Ululahu Kings 9 - Buka Blahi Ka Cheke Holo

Lordneke pulo mei ka King Solomon

¹ King Solomon loku ne gnafa nogna Sugablahi Lord na balugna nogna suga biꞌo thegna na, nei keha glepo teke magnahaghei edi mana re.

² Aonu Lord neke fapea thakle ka mana jateula teke eni ka mana Gibeon tifa ia neu.

³ Lord ne cheke eghu ka mae Solomon, “Iara nomhini nou tharai iagho ia nei unha teke toreni iagho ia. Eghuteuna iara gognarona fablahi Sugablahi teke horo iagho igne. Eghuteuna naiknore ginauna pogho soruni fabrahu nanghagu iara na ka vido igne. Iara ginauna na reireghini nei ghathoni eghu fabrahu Sugablahi igne.

⁴ “Iagho mala leghuni kolho puhigu iara te doglo gne, jateula kmamu King Devet tifa ia eghu. Iagho mala leghudi nogu vetula iara gre, eghuteuna edi gobigna lepo teke chekedi iara ka iagho ra.

⁵ Jame te edi iagho gobigna lepo igre, iara ginauna eni unha teke nhaꞌa chekeni iara ka mae kmamu iagho ia. Tutuani fara, iara neke chekeni fabrahu ka mana te keha mae ka vikegna mana igne ginauna king gna Israel.

⁶ “Nu jame ghotilo mae Israel ra, ba iheire nate karha mei ke leghumi ghotilo ra eghu, te theome leghudi ghotilo nogu vetula nei cheke teu teke chekedi iara ka ghotilo ra te pogho soru ka keha god delei teuna,

⁷ iara ginauna na khi fajifla ghami ghotilo mala jifla ghotilo ka namono teke tusu ari iara ka ghotilo igne. Eghuteuna iara ginauna theome au ka Sugablahi teke fablahi iara mala pogho soruni nanghagu iara na teku igne. Eghuteuna naiknodi keha kantri are ginauna cheke fadiꞌa ghami nei maꞌe ghami eghu ghotilo naiknomi Israel.

⁸ Eghuteuna Sugablahi igne ginauna na jateula kaisei bukrei thina eghu kolho. Aonu naikno te liu jare na ginauna rhana nodi, nei jaglo nodi eghu fara. Aonu mare na cheke eghu, ‘Naugna unha si Lord te goigoni ni namono igne balugna Sugablahi ignea?’

⁹ Naugna mare neke tei kokoni mana neke pogho soru ka keha god delei, aonu mana neke snakre mei puhi biꞌo ka mare. Mare neke eni igne, neuba Lord, nodi God mare neke hata fapulodi Ijep kuꞌedi mare tifa ra.”

King Solomon ne snakre lao varadaki namono biꞌo ka King Hiram

¹⁰ Kate gnafadi varadaki finogha igre, King Solomon ne babana phei suga biꞌo, nogna Sugablahi Lord nei nogna suga thegna.

¹¹ Eghuteuna King Hiram gna Taea ne famei thaba gaju sida nei keha famane nafnata gaju balu gol ka King Solomon, mala tangomana mana te eni gloku igne. Kate ari te gnafa gloku na, King Solomon ne snakre lao varadaki namono ke lamnagna provins Galili ka King Hiram.

¹² Nu mae Hiram jifla Taea ne tei filodi varadaki namono igre ne theome magnahaghedi.

¹³ Aonu mana ne cheke eghu ka King Solomon, “Ghema kheraguo, iara theome gleꞌadi namono igre! Unha nafnata namono site tusu mei iagho ka iara igre ia?” Aonu mana ne kiloni vido te au namono igre, “Kabul.” Nangha igne au ngala ghilei mei posa ka narane gognaro gne.

¹⁴ Neubane eghu ngau, King Hiram ne tusu lao ka King Solomon fati thogha kilo gol eidi namono igre.

