Ululahu Kings 21 - Buka Blahi Ka Cheke Holo

Nogna nagare mae Nebot

¹ Igne thoutonu eigna nogna nagare grep mae Nebot te au rhegna nogna suga biꞌo King Ehab jare Jesrel.

² Kaisei narane, King Ehab ne cheke eghu ka mae Nebot, “Famei ka iara nou nagare iagho ana mala joꞌu gano iara tagna, naugna ne namo fara ka nogu suga biꞌo iara gne. Iara ginauna nake tughu kaisei nagare teke kelignai tuanai, ba jame te magnahaghei iagho na, iara ginauna foli ka iagho.”

³ Nu mae Nebot ne cheke eghu ka mana, “Glose tuana nodi glose vikegu iara, funu ka kuꞌemi tifa ra ghilei mei posa ka narane gognarogne. Theome doglo ka tathagna Lord na jame te snakre ari iara ka iagho na.”

⁴ Aonu king Ehab neke pulo ka suga na, eghuteuna mana ne diꞌanagnafa gna fara ka nogna cheke mae Nebot igre. Eghuteuna mana tei ne thuru ka nogna sape na ne figri lao fei gringni na, ne tirogna ghamu.

⁵ Kuin Jesebel, khetogna na filoni igne ne ghusna eghu ka mana, “Naugna unha sagho te diꞌanagnafa te theome ghamu gnea?”

⁶ Eghuteuna mana ne cheke eghu ka naꞌa, “Iara neke toreni mae Nebot mala foli nogna nagare mana na neku, ba jame te magnahaghei mana na, iara tangomana te snakre lao ka mana keha nagare. Nu unha te chekeni mana ka iara na, mana theome tangomana te snakreni ka iara na.”

⁷ Jesebel ne cheke eghu ka mana, “Ba, iagho theome king gna Israel sia? Khegra haghe sagho ghamu, thosei nanga nou! Iara ginauna tusu ari ka iagho nagare tuana.”

⁸ Aonu Kuin Jesebel ne rioriso letas ka nanghagna king, eghuteuna lilisei fagaglana gna mana ka letas igre. Naꞌa ne fatei letas igre ka nogna mae biꞌo te gnafa king, nei ka keha mae mala baubatu ka namono Jesrel, namono gna mae Nebot.

⁹ Ka letas igne naꞌa ne cheke eghu, “Ghotilo vahini kaisei narane mala tarai nei dangna eghu. Ka narane tuana ghotilo kilodi mae biꞌo te gnafa ra. Eghuteuna ghotilo fagnokroni mae Nebot baludi mae biꞌo ka sape nafnakno.

¹⁰ Ghotilo hata mei phei mae mala vuavuha cheke, phei mae igre mala gnokro rhegna mana mala cheke faparini mana ke uludi hatimare mae biꞌo. Phiamare mala cheke chaghi eigna mana te cheke faparini God nei jaola cheke faparini king. Eghuteuna ghotilo hata fajiflani mana mala fada falehe ka thina.”

¹¹ Aonu goro mae biꞌo nei keha mae mala baubatu teu igre ne leghuni unha teke riorisoni kuin ka letas na igne.

¹² Mare ne vahini kaisei narane mala tarai nei dangna eghu ne kilo meidi mae biꞌo re. Mare ne fagnokroni mae Nebot baludi hatimare mae biꞌo.

¹³ Aonu mare hata ne mei phei mae te mala cheke chaichaghi igre ne gnokro rhegna mana, eghuteuna phiamare ne funu cheke chaghi eigna mana ke uludi hatimare mae biꞌo, ne cheke eghu, “Mae igne cheke faparini God nei jaola cheke faparini king.” Aonu mare hatani mae Nebot ne tei ke kosi namono biꞌo ne fada faleheni mana ka thina.

¹⁴ Ke leghugna igne, hatimare goro mae biꞌo ne fatei cheke igre ka Kuin Jesebel, “Mare fada faleheni mae Nebot ka thina.”

