cheke fanogra ghau iara eigna glepo teke cheke fakelinihi ka God gnea?”

³¹ Uve, tutuani, jame te ima, ba koꞌu ba eni ghotilo unha na, ghotilo mala edi gobigna lepore ka puhi te mala kilo fnaknoni God.

³² Thosei eni kaisei puhi te mala roꞌeni nodi fatutuani keha naiknore, neubane mae Jiu, ba mae te theome Jiu, ba naikno khiloau.

³³ Ghotilo mala leghuni puhigu iara na. Naugna leuleghu fata na iara fariuriu toghodi keha naiknore te mala heta nodi fatutuani na. Iara theome hironi te mala fakeli ghau thegu na, nu ghathodi keha naiknore mala toghodi, nei mala tangomana God te fakarhidi.