Ululahu Kings 5 - Buka Blahi Ka Cheke Holo

King Solomon tarabana mala babana nogna SugablahiLord

¹ King Hiram mae biꞌo gna Taea igne mana kaisei kheragna keli King Devet. Eghuteuna kate nomhini mana mae Solomon te king tughuni mae kmagna na, mana ne kurudi keha nogna mae mala tei filoni mana.

² Eghuteuna King Solomon ne fatei cheke eghu ka mana,

³ “Iagho laseni, tifa na kmagu iara King Devet, mana neke theome babana Sugablahi te mala kilo fnaknoni nanghagna Lord nogna God na. Naugna nodi naoka mare kantri te au faligohoni mana re mei magra koba ka mana. Leuleghu fata na mana magra koba ka nogna naokare, eghuteuna Lord ne ghilei toghoni mana neke uludi mare.

⁴ Nu gognarona Lord nogu God iara na toghodi keha kantri te funei frunidi iara igre mala au ka pharikeli balumi ghehati. Eghume, jare na theo kaisei naoka ba puhi biꞌo te mala goigoni ghami ghehati na.

⁵ Eghume, gognarona iara magnahaghei te babana kaisei Sugablahi te mala kilo fnaknoni nanghagna Lord nogu God, jateula Lord teke chekeni mana ka mae kmagu iara Devet. Lord neke cheke eghu ka mana, ‘Mae thumu iagho mae ihei nate gnokro ka sape nafnakno te mala tughu nigho iagho igne ginauna babana Sugablahi te mala kilo fnaknoni nanghagu iara na.’

⁶ “Eghume, iara magnahaghei nigho iagho te mala chekedi nou mae glokudi Sidon ra mala tei Lebanon mala kato keha gaju sida jare, mala babana iara Sugablahi igne. Nu iara ginauna kurudi nogu mae gloku igre mala ari toghodi mare. Eghuteuna iara ginauna foli nigho unha te chekeni iagho na mala folidi iagho nou mae glokure. Tapa kafe lasedi nou mae gloku iagho are thofno lalase salaꞌudi keha mae te kato thabara.”

⁷ Kate nomhini King Hiram nogna cheke King Solomon igne, mana ne keli tagna fara. Aonu mana ne cheke eghu, “Gognarona iara cheke fakelini Lord! Naugna Mana ne tusu ranghini mae Devet kaisei thugna te au tagna gaoghatho te keli mala ke tughuni mana nei funei fruni ka kantri te rheta igne.”

⁸ Aonu, mana ne fatei cheke igre ka king Solomon, “Nou cheke iagho ra la mei posahi ka iara, eghuteuna gognarona iara tarabana mala eni unha glepo te magnahagheni iagho na. Iara ginauna faꞌari gaju sida ka iagho, baludi keha nafnata gaju te keli langau eghu.

⁹ Nogu mae gloku iara igre ginauna pala thaba funu Lebanon soru tongna. Aonu mare ginauna haru fodu, eghuteuna mare ginauna fatathao ka thongna, ari longa ka vido aheva te magnahagheni iagho na. Ka vido tuana nogu mae gloku iara gre nate ari rurutha thabare, eghuteuna nou mae gloku iagho re tangomana te pala te tei re. Te mala folidi mare na, iara magnahaghei nigho iagho te famei gano ka iara baludi mae iheire te au ka sugagu iara igre.”

¹⁰ Aonu mae Hiram ne fatei kmana gaju sida nei gaju te keli eghu ka King Solomon naba nihai teke toredi mana re.

¹¹ Leuleghu finogha na, King Solomon fatei kaisei gobi namnosalei thogha baeg wit te biꞌo, eghuteuna fati gobi thogha lita oliv oel eghu ka mae Hiram.

¹² Lord ne tusu ranghini mae Solomon kmana gaoghatho te keli jateula teke toreni mana na neu. Eghuteuna king Hiram ghe mae King Solomon, phiamare ne nhaꞌa cheke fofodu fakeli nodi.

¹³ King Solomon ne hata tolufulu thogha maedi Israel, eghuteuna huhurudi mare mala eni gloku igne.

¹⁴ Mana ne vahini mae Adoram te mala jateula nodi phaꞌu mae teuna, eghuteuna mana tufa mae igre ka thilo tothoghei, eghuteuna ke lamnagna kaisei tothoghei na, au nabotho thogha mae. Tothoghei te gnafa ka thilo tothoghei igre tei loku kaisei nhigra Lebanon, eghuteuna ke pulo mei au phei nhigra ka namono.

¹⁵ Eghuteuna mae Solomon jaola hata nhanasalei thogha mae mala kato thina ka thogele ro. Eghuteuna fitusalei thogha mae mala pala.

¹⁶ Eghuteuna mana vavahi thilo thogha thilo gobi mae biꞌo mala fiofilo ka nodi gloku mare re.

¹⁷ King Solomon cheke ka mae gloku re mala leghudi nogna cheke mana igre ne tei dokha nei kato famane thina mala pala tei Jerusalem.

¹⁸ Ka nafnata puhi igre, nodi mae gloku King Solomon ghe mae Hiram igre baludi mae gloku ka namono biꞌo Gebol tarabana thina nei thaba te mala lokugna nogna Sugablahi Lord.