Ululahu Kings 6 - Buka Blahi Ka Cheke Holo

King Solomon ne funu loku Sugablahi na

¹ Fati gobi nhanasalei finogha ke leghugna te jifla Ijep naiknodi Israel, eghuteuna ka fafati finogha King Solomon te funei fruni Israel, eghuteuna ka nhigra Sif te fapea nhigra gna finogha na, King Solomon ne funu loku ka nogna Sugablahi Lord.

² Sugablahi igne thono biꞌo fara, brahugna na thokeni varadaki fitu mita, eghuteuna krepagna na, thokeni nheva mita, eghuteuna haghegna na, thokeni nabotho thilo mita vidogna.

³ Krepagna varanda na, thokeni glima mita vidogna, eghuteuna brahugna na, thokeni nheva mita, horoghoto ka krepagna Sugablahi na.

⁴ Mare horo keha wida ka gringni gna na, mala tothora nei ke bobotho eghu. Naugna gringni gna Sugablahi na thono thuta fara, eghuteuna wida ke kosi gna gringni na theome krepa, nu wida ka gringni ke suga na krepa fara.

⁵ Eghuteuna ka geridi nei ke leghu teuna au kmana chogho ikodi ke kosi gringni ka Sugablahi igne, eghuteuna chogho igre au ka fatilo stori.

⁶ Ka stori ululahu pari na, krepadi chogho igre salaꞌudi phei mita. Ka fapea stori na, krepadi chogho re, salaꞌudi phei mita vidogna, eghuteuna ka fatilo stori na, ke krepadi chogho igre, salaꞌudi thilo mita. Naugna gringnigna Sugablahi igne pari na thono thuta fara, eghuteuna fapea stori na theome raꞌe thuta, eghuteuna ka fatilo stori kligna na, theome thuta jateula te pari na eghu. Ka puhi igne te au vido ka gringni kosi na te au thaba ka chogho kosi na te tangomana te mala gnokro fakeli na, eghuteuna theo kaisei thaba te tei lamna ka gringnigna Sugablahi na.

⁷ Thina te mala horo gna Sugablahi na la kato togheihi ka vido aheva te dokha mare na. Mare eni igne kate loku mare ka Sugablahi na, theo kaisei naikno te tangomana te loku ka hama, nhirama, sisel, nei keha nafnata glepo igre naugna mare gnafa lokuhi ka thina igre.

⁸ Grengatha te mala tei lamna chogho pari ka stori ulu lahu na au ke mata, eghuteuna au lada te mala haghe kligna ka fapea stori na, eghuteuna ka fatilo stori na.

⁹ Eghume mare ne loku fahui Sugablahi igne. Mare horo ka thaba sida ke pari ka glamna gna suga na.

¹⁰ Eghuteuna mare hata thaba sida biꞌo te horodi chogho te tudu mei kosi ka gringni gna Sugablahi na. Eghuteuna haghedi chogho te gnafa igre salaꞌudi phei mita.

¹¹ Aonu Lord ne cheke eghu ka Solomon,

¹² “Iara magnahaghei te cheke ka iagho eigna Sugablahi te loku iagho igne. Jame te leghudi iagho nogu cheke nei vetula teu iara igre na, iara ginauna edi ranghi nigho unha teke nhaꞌa chekedi iara ka mae kmamu iagho King Devet.

¹³ Uve, iara ginauna au balumi ghotilo naiknomi Israel, eghuteuna iara ginauna na theome tei koko ghami ghotilo nogu naikno iara ra.”

Glepo te au ke lamna nogna SugablahiLord

¹⁴ Aonu mae Solomon ne loku fahui Sugablahi igne.

¹⁵ Mare hata thaba sida ne toku tafru gringni thina ke lamnagna Sugablahi na. Thaba igre funu pari tei posa kligna. Eghuteuna goghogna na, mare horo ka keha nafnata famane gaju.

¹⁶ Eghuteuna lamna ka khukru gna Sugablahi na, mare horo kaisei chogho ikoi, mare kiloi chogho igne, “Chogho Thono Blahi Fara.” Brahugna chogho igne thokeni nheva mita, eghuteuna mare horo gringni igne ka thaba sida. Gringni igne funu pari tei posa kligna.

¹⁷ Eghuteuna brahugna chogho biꞌo ke ulugna Chogho te Blahi fara igne thokeni nabotho nhana mita.

¹⁸ Gringni te gnafa ke lamnagna Sugablahi igne, mare toku tafru ka thaba sida. Eghuteuna mare horo sisi nei maduku eghu ka thaba igre.

¹⁹ Mare eni Chogho te Thono Blahi Fara igne mala lilisei nogna Bokis Blahi Lord ra eghu.

²⁰ Brahugna Chogho te Blahi fara igne thokeni nheva mita, eghuteuna krepagna na, nheva mita, eghuteuna haghegna na nheva mita. Ka vido te gnafa ke lamnagna chogho igne mare toku tafru ka famane gol thaba gnare. Eghuteuna Olta gna na mare jaola toku tafru ka famane gol.

²¹ Glamnagna Chogho Blahi igne, mare jaola toku tafru ka famane gol thabagnare. Eghuteuna mare faolo kasa kaisei chen gol ke ulugna Chogho te Blahi fara te jaola te toku tafru ka famane gol igne.

²² Vido te gnafa ke lamnagna Sugablahi igne mare toku tafru ka gol thabagnare. Eghuteuna Olta te au ka Chogho te Blahi fara igne mare jaola toku tafru ka famane gol.

^23-26 Mare horo phei mumuju engel ka thaba gaju oliv. Brahudi phei mumuju igre thokeni glima mita. Mare lilisei phei engel igre lamna ka Chogho te Blahi fara na. Phei mumuju igre kaisei nanaba ngala, eghuteuna repa kafe au baghi. Brahugna kaisei baghi na salaꞌudi phei mita. Aonu funu ka khukrugna keha baghi na te posa ka keha khukru baghi na thokeni fati nei vido mita.

²⁷ Mare fakegra haghe phei engel igre lamna ka Chogho te Blahi fara na. Aonu khukru baghidi phei engel igre namo ka gringnigna chogho igne, eghuteuna keha khukru baghidi phei engel igre loku fodu farihotei.

²⁸ Eghuteuna mare toku tafru ka gol thinidi phei engel igre.

²⁹ Gringnidi chogho biꞌo gna Sugablahi igne, nei gringnidi Chogho te Blahi fara igne eghu mare horo thotoghale di engel, nei gaju thubo, nei sisi.

³⁰ Eghuteuna mare toku tafru ka gol goghodi phei chogho igre.

³¹ Phei grengatha ka Chogho te Blahi fara igne mare horo ka gaju oliv. Eghuteuna khegradi phei grengatha igre au glima phile.

³² Phei grengatha igre mare horo thotoghale engel, nei gaju thubo nei sisi. Eghuteuna mare hata gol ne toku tafru thotoghale te au ka phei grengatha igre.

³³ Eghuteuna grengatha te mala ruma ka Sugablahi igne mare jaola horo khegra gna na ka gaju oliv, eghuteuna khegradi phei grengatha igre au fati phile.

³⁴ Eghuteuna mare horo phei grengatha igre ka famane gaju. Phei grengatha igre kafe au phei vido te mala lolhopo na.

³⁵ Eghuteuna ka phei grengatha igre mare jaola horo thotoghale engel, nei gaju thubo nei sisi. Eghuteuna mare hata gol mala thofno toku tafru thotoghale ka phei grengatha igre.

³⁶ Aonu ke kosi gna Sugablahi igne au kaisei glalaba ikoi falithui. Eghuteuna ka gringni te falithuni vido igne, mare eni lilisei thaba ke kligna gna fatilo thura thina na.

³⁷ Khotogna Sugablahi igne, mare neke eni ka fapea nhigra ka fafati finogha gna King Solomon.

³⁸ Eghuteuna ka fahana nhigra ka nabotho kaisei finogha gna King, mare ne loku fahui Sugablahi igne. Mare horo ne thofno horoghoto ka unha teke ghathoni mana na. King Solomon ne hata fitu finogha te horo Sugablahi igne.