Ululahu Korin 1 - Buka Blahi Ka Cheke Holo

¹ Iara mae Pol. God neke vahi ghau iara mala kaisei nogna khuru mae Jisas Kraes. Ghepa mae thabusigna Sostinis

² te riso ari letas igne ka ghotilo naikno khiloau te au ka namono biꞌo Korin. God kilo ghami ghotilo mala nogna naikno blahi mana baludi naikno heva heva te tore ka nanghagna noda Lord Jisas Kraes. Jisas noda Lord tahati gnafa!

³ Iara toreni nogna khokofakasai nei pharikeli God Kmada nei nogna mae Jisas Kraes noda Lord te mala au balumi.

Mae Pol ne cheke fakelini God

⁴ Iara cheke fakelini God leuleghu fata naugna mana neke tusu ari ka ghotilo nogna khokofakasai na mala kaisei ghotilo balugna Jisas Kraes.

⁵ Naugna igne ghotilo thofno dedei fara ka puhi te gnafa, ka nomi cheke ba ka nomi glalase fateo.

⁶ Jaola, Nonomho te Keli eigna Kraes igne heta fara ka nakarhamire.

^7-8 Eghume God neke tusu ari ka ghotilo nogna khokofakasai te gnafa Tharunga te Blahi kate ofoni teu ghotilo narane mala ke pulo meigna noda Lord Jisas Kraes. Eghuteuna Kraes ginauna jaola togho ghami ghotilo mala heta nei doglo eghu ke ulugna God ghilei thoke mei narane tuana.

⁹ God na tathaji fabrahu nogna nhaꞌa cheke na ranghidi nogna naiknore. Mana kilo ghami ghotilo mala au fakeli balugna Thugna Jisas Kraes noda Lord.

Puhi biꞌo te fotani khiloau

¹⁰ Kheraguro, gognaro na iara cheke heta ka nanghagna noda Lord Jisas Kraes. Iara tore ghami fara ghotilo mala thosei eni ghotilo nafnata puhi te fnota tafri ghotilo igne. Te keli na ghotilo jame ke funu loku fodu ka kaisei nagnafa nei kaisei gaoghatho ngala.

¹¹ Kheraguro, keha naikno ka tharaknagna Kloe te toutonu ka iara na ghotilo magra koba.

¹² Igne gaoghathogna unha te chekeni iara na. Keha mae cheke eghu, “Iara nogna mae Pol.” Kehare cheke eghu, “Iara nogna mae Apolosi.” Kehare cheke eghu, “Iara nogna mae Pita.” Eghuteuna kehare cheke eghu, “Iara nogna mae Kraes.”

¹³ Ghotilo theome tangomana te fotani thinigna Kraes na! Ba, iara mae Pol si teke tupijuru eimi ghotilo ka gaju fafatha ia? Ba, ghotilo neke apublahi ka nanghagu iara sia? Theo!

¹⁴ Iara cheke fakelini God naugna iara neke theome apublahi ghami ghotilo. Mae Krispasi ghe mae Gaeasi ngala teke faꞌapublahidi iara re.

¹⁵ Eghume theo kaisei naikno te chekeni neke apublahi mala leghu ghau iara teuna.

¹⁶ Tutuani, iara theome laseni ihei teke faꞌapublahini iara na, nu mae Stefanas nei tharaknagna eghu kolho.

¹⁷ Kraes neke theome kuru ghau iara mala faꞌapublahi naikno kolho. Theo. Mana neke kuru ghau iara mala toutonu eigna u Nonomho te Keli na. Iara theome tangomana te toutonuni u Nonomho te Keli na ka nafnata puhi te eni mae ihei te lalase fara na, na eghunu glehe teke eni Kraes ka gaju fafatha na igne theo nafugna kolho eghu.

God tusu ranghini Kraes nolaghi nei glalase

¹⁸ Thoutonu eigna glehegna Kraes ka gaju fafatha na igne theo gaoghathogna ka iheire te leghuni nabrou te mala lehe tifa te tifa. Nu tahati te karha ka God na, u thoutonu igne nogna nolaghi God mala fakarha ghita.

¹⁹ Jateula te chekeni ka grioriso te blahi na cheke eghu, “Iara ginauna fahuidi nodi glalase mae iheire te lalase fara, eghuteuna rorhoꞌe nodi glalasere mala theome tangomana mare te lalase na.”

²⁰ Eghume ne faꞌunha si naikno te lalase fara ra, ba mae velepuhigna vetula nogna mae Moses ra, ba mae iheire te laseni fara gaoghathogna nauthoglu ra? Mare tangomana te cheke tughu ka God na? Theo, naugna God la falasenihi ka tahati u glalase gna nauthoglu gne jateula thoutonu te theo nafugna eghu kolho.

²¹ Ninhigrana fara ranghidi naiknore te lase fakelini God leghuni nodi gaoghatho thedi na. Nu God magnahaghei te leghuni gaoghathogna thegna te hata u cheke te toutonuni tahati igne mala fakarhidi iheire te fatutuani ni mana. Neuba keha naiknore ne cheke eghu, “U thoutonu igne theo nafugna kolho.”

²² Tutuani, hatimare mae Jiu magnahaghei filo fagaglana funu ka God, eghuteuna hatimare mae Griki hiro glalase.

²³ Nu tahati toutonu eigna Kraes kolho, mae ihei teke lehe ke kligna gaju fafatha. Hatimare mae Jiu theome magnahaghei nomhini u thoutonu igne, eghuteuna ka hatimare mae te theome Jiure u thoutonu igne theo nafugna kolho.

²⁴ Nu tahati naikno teke kilo ghita God ra, neubane mae Jiu ba theome Jiu, tahati laseni u thoutonu eigna Kraes igne, falalase ranghi ghita God te nolaghi nei lalase fara.

²⁵ Naugna neuba naiknore ne ghathoni puhigna God na te theo nafugna kolho neu, te chekeni iara ka ghotilo na, puhigna God na uludi fara nodi glalase naiknore. Eghuteuna neuba naiknore ne ghathoni puhigna God na glaꞌe fara neu, nogna puhigna mana na heta fara ke uludi nodi nanheta naiknore!

²⁶ Kheraguro, ghathodi si ghotilo nakarhami kani teke kilo ghami God ia. Ka tathagna naikno na, theome kmana ka ghotilo te lalase na, theome kmana ka ghotilo te fnakno na, nei theome kmana ka ghotilo te karha funei na.

²⁷ Nu God vahidi iheire te theome lalase teu naiknogna nauthoglu igne mala famamajadi iheire te lalase fara. Mana vahidi iheire te theome nheta teu naiknogna nauthoglu igne mala famamajadi iheire te nheta fara.

²⁸ Eghuteuna mana jaola vahidi iheire te pari fara nei diꞌa fara nei fiti naikno kolho teu naiknogna nauthoglu igne mala tapla sorudi iheire te fnakno fara mala theo nafudi ka nauthoglu igne.

²⁹ God neke eni igne mala theome tangomana kaisei naikno te fahaehaghe ka tathagna God na.

³⁰ Nu God neke togho ghami ghotilo mala kaisei ghotilo balugna mae Jisas Kraes. Eghuteuna ka Kraes na, tahati lalase fara, eghuteuna doglo fara ka tathagna God na, nei mala nogna naikno blahi mana. Kraes na jaola neke foli fajifla ghita ka nakhibo.

³¹ Eghume, tahati laseni gaoghathogna grioriso te blahi te cheke eghu igne, “Mae ihei te magnahaghei fahaehaghe na, mana mala fahaehaghe kolho ka unha teke enihi Lord na.”