¹⁵ Kate nomhini Jesebel thoutonu igne, naꞌa tei ne cheke eghu ka king, “Nebot ia la lehehi. Nagare teke theome snakreni ka iagho mala foli teku ia, iagho tangomana te tei hata gognarona.”

¹⁶ Aonu kate nomhini mae Ehab tela lehehi mae Nebot na, mana ghosei ne tei hata nagare igne.

¹⁷ Nu Lord ne cheke eghu ka Profet Elija, maegna Tisbe igne,

¹⁸ “Iagho tei filoni mae Ehab, king gna Israel mae ihei te funei fruni ka namono biꞌo Samaria. Gognarona mana tei au Jesrel ka nogna nagare mae Nebot. Naugna mana magnahaghei te khotogna thegna nagare igne.

¹⁹ Iagho tei cheke eghu ka Ehab: ‘Igne unha te chekeni Lord na: Theome keli iagho te faleheni mae Nebot te hata nogna nagare mana na. Naugna te eni iagho igne, khuma ginauna lapi dadaramu iagho re ke kosigna namono biꞌo jateula teke lapi dadaragna mae Nebot ra eghu.’ ”

²⁰ Kate filoni mae Elija na, King Ehab ne cheke eghu, “Sei! Nogu naoka iara gne kela mei filo ghauhi iara!” Mae Elija ne cheke eghu ka mana, “Uve, iara mei filo nigho iagho, naugna iagho ne eni puhi te thono diꞌa fara na ka tathagna Lord.

²¹ Eghume, igne unha te chekeni Lord eimu iagho na, ‘Iara ginauna snakre ari puhi biꞌo mala thoke nigho iagho. Iara ginauna falehe nigho iagho baludi naikno te gnafa ka vikemu iagho are.

²² Iagho thono fakabruni fara nagnafagu iara na, eghuteuna iagho jaola batudi naikno di Israel ka nakhibo. Eghume, vikemu iagho gre ginauna lehe jateula vikegna King Jeroboam, thugna mae Nebat ia eghu. Eghuteuna vikemu iagho igre ginauna dofidi jateula vikegna King Basa, thugna mae Ahaeja ia eghu.’

²³ “Lord ne cheke eghu eigna Kuin Jesebel, ‘Khuma ginauna mei ghamu thinigna Jesebel na ke kosi namono Jesrel.’

²⁴ “Vikemu iagho te lehe ke lamna gna namono biꞌo igne, khuma ginauna mei ghamu thinidi re. Eghuteuna iheire te lehe mata re, nanghaji ginauna mei ghamu thinidi re.”

²⁵ (Theo kaisei mae te jateula King Ehab teu te snakreni nakarhagna na te mala eni glepo te thono diꞌa fara ka tathagna Lord na. Gobigna lepo te edi mana igre thono diꞌa fara, khetogna mana Jesebel igne te batuni mana na.

²⁶ Mana leghuni puhigna khetogna na ne pogho soru ka mumuju jateula teke edi naikno di Amo tifa ra neu. Lord neke khi fajifladi ka nodi vido glose teke tusu lao ka naiknodi Israel.)

²⁷ Kate nomhini King Ehab nogna cheke mae Profet Elija igre, mana diꞌanagnafa gna fara ne rerheku nogna pohe na. Eghuteuna mana ne pipichi kolho ka pohe te thona kolho. Mana tirogna ghamu ne nolo tafri balu diꞌanagnafa.

²⁸ Aonu keha nogna nonomho Lord na ne mei ka profet Elija:

²⁹ “Ba, iagho filoni King Ehab tela nhaꞌa faparini thegna gognarogne? Naugna tela nhaꞌa faparini thegna mana ke ulugu iara igne, iara ginauna theome eni kaisei puhi biꞌo mala thokeni mana kate karha teu mana na. Nu puhi biꞌo igne ginauna thokedi vikegna manare ka narane te king thugna mana na.”