Keha gloku te edi King Solomon

¹⁵ King Solomon ne huhurudi mare mala loku ka nogna Sugablahi Lord na, balugna nogna suga biꞌo thegna na. Mare fafodu glose ka gerigna thogele Jerusalem mala tangomana mare te horo suga jare na, eghuteuna mare jaola ne bara ne ligoho namono na ka thina. Eghuteuna mare ne horo thilo namono biꞌo, Haso, Megido nei Gesa.

¹⁶ Tifa na king gna Ijep na neke magra ka namono Gesa. Mana uluni namono igne neke gnubra ka khaꞌaghi, eghuteuna mana aknu falehe naiknodi Kenan teke au ka namono igne. Kate tolaghi ka King Solomon thugna gaꞌase na, king gna Ijep igne ne snakreni namono igne ka thugna gaꞌase na, jateula kaisei nogna namha neku ka naꞌa.

¹⁷ Aonu King Solomon ne chekedi nogna mae glokure ne horo fabiꞌo namono biꞌo igne jare. Mare horo namono Bet-Horon te au ka pesigna thogele na,

¹⁸ nei namono Balat ghe Tadmoa ke lamna namono nagou Juda.

¹⁹ Eghuteuna mare jaola horo keha namono biꞌo mala lilisei gano, chariot mala magra nei hose. Eghuteuna mare jaola ne horo keha glepo te magnahaghei edi mana Jerusalem nei Lebanon, nei ka keha vido aheva te funei frunidi mana re.

^20-21 Ka narane te uluni naiknodi Israel kantri igne, mare ne theome aknu falehe naikno te gnafa te au ka kantri igne. Naikno igre mei funudi ka vikegna mae Amo, ka vikegna mae Het, ka vikegna mae Peris, ka vikegna mae Hivi, nei ka vikegna mae Jebus. Aonu keha vike te theome naiknodi Israel re au lau ka nodi namono maedi Israel igne. King Solomon huhurudi mare mala loku jateula naikno sneka eghu fabrahu Israel.

²² Nu mae Solomon neke theome nhaꞌa lao gloku jateula sneka eghu ka naiknodi Israel, mare loku jateula nogna soldia, ofisa, komanda gna armi, mae biꞌo ka gavman, nei mae kapten ka chariot nei mae kapten te saghe ka hose.

²³ Eghuteuna King Solomon jaola ne lilisei glima gobi glimafulu maedi Israel mala mae kapten biꞌo ka mae te sneka igre nei maedi Israel te huhurudi mana te mala edi nogna glokure.

²⁴ Eghuteuna kate gnafa nogna suga biꞌo thugna gaꞌase king gna Ijep igne, mae Solomon ne hata fajiflani naꞌa ka nogna namono biꞌo mae Devet na mala tei au ka nogna suga na. Ke leghu igne mana ne fafodu glose ka kaisei vido rhegna thogele ke lamna Jerusalem.

²⁵ Thilo fata leuleghu finogha, King Solomon fafara ka Lord ka olta teke eni mana na. Fafara te eni mana igne thofno knoro fara, mana eni fafara igne mala laseni naiknore te au fakeli mana balugna Lord. Eghuteuna mana jaola gahu insens ranghini Lord. Ka nafnata puhi igne, mana edi gobigna lepo igre kate tarai ka nogna Sugablahi Lord teke horo mana na.

²⁶ King Solomon jaola ne horo kmana vaka Esion-Geba rhegna Elat, ka gratha Thongna Ukru Idom.

²⁷ Aonu King Hiram ne kuru tei keha nogna mae kru te lase loku ka vaka. Aonu mare tei ne loku baludi nogna mae gloku mae Solomon ka vaka igre.

²⁸ Eghuteuna mare tei ka vaka mala tei Ofia. Eghuteuna mare hata neke pulo mei nabotho fati thogha glima gobi kilo gol ka King Solomon.