Ululahu Kings 22 - Buka Blahi Ka Cheke Holo

King Jehosafat ghe King Ehab

¹ Nabagna thilo finogha Israel ghe Siria ne au ka pharikeli, theo kaisei magra ka phei kantri igre.

² Nu ka fatilo finogha na, King Jehosafat gna Juda tei ne filoni King Ehab gna Israel.

³ Kate tei Jehosafat te filoni mae Ehab na, mae Ehab ne cheke eghu ka nogna mae biꞌo re, “Ramot-Gilead gne noda tahati. Ne faꞌunha si tahati te theome eni kaisei glepo mala teke hata fapulo ka king gna Siria gnea?”

⁴ Aonu mana figri ka mae Jehosafat ne ghusna eghu ka mana, “Ba, iagho tangomana te tei balugu iara te mala magra ka king gna Siria jare Ramot-Gilead na?” King Jehosafat ne cheke eghu ka mana, “Uve, iara tarabana fabrahu ngala baludi nogu soldia nei nogu hose teu igre mala tei baludi nou soldia iagho re.

⁵ Nu ulu lahu na, tahati na kulu laseni ghu gaoghatho gna Lord na.”

⁶ Aonu mae king Ehab ne kilo meidi fati gobi profet. Eghuteuna mana ne ghusna eghu ka mae profet igre, “Ba, iara tangomana te tei magra ka king gna Siria jare Ramot-Gilead, ba theo?” Hatimare ne cheke eghu ka mana, “Uve king, tei sagho. Noda Lord ginauna togho nigho mala uluni iagho magra na!”

⁷ Nu King Jehosafat neke ghusna eghui, “Ba, theo kaisei nogna profet Lord te au teu agne te mala ghusnani tahati gaoghathogna Lord na?”

⁸ Aonu King Ehab ne cheke eghu, “Uve, kaisei nogna profet Lord na au agne, nanghagna na mae Maekaea, thugna mae Imla. Tapa tangomana te ghusnani mana te mala nomhini gaoghathogna Lord na. Nu iara tiroguni mae igne eigna leuleghu fata na mana theome chekeni kaisei glepo te keli ka iara, nu nonomho diꞌa eigu iara kolho!” Mae Jehosafat ne cheke eghu ka mana, “Iagho theome tangomana te cheke jateula tuana teuna. Fanomho sagho ka unha te chekeni mana na!”

⁹ Aonu King Ehab ne chekeni kaisei nogna mae biꞌo ne tei kilo meini Profet Maekaea.

¹⁰ Ka narane tuana, phei mae King igre gnokro neu rhegna grengatha gna bara thina gna namono biꞌo Samaria. Phiamare pipichi nogna famane pohe king na gnokro neu ka nodi sape nafnaknore. Phiamare au neu ka vido aheva te mala fagagae wit naiknore. Eghuteuna fati gobi profet mei ne toutonu cheke gna nodi god na ke uludi phiamare.

¹¹ Kaisei mae ka mae profet igre, nanghagna na mae Sedekaea, thugna mae Kenana. Mae igne ne edi phei glepo jateula phei hona buluka nalhaꞌugna neu ka aean. Mana ne cheke eghu ka King Ehab, “Igne unha te chekeni Lord na: ‘Ka phei hona igre, iagho ginauna goigoni ni armi gna Siria.’ ”

¹² Eghuteuna keha mae profet igre jaola ne chekeni igne. Mare ne kafe cheke eghu, “Iagho tei magra ka king gna Siria jare Ramot-Gilead. Lord ginauna togho nigho iagho mala ke hata fapulo namono tuana.”

¹³ Aonu mae biꞌo teke kilo meini mae Profet Maekaea igne ne cheke eghu ka mana, “Keha mae profet igre mare nhaꞌa cheke ka king te mala uluni mana magra na. Te keli na iagho jame jaola cheke jateula mare eghu.”

¹⁴ Nu mae Maekaea ne cheke eghu, “Ka nanghagna Lord mae ihei te karha te tifa, iara ginauna cheke fadoglo ari kolho ka iagho unha teke chekeni Lord ka iara na.”

¹⁵ Aonu mana mei ne kegra ke ulugna King Ehab, eghuteuna Ehab ne ghusna eghu ka mana, “Profet Maekaea. Jame tei te magra ghepa King Jehosafat ka king gna Siria jare Ramot-Gilead na, ghepa ginauna uluni magra igne, ba theo?” Eghuteuna mae Maekaea ne cheke eghu ka mana, “Iagho tei magra ka king gna Siria jare Ramot-Gilead, Lord ginauna togho nigho iagho mala ke hata fapulo iagho namono tuana.”

¹⁶ Nu King Ehab ne cheke faheta eghu ka mana, “Jame te cheke iagho ka nanghagna Lord na, iagho chekeni ngala unha te tutuani na! Niha fata chekeni iara glepo igne ka iagho?”

