Ululahu Kings 4 - Buka Blahi Ka Cheke Holo

Nogna funei King Solomon

¹ Aonu, Solomon ne king fruni Israel.

² Igre nanghadi nogna mae biꞌo mana re: Pris Asaraea thugna mae pris Sadok.

³ Mae Elihoref ghe mae Ahaeja, phei thugna mae Sisa igre, mae mala reireghigna nogna buka king. Mae Jehosafat thugna mae Ahilud, mae mala rioriso soru chekegna king.

⁴ Mae Benaea thugna mae Jehoeada, mana mae komanda gna armi. Sadok ghe mae Abiata, phiamare mae pris.

⁵ Mae Asaraea thugna mae Natan, mana mae biꞌodi hatimare mae funei ka provins. Mae Sabud thugna mae Natan, mana mae pris mala tufa gaoghatho ka king.

⁶ Mae Ahisa igne, mana mae funeidi mae te loku ka suga gna king. Mae Adoniram, thugna mae Abda, mana mae funeidi nogna mae gloku fateo king.

⁷ King Solomon ne vavahi nabotho phei mae gavana mala reireghidi nabotho phei nohidi Israel. Nodi gloku mae igre mala hata gano ka nabotho phei nohi igre tei Jerusalem ka king nei tharaknagna. Mare eni igne kaisei nhigra ke lamnagna kaisei finogha.

⁸ Igre nanghadi nabotho phei mae gavana re: Mae Ben-hur, mana mala reireghidi namono te au ka thogele ka nohi Efrem.

⁹ Mae Bendeka, mana mala reireghidi fati namono biꞌo igre: Makas, Salbim, Bet-Semes nei Elon-Bet-Hanan.

¹⁰ Mae Benhesed, mana mala reireghidi thilo namono biꞌo, Arubot, Soko, nei Hefa.

¹¹ Mae Ben Abinadab, mae mala reireghidi namono te au fei thogele ka namono biꞌo Nafa-Dor. Mae Ben Abinadab gne mana tolaghi ka Tafa thugna King Solomon.

¹² Mae Bana thugna mae Ahilud, mana mala reireghidi phei namono biꞌo Tanak ghe Megido, nei vido te gnafa ka namono biꞌo Bet-San. Vido igne namo ka namono biꞌo Saretan ke mata namono biꞌo Jesrel. Fofota gna nohi igne tei posa ka namono biꞌo Abel Mahola eghuteuna ka namono biꞌo Jokmeam.

¹³ Mae Ben-Geba, mana reireghini namono biꞌo Ramot te au ka nohi Gilead. Namono igre nodi vikegna mae Jaea, thugna mae Manase. Eghuteuna mana jaola reireghini vido Agob ka rijon Basan. Nohi igne au namnosalei namono biꞌo. Namono biꞌo igre bara lithui ka thina biꞌo. Eghuteuna grengathadire bibilakhi ka aean biꞌo te horo ka bras.

¹⁴ Mae Ahinadab thugna mae Ido, mana reireghini vido Mahanaem.

¹⁵ Mae Ahimas, mana reireghini nohi Naftali. Mae igne tolaghi ka Basemat, thugna gaꞌase King Solomon.

¹⁶ Mae Bana, thugna mae Husae, mana reireghidi phei nohi Asa ghe Bealot.

¹⁷ Mae Jehosafat, thugna mae Parua, mana reireghini nohi Isaka.

¹⁸ Mae Simei, thugna mae Ela, mana reireghini nohi Benjamin.

¹⁹ Mae Geba, thugna mae Uri, mana reireghini nohi Gilead. Tifa teke mei na nohi igne King Sihon maegna Amori ghe King Og maegna Besan teke funei frunini na. Mae Geba kolho teke reireghigna nohi igne na.

King Solomon dedei fara

²⁰ Ka narane te funei King Solomon igre naiknodi Israel nei naiknodi Juda teu igre vuragha kmana fara jateula nusu ka geri thongna ra eghu theome tangomana te kahadire. Leuleghu narane na mare ghamu nei koꞌu eghu balu glealeꞌa.

²¹ King Solomon ne funei frunidi kantri te ikodi te gnafa funu ka Khoꞌu biꞌo Iufretis ke raru na tei posa Filistia ke mosu na, eghuteuna tei posa ka nohi Ijep ke mata. Eghuteuna kantri igre foli takis ka mana, nei au ke parigna nogna nolaghi mana kate karha teu mana na.

²² King Solomon nei mae iheire te loku ka mana re ghamu jateula igne eghu leuleghu narane na: Phei gobi varadaki baeg famane flaoa te biꞌo, fati gobi phiatutu baeg flaoa biꞌo langau,

²³ nabotho buluka te oho kolho ke lamna suga buluka, eghuteuna varadaki buluka te ghamu buburu kosi, eghuteuna kaisei gobi sipu, nei keha nafnata deer, nei keha daki te blokha.

²⁴ Mana funei frunidi kantri ke mosu Khoꞌu biꞌo Iufretis, fufunu ka nohi Tifsa tei posa ka nohi Gasa. Eghuteuna mana loku fodu kantri te au faligoho igre mala au ka pharikeli.

²⁵ Ka narane te King Solomon igre, naiknodi Juda nei Jerusalem teu igre ne au ka pharikeli, funu ka namono Dan ke raru tei posa mhata namono Bereseba. Mare te gnafa na au fakeli ka ghedi nagare thedire, aheva mare te joꞌu grep nei fig.

²⁶ Solomon au phiatutu thogha chogho mala lilisei hose mala korho chariot ka magra, eghuteuna nabotho phei thogha hose maladi mae soldia.

²⁷ Hatimare nabotho phei nogna mae gavana mana igre hata mei gano ka king kaisei nhigra ke lamnagna kaisei finogha. Mae gavana igre hata mei gano ka mana nei ka iheire te au ka sugagna king mala theome kmoꞌe ka unha te magnahagheni mare na.

²⁸ Mare jaola hata mei bali nei buburu eghu maladi hose mala korho chariot nei keha nogna hose King Solomon.

Nogna gaoghatho te keli King Solomon

²⁹ King Solomon au tagna gaoghatho te keli teke tusu ranghini God. Gaoghatho te keli nei glalase teu igre thono biꞌo fara, jateula nusu ka geri thongna ra eghu theome tangomana te kahadire.

³⁰ Mana lalase fara salaꞌudi mae glalasedi ka kantri ke maghati nei mae glalasedi Ijep.

³¹ Nogna gaoghatho te keli mana igne salaꞌu fara, salaꞌudi keha mae re, tulao, mae Etan vikegna mae Esra, nei salaꞌuni mae Heman, nei mae Kalkol, nei mae Dada, thilo thugna mae Mahol. Eghuteuna thoutonu eigna mana na tei posa ka kantri te gnafa te falithuini Israel.

³² Mana toutonu thilo thogha famane cheke te au tadi gaoghatho te keli, eghuteuna rioriso kaisei thogha glima khoje.

³³ Mana lasedi fara eidi gaju nei buburu, funu ka nafnata gaju sida biꞌodi Lebanon tei posa ka buburu ikodi te jateula hisop teu te kotu tafri ka bara thina na are. Eghuteuna mana jaola lasedi fara thua nafnata glepo te tautagu are, nanghaji, thotoli, mogo nei sasa langau eghu.

³⁴ Hatimare mae king ka nauthoglu igne nomho thoutonu eigna nogna famane gaoghatho te keli King Solomon igre, eghuteuna mare ne kurudi keha nodi mae mala tei fanomho ka mana.