Ululahu Kings 7 - Buka Blahi Ka Cheke Holo

Suga gna King Solomon

¹ King Solomon jaola ne babana kaisei suga biꞌo malagna thegna. Suga igne hata nabotho thilo finogha neke gnafa nga.

^2-3 Mare kiloni suga igne, “Gaju Gna Lebanon.” Naugna suga igne hohoro ka gaju gna Lebanon. Brahugna suga igne thokeni phiatutu glima mita, eghuteuna krepa gna na thokeni varadaki thilo mita. Eghuteuna haghe gna na thokeni nabotho thilo mita vidogna. Suga igne au fati thura khegra biꞌo ka sida. Thura khegra te gnafa igre au nabotho glima khegra tagna. Kligna ka khegra igre, mare lilisei phiatutu glima thaba sida biꞌo. Eghuteuna suga biꞌo igne mare hohoro ka thaba sida.

⁴ Ka phei phile gringni gna suga igne, au thilo thura wida.

⁵ Eghuteuna mare horo thilo grengatha ke ulugna suga igne.

⁶ King Solomon ne horo keha chogho, brahugna suga igne thokeni varadaki phei mita vidogna, eghuteuna krepagna na thokeni nabotho thilo mita vidogna. Suga igne mare kiloni, “Suga Khegra Biꞌo.” Eghuteuna ke ulu na au kaisei varanda aheva khegra biꞌo igre te loku haghegna gna varanda igne.

⁷ King Solomon jaola ne horo chogho gna sape nafnakno te kiloni mare, “Chogho mala Fate.” Ka chogho igne te mala gnokro King Solomon te mala fanomho ka nodi cheke naiknore. Mare horo gringni gna na ka thaba sida, funu pari tei posa kligna.

⁸ Ke leghugna chogho mala fate igne, mare au keha suga na malagna King Solomon. Nogna suga mana igne falithui kaisei glalaba. Eghuteuna mare horo kaisei suga malagna khetogna king, thugna king gna Ijep.

⁹ Suga tuare mare horo ka famane thina, funu ka khotogna pari na tei posa kligna. Thina igre, mare famane kato fadoglo mala thofno horoghoto fakeli. Mare hata mei famane thina biꞌo igre mala horo ke kosi nei falithuidi glalabadi suga igre.

¹⁰ Khotogna pari na, mare eꞌei ka famane thina biꞌo. Brahudi keha thina biꞌo igre, thokedi thilo mita vidogna, eghuteuna kehare fati mita vidogna.

¹¹ Ke kligna khotogna igne, au keha famane thina te kato fadoglo ka fafaja teke eni mare na, eghuteuna jaola au thaba sida te lilisei mare kligna lahu na.

¹² Gringni te tei faligohoni glalabagna nogna suga king na, nei gringni te tei faligohoni glalabagna Sugablahi na, nei gringni te tei faligohoni varanda ke ulugna Sugablahi na eghu mare ne loku ne kaisei nanabadi ngala. Mare ne horo kaisei thura thaba mala au ke kligna gna fatilo thura thina na, funu ka glalaba pari tei posa kligna ka gringni na.

Nogna gloku mae Huram

^13-14 King Solomon ne fatei cheke ka kaisei mae gna Taea, nanghagna na Huram. Mae igne lalase fara te edi thua nafnata glepo ka bras. Kmagna na jaola thofno laseni fara te edi thua nafnata glepo ka bras na, nu mana la lehehi. Idogna mae Huram gne neke karha mei ka vikegna mae Naftali.

Mae Huram ne edi phei khegra biꞌo ka bras

¹⁵ Mae Huram ne edi phei khegra biꞌo ka bras. Haghedi khegra igre nhana mita, eghuteuna krepadire kaisei mita vidogna.

¹⁶ Eghuteuna mana jaola hohoro phaꞌudi phei khegra igre ka bras mala lilisei kligna ka khegra brahu igre. Haghedi phaꞌudire salaꞌuni phei mita.

¹⁷ Phaꞌudi phei khegra igre, mana lalaoni ka bras chen mala jateula fangna eghu filogna na. Mana hohoro fitu chen ka sopai phaꞌudi phei khegra igre.

¹⁸ Eghuteuna mana jaola ne lalaoni phei thura ka thotoghaledi sisi pomegranet.

¹⁹ Phaꞌudi khegra te gnafa ka varanda na igre jateula famane sisi te kiloi lili eghu filo laodire. Eghuteuna haghedi phaꞌudire thogra thokeni phei mita.

²⁰ Aonu phaꞌudi phei khegra biꞌo igre, mae Huram ne lalaoni baludi phia gobi thotoghaledi sisi pomegranet faligohoni kligna ka vido te jateula fangna teu ka bras teu te lithui igne.

²¹ Mae Huram ne fakegra haghe phei khegra biꞌo igre ke ulugna varandagna Sugablahi na. Kaisei te au ke mata na, mana kiloni Jakin. Eghuteuna keha te au ke raru na, mana kiloni Boas.

²² Phei phaꞌudi kligna ka phei khegra igre filodire jateula thotoghale sisi te kiloni lili eghu. Aonu glokudi phei khegra igre la gnafahi.

Mae Huram ne horo tangk ka bras

²³ Mae Huram ne horo kaisei tangk khoꞌu ka bras. Haghegna tangk igne salaꞌuni phei mita, eghuteuna lamnagna na, funu ka keha phile na te tei posa ka keha phile na, namo fati mita vidogna, eghuteuna phonoto gna te ligoho ke kosi gna na, nabotho thilo mita vidogna.

²⁴ Ke kosigna tangk igne, ka geri foflogna na au phei thura thotoghale melen lithui. Thotoghale igre thofno loku fodu jateula kaisei vido eghu balugna tangk igne, eghuteuna mana edi nabotho kaisei thotoghale melen ka vido mita te gnafa igre.

²⁵ Eghuteuna mana ne edi nabotho phei thotoghale buluka nalhaꞌudi ka bras. Mana ne edi mala khegra fodu. Aonu thiloire ne figri tei ke maghati, thiloire ne figri tei ke mata, thiloire ne figri tei ke mosu, eghuteuna thiloire ne figri tei ke raru. Tangk igne ne gnokro kligna ka thagrudi nabotho phei igre.

²⁶ Thutagna tangk igne namo nhana sentemita. Eghuteuna kligna ka foflogna tangk igne, thogra jateula kaisei kapu eghu peko fakosi jateula famane sisi jungutu eghu. Tangk igne tangomana te hata phiatutu fati thogha lita khoꞌu.

Glepo mala pala khoꞌu

²⁷ Eghuteuna mae Huram ne horo nabotho kat ka bras te au wil te mala tughadire. Reꞌe kaisei nanaba kolho, eghuteuna brahugna kaisei mita na, nhanasalei sentemita, eghuteuna krepagna na kaisei mita nei nhanasalei sentemita, eghuteuna haghegna na kaisei mita nei tolufulu sentemita.

²⁸ Eghuteuna mare babara ka fati khukru re, eghuteuna geridire loku fodu ka babara igne.

²⁹ Ka geridire mare lalaoni ka mumuju lion, ka buluka, nei ka engel. Nafnata mumuju igre jaola au ka babara. Ke klignadi nei ke paridi teuna mumuju igre mana edi mumuju te jateula sisi teu filodire.

³⁰ Kaat igre au fati wil, eghuteuna fati bar te mala loku haghedi wil igre. Kligna ka wil igre au fati khegra teke hohoro ka bras te mala pala haghegna dis biꞌo igne. Khegra igre au chechenge gaju tadi.

³¹ Kligna faligohoni foflogna kat igne au kaisei glepo te kiloni mare frem, eghuteuna mamharagna na phiatutu glimai sentemita. Eghuteuna krepagna frem igne fitu salei sentemita. Eghuteuna te jateula ring biꞌo teu igne au mumuju tagna. Nu gerigna kat igne theome raon jateula frem igne eghu.

³² Fati wil te au ke paridi fati philedi kat igre. Biꞌodi wil te gnafa igre fitusalei sentemita.

³³ Mana edi wil re jateula wil di chariot mala magra ra eghu. Eghuteuna mana hohoro vido te gnafa ka wil nei bar teu igre ka bras.

³⁴ Kaat te gnafa re au fati hadele, kaisei ka khukru te gnafare.

³⁵ Eghuteuna klignadi khegra te gnafa kat na igre tei faligohoni vido igne nabagna varadaki phei sentemita krepa gna na. Hadele te au ka gerigna na igre loku fodu kligna ka kat igre.

³⁶ Thinidi kat igre fodu ka thotoghale di engel, lion, grege gaju thubo nei chechenge gaju.

³⁷ Igre, unha te edi mana ka kat te mala hata khoꞌu igre. Kate blalho bras te mala tofa na, mana hata glepo mala tofa bras na mala kafe edi kat igre. Aonu reꞌe na kaisei nanaba ngala.

³⁸ Mae Huram jaola ne edi nabotho dis biꞌo teke hohoro ka bras ne lilisei ka kat igre. Biꞌodi dis khoꞌu igre te funu ka keha phile na te thoke ka keha phile na, kaisei mita nei nhanasalei sentemita. Eghuteuna kaisei besin na tangomana te thokeni nhana gobi nhanasalei lita.

³⁹ Kate edi te gnafa igre, mana ne lilisei glima kat ke mata Sugablahi, eghuteuna glimai ke raru Sugablahi. Eghuteuna mana ne lilisei tangk biꞌo na ka sulukhu gna Sugablahi na ke maghati.

Igre glepo teke edi mae Huram ka Sugablahi na

⁴⁰ Mae Huram jaola ne horo dis, nei sevol nei besin. Aonu mana edi ne gnafa gloku mala edi mana teku King Solomon ka nogna Sugablahi Lord.

⁴¹ Glepo teke edi mana ka bras igre: Phei khegra biꞌo. Phei glepo jateula dis eghu ke klignadi phei khegra igre. Phei glepo teke hohoro ka chen jateula fangna eghu mala lalaoni phei phaꞌudi khegra igre.

⁴² Fati gobi mumuju sisi pomegranet, phei gobi sisi pomegranet kaisei fangna teke hohoro ka chen eghu ka phaꞌugna kaisei khegra.

⁴³ Nabotho kat mala pala khoꞌu, baludi nabotho besin khoꞌu.

⁴⁴ Kaisei tangk biꞌo, baludi nabotho phei mumuju buluka nalhaꞌudi te kegra ke pari mala pala haghe gna tangk biꞌo igne.

⁴⁵ Baket mala lilisei nakrofu, nei sevol nei besin. Igre gobigna lepo gna Sugablahi teke edi mae Huram ka bras malagna King Solomon.

⁴⁶ King neke cheke ka mana mala edi glepo igre ka sare rhegna Khoꞌu biꞌo Jordan, farihoteidi phei namono biꞌo Sukot ghe Saretan. Jare teke tofa bras teke fablalho mare igre teke edi glepo igre.

⁴⁷ Nu king neke theome chekedi mare mala skel gobigna lepo igre, naugna kmana fara, eghume mare theome nanga nodi te mala hirodi tahudi re.

⁴⁸ Eghuteuna mae Solomon ne chekedi mae glokure mala horo glepo mala lilisei lamna Sugablahi. Glepo teke horo mare ka famane gol re igre: Olta mala gahu insens. Tevo mala lilisei Bret Blahi.

⁴⁹ Nabotho frem mala lilisei juta. Mare lilisei glimai ke mata, eghuteuna keha glimai ke raru ke ulugna Chogho te Thono Blahi fara na. Eghuteuna mumuju di sisi, nei juta, nei chochomi,

⁵⁰ nei dis, nei glepo mala falehe juta, nei dis mala gahu insens, nei sevol mala krisu nakrofu. Eghuteuna mare hata gol ne horo hins maladi phei grengathagna u Chogho te Blahi Fara igne, nei maladi phei grengathagna Sugablahi na.

⁵¹ Kate gnafa king Solomon glokugna nogna Sugablahi Lord igne, mana hata ne mei silva nei gol nei keha glepo teke fablahi kmagna mana, King Devet tifa, ne lilisei ka Sugablahi na.