¹⁷ Aonu mae Maekaea ne cheke eghu, “Iara ginauna chekeni ka iagho unha te filoni iara ka mifi na. Ka mifi igne iara ne filodi soldia te gnafa Israel igre ne thofa tafri ke kligna thogele jateula sipu te theo kaisei mae te mala reireghidi ra neu. Eghuteuna Lord ne cheke eghu, ‘Mae soldia igre theo kaisei nodi mae lida te keli. Nu te keli na mare tei ka namono, naugna magra na la gnafahi.’ ”

¹⁸ Aonu King Ehab ne cheke eghu ka King Jehosafat, “Tore! Iara neke kulu chekehi ka ghotilo eigna mae igne, eigna mana theome tangomana te chekeni kaisei glepo te keli, nu chekedi kolho glepo te diꞌa re ka iara.”

¹⁹ Nu profet Maekaea tudu ne cheke eghu, “Fanomho fakeli ka unha te chekeni Lord igne! Iara filoni ka kaisei mifi Lord te gnokro teu ka nogna sape nafnakno na kligna. Eghuteuna nogna engel mana re kegra fei nhetagna, eghuteuna kehare fei mairigna.

²⁰ Eghuteuna Lord ne ghusna eghu ka mare, ‘Ihei nate tei chaghini King Ehab te mala tei te magra Ramot-Gilead te mala lehe jare na?’ “Eghuteuna engel igre ne chekedi keha soasopai gaoghatho.

²¹ Aonu kaisei naitu mei ne kegra ke ulugna Lord, ne cheke eghu, ‘Iara ginauna tei mala kuruni mana.’

²² “Lord ne cheke eghu ka mana, ‘Ka unha nate eni iagho na?’ Naitu igne ne cheke eghu, ‘Iara ginauna tei chekedi nogna profet mae Ehab igre mala cheke chaichaghi mare.’ “Lord ne cheke eghu, ‘Tei sagho gognarogne, mala tei mana ka magra.’ ”

²³ Eghuteuna mae Maekaea neke cheke eghui, “Glepo teke filoni iara na, la thoke meihi. Lord na nhaꞌa laohi kaisei naitu ka phepeodi nou mae profet iagho igre mala mei chaghi mare ka iagho. Eghume Lord la kulu chekenihi te puhi biꞌo ginauna thoke nigho iagho teuna.”

²⁴ Kate nomhini igne, Profet Sedekaea haghe ne taponi mae Maekaea ne cheke faheta eghu, “Niha tharunga gna Lord teke jifla ka iara teke ari cheke ka iagho na?”

²⁵ Nu profet Maekaea ne cheke eghu, “Iagho ginauna na laseni kate thoke mei puhi biꞌo ka iagho na, eghuteuna iagho na rikha tei poru ka kaisei chogho ke lamnagna kaisei suga.”

²⁶ King Ehab ne cheke eghu ka kaisei mae soldia, “Iagho hata mae Maekaea na mala kuru teini mae Amon, mae ihei te mae lida gna namono biꞌo tuana, ghe mae thugu iara Joas.

²⁷ Iagho chekedi phiamare mala lilisei mae igne ka suga sosolo. Eghuteuna faghamuni ka bret moja nei khoꞌu eghu kolho ghilei ke pulo mei iara ka magra.”

²⁸ Nu mae Maekaea ne cheke eghu, “Jame karha teke pulo mei iagho na, Lord na neke theome cheke mei ka iara.” Eghuteuna mana ne cheke eghu ka mare, “Ghotilo te gnafa na kafe fanomho ka unha te chekeni iara igne.”

King Ehab ne lehe

²⁹ King Ehab gna Israel balugna King Jehosafat gna Juda, phiamare tei ne magra ka king gna Siria ka namono Ramot-Gilead.

³⁰ King Ehab ne cheke eghu ka King Jehosafat, “Kate ari tahati ka magra na, iara ginauna pipichi ka keha nafnata pohei mala theome filo glani ghau iara naiknore, nu iagho na pipichi nogna pohe king ra.” Aonu mae Ehab ne pipichi ka keha nafnata pohei mala theome filo glani naiknore, aonu mana ne tei ka magra.

³¹ King gna Siria igne ne cheke eghu ka nogna tolufulu phei mae komanda te magra ka hose. “Ghotilo tei magra kolho ka king gna Israel!”

³² Aonu kate filoni mae komanda igre te mei mae king Jehosafat te pipichi ka famane pohe na, mae te magra ka hose igre gaoghathodi na jame igne ngala mae king gna Israel na neu ne tei magra ka mana. Nu King Jehosafat ne eha fabiꞌo,

³³ eghuteuna kate nomhini mare naogla gna mana na, mae komanda igre laseni mana te theome king gna Israel na neke figri ne theome ngolhini mana.

³⁴ Nu kaisei mae soldia gna Siria ne fada tafri ka nogna phaloho na ne soru ka King Ehab. Jata igne ne soru ka khukrugna pohe te mala fanagragna jata na. Aonu king ne cheke eghu ka nogna mae draeva gna nogna chariot na, “Iara la ghoreho hila. Iagho figri chariot gne mala tei kokoni tapa magra igne!”

³⁵ Nu magra igne raꞌe ne brana fara ka narane igne, eghuteuna king Ehab ghasa haghe ka nogna chariot na ne figri tei ka hatimare mae soldiadi Siria. Eghuteuna dadara gna manare ne thofa soru ne fodu ke lamna chariot, eghuteuna ka grafi tuna mana ne lehe.

³⁶ Kate plulu naprai na, armi gna Israel igne ne eha eghu, “Ghotilo kafe pulo ka namono!”

³⁷ Aonu King Ehab ne lehe, mare hata thinigna mana na neke pulo Samaria, neke giugiluni mana jare.

³⁸ Mare ne tihi fagae nogna chariot mana na ka seu Samaria. Eghuteuna goro gaꞌase vine igre mei apu koba ka seu teke tihi koko dadaragna mana na igne, eghuteuna khuma re jaola ne mei lapi ka dadaragna mana igre. Igne ne thofno horoghoto fara ka unha teke chekeni Lord na.

³⁹ Keha glepo teke edi King Ehab, nei keha glepo teke lalaoni mana lamna suga ka khe'i elefant, nei thoutonu eigna namono biꞌo teke bara teke lithui mana ka thina igre, eghu mare neke rioriso soru ka Buka Eidi Glepo Teke Edi Hatimare Mae King Di Israel.

⁴⁰ Kate lehe mae Ehab na, thugna mana mae Ahasaea teke king tughuni mana na.

King Jehosafat gna Juda

⁴¹ Ka fafati finogha te King Ehab te king gna Israel igne, mae Jehosafat thugna King Asa te king Juda na.

⁴² Mana tolufulu glima finogha gna kate King mana na, eghuteuna mana ne king gna Juda varadaki glima finogha. Eghuteuna ido gna mana na Asuba, thugna Silhi.

⁴³ King igne mana ne eni unha te doglo ka tathagna Lord na, jateula King Asa mae kmagna tifa ia neu. Nu mana theome paꞌe soru nodi vido blahi mae bongihehe te au ke kligna thogele re, eghuteuna naiknore theome gnafa te fafara nei gahu insens teu jare na.

⁴⁴ Eghuteuna mana ne au ka pharikeli balugna king gna Israel.

⁴⁵ Keha glepo te biꞌo nei magra eghu teke edi King Jehosafat re, nei nogna nolaghi biꞌo eghu teke edi mana re, eghu mare neke rioriso soru ka Buka Eidi Glepo Teke Edi Hatimare Mae King Di Juda.

⁴⁶ Mana ne kafe khi fajifladi Juda mae nalhaꞌu nei gaꞌase eghu te edi puhi te diꞌa na ka vido te blahi igre. Naikno igre au neku ngala ke leghugna teke king mae Asa, kmagna mae Jehosafat.

⁴⁷ Ka narane igre, kantri Idom igne theo nodi king, aonu King Jehosafat ne vahini kaisei mae biꞌo mala funei fruni ni kantri Idom.

⁴⁸ King Jehosafat ne horo vaka biꞌo mala luja glepo. Eghuteuna mana ne kuru teidi nogna mae gloku re mala tei hata gol Ofia. Nu vaka igne ne tei ghorho Esion-Geba ne theome tangomana te tei thoke jare.

⁴⁹ King Ahasaea gna Israel igne ne cheke eghu ka Jehosafat, “Iagho snakredi nogu mae gloku iara gre mala loku baludi nou mae kru iagho are.” Nu mae Jehosafat ne theome magnahagheni nogna gaoghatho mana igne.

⁵⁰ King Jehosafat ne lehe, eghuteuna mare ne giugiluni mana ka bekudi hatimare King ka nogna namono biꞌo king Devet. Aonu Jehoram thugna Jehosafat neke king gna Juda.

King Ahasaea gna Israel

⁵¹ Mae Ahasaea thugna King Ehab ne funu funei fruni Israel ka fabotho fitu finogha te funei fruni King Jehosafat ka kantri Juda. Eghuteuna mana ne king Samaria phei finogha.

⁵² Nu mana ne edi unha te diꞌa ka tatha gna Lord na, naugna mana ne leghuni puhidi King Ehab ghe Kuin Jesebel, nei King Jeroboam, thugna Nebat. Retilo igre batudi naiknodi Israel ka nakhibo.

⁵³ Mana loku ranghini nei tarai eghu ka Baal. Aonu Lord, nodi God maedi Israel igne ne thono diꞌatagna fara ka mana, jateula teke eni ka kmagna mana tifa ia